Yobi 2:1-13
2 Kuna kwalanda, vakala lumbu kina wan’a Nzambi aludi*+ bakota muna kuyisunzula vana ndose a Yave,+ Satana mpe okotele vana bena, kayisunzula vana ndose a Yave.+
2 Yave oyuvuidi Satana vo: “Akweyi otuka?” Satana ovutwidi Yave vo: “Mu vumvula vana ntoto yo kangalela vo.”+
3 Yave ovovese Satana vo: “Nga omwene* selo kiame Yobi? Kavena muntu ko ofwanane yandi va ntoto. Nkwa unsongi*+ yo kwikama, ovuminanga Nzambi yo venga mambu mambi. Wakinu tatidila kwikizi kiandi,+ kana una vo ngeye ozolele kumfila+ yamfwasa* kondwa kuma.”
4 Satana ovutwidi Yave vo: “Nkanda mu nkanda. Muntu ovana yawonso kena yau mu kuma kia moyo andi.
5 Kansi owau, lambula koko kwaku yo viakana e visi yandi ye nitu andi, kieleka okutianguna vana ndose aku.”+
6 I bosi, Yave ovovese Satana vo: “Tala, una vana moko maku!* Kansi, kumvondi ko!”
7 Muna diadi, Satana okatukidi vana ndose a Yave, oyelese Yobi mavumbu mampasi,*+ tuka muna tambi yakuna mbat’a ntu.
8 Yobi obongele vasi kia kinzu kayikwangilanga, ovuende vana ntoto ampolo.+
9 Nkaz’andi umvovese vo: “Nga wakinu tatidila e kwikizi kiaku? Yambula Nzambi, wafwa kwaku!”
10 Kansi, Yobi umvovese vo: “Ovovele nze nkento azowa. Nga mawete kaka tufwete tambulwila kwa Nzambi aludi, yo lembi tambulwila mambu mambi e?”+ Muna mawonso mama, Yobi kasidi sumuka ko muna nu’andi.*+
11 Akundi atatu a Yobi—Elifaze+ wa musi Temane, Biledade+ wa musi Nsuka+ yo Sofa+ wa musi Nama, vava bawidi e mpasi zawonso zibwididi Yobi, bezidi konso muntu tuka kuna fulu kiandi. Bawizane vo benda kunkasakesa yo kumfiaulwisa.
12 Vava bamwene kuna vala, ke banzayidila ko. Bayantika kaza yo dila yo tiazuna mvuatu miau, bamwenge ntoto kuna zulu ye vana ntu miau.+
13 Bavuanda yandi vana ntoto muna lumbu nsambwadi, fuku yo mwini. Ke vakala muntu ko wamvovesa kana diambu dimosi, kadi bamona vo e mpasi zandi zayingi kikilu.+
Mvovo vana yand'a lukaya
^ Mvovo wa kingana kia Kiyibere, wan’a Nzambi uyikanga, i sia vo, ambasi.
^ Mvovo wa sina “Nga osidi ntim’aku muna.”
^ Yovo “Wakondwa tumbu, muntu ambote.”
^ Mvovo wa sina: “yamina.”
^ Yovo “una muna wisa kiaku.”
^ Yovo “mputa zampwena.”
^ Mvovo wa sina: “befo yandi.”
