Yezekele 16:1-63
16 E diambu dia Yave dizidi diaka kwa mono, oku vo:
2 “E mwan’a muntu, zayisa Yerusaleme o mavangu mandi mangemi.+
3 Vova vo: ‘I wau wuwu kavovele o Mfumu Yave kwa Yerusaleme: “Kuna nsi a Kenani watuka yo wutukila. O se diaku Nyamore+ kakala, o ngudi aku Nkete.+
4 Vo i luwutuku lwaku, muna lumbu kina wawutuka, o nkumba aku ke wazengwa ko, kwasukulwa mu maza ko kimana wavelela, kwakuswa mungwa ko ngatu zingwa va nlele.
5 Ke muntu ko wafwila e nkenda yamu tezo kia vanga kana dimosi muna mambu mama. Ke muntu ko wafwila e nkenda. Kansi wavetwa vana nzanza kadi wamengwa muna lumbu kina wawutuka.
6 “‘“Vava yaviokela vo, imwene vava waviluziokanga vana menga maku, ekolo waleka vana menga maku, ivovese vo: ‘Kwamanana zinga!’ Elo, ekolo waleka vana menga maku ivovese vo: ‘Kwamanana zinga!’
7 Ikitwidi se mbidi a nkangu, nze nti mimenene vana nzanza, okolele yo kula, oyantikidi sadila lekwa ya kuyiviengesela isundidi e ntoko. E ntulu zaku zikolele, e nsuki zaku zikudidi; kansi kimpene kaka wakala.”’
8 “‘Vava yaviokela vo yo kumona, yabakula vo olweke mu ntel’a songwa e nzola. Muna kuma kiaki, yavuika o mvuatu ame*+ yo fuka e kimpene kiaku, yadia e ndofi yo kanga yaku e kangu,’ u kavovele o Mfumu Yave, ‘ongeye wakituka se wame.
9 Yasukula muna maza, yakunguna o menga yo kukusa o mazi.+
10 I bosi, yavuika o mvuatu watoma tungwa ye nsampatu zambote za nkand’a bulu.* Yazinga e lino yambote yo kuvuika nlele miantalu.
11 Yaviengesela muna lekwa yantoko yo kusia e nlunga muna moko ye nsanga muna nsingu.
12 Yavuika mpe lunga muna nzunu aku ye lunga muna matu maku ye kolowa kiantoko vana ntu aku.
13 Wayiviengeselanga muna wolo ye palata, wavuatanga mvuatu a lino yambote, nlele a ntalu ye mvuatu watoma tungwa. E mfumfu yambote yo wiki yo mazi i madia wadianga. Wakituka se mote kikilu,+ wafwana mu kituka se ntinu a nkento.’”*
14 “‘E tunda diaku diyantikidi* mwangana muna zula+ mu kuma kia vienga kwaku, o vienga kwaku kwalunga, kadi o nkembo ame nsidi wo omu ngeye,’+ u kavovele o Mfumu Yave.”
15 “‘Kansi oyantikidi bunda e vuvu muna vienga kwaku,+ okitukidi nkembi* mu kuma kia tunda diaku.+ Otele zumba ye konso yakala oviokanga,+ o vienga kwaku kukitukidi se kwandi.
16 Obongele miakaka muna mvuatu miaku, oviengesele mio e fulu ya sambila e teke, vana ovangilanga kinkembi+—mambu mama ke mafwete kala ko, ke mafwete vangama nkutu ko.
17 Obongele mpe lekwa yantoko ya viengesela e nitu ya wolo ye palata ina yavana, ovangidi yo teke ya wan’amakala, otele yau e zumba.+
18 Obongele mvuatu miaku miatoma tungwa, ubafukidi mio,* ubavene o mazi mame ye ndumbu ame.+
19 E mbolo yavana—yavangilwa muna mfumfu yambote yo mazi yo wiki, ina yavana wadia—ovene yo mpe kwa yau se nsunga zambote.*+ I diau kikilu diavangama,’ u kavovele o Mfumu Yave.”
20 “‘Obongele o wan’aku amakala yo wan’aku amakento ana wangutila,+ ubakelele se kimenga kwa teke, badiwa+—nga e mavangu maku ma zumba ke mafwana ko e?
21 Ovondele o wan’ame yo kubakela se kimenga muna kubayoka vana tiya.+
22 Ekolo wayivenenge muna mavangu maku mawonso mangemi ye muna zumba, kusungamene lumbu ya kileke kiaku ko, vava wakala kimpene yo baluzioka vana menga maku.
23 Tâtu, tâtu kwa ngeye wau ovangidi o bi wau+ wawonso,’ u kavovele o Mfumu Yave.
24 ‘Uyitungidi e fulu kia sambidila nzambi aluvunu ye mabata vana ntanda* miawonso.
25 Ongeye otungidi mabata maku vana fulu kiatunda kia konso bala-bala. Okitwidi o vienga kwaku se lekwa kiangemi muna kaya e nitu aku* kwa konso muntu oviokanga,+ owokese mavangu maku ma zumba.+
26 Otele zumba yo wan’amakala a Engipito,+ e mfinangani zaku ana bena ye nsatu zasaka za vukana,* umfungisi o makasi muna ulolo wa mavangu maku ma zumba.
27 Owau, ilambula o koko kwame muna kutumba yo kulula e kunku kiaku kia madia.+ Ikuyekola kwa awana bekumenganga,+ o wan’amakento a Afelesetia, ana bafusuka e nsoni mu kuma kia mavangu maku mansoni.+
28 “‘Wau vo e nsatu zaku ke zafokoka ko, otele diaka e zumba yo wan’amakala Asuri.+ Kansi vava wata yau e zumba, e nsatu zaku ke zafokoka kaka ko.
29 Muna kuma kiaki, wawokesa mavangu maku ma zumba yamuna nsi ya akiti,* yamuna nsi ya Akaladi,+ kansi kana una vo i wau, e nsatu zaku ke zafokoka kaka ko.
30 O ntim’aku wayela kikilu wakala,’* u kavovele o Mfumu Yave, ‘vava wavanga mambu mama mawonso, nze nkembi* wakondwa e nsoni!+
31 Kansi vava watunga e fulu kiaku kia sambidila nzambi aluvunu vana fulu kiatunda kia konso bala-bala yo tunga e bata vana konso ntanda, kwakala nze nkembi* ko, kadi kwatondanga tambula mfutu ko.
32 Ongeye u nkento ona otanga e zumba, ona otambulanga e nzenza vana fulu kia tambula o yakala diandi!+
33 Akembi awonso futwa befutwanga,+ kansi ongeye, ofutanga awonso bekalanga ye nsatu zasaka za vukana yaku.+ Okubafutanga e nzimbu kimana beza kwa ngeye tuka muna fulu yawonso, wata yau e zumba.+
34 Ongeye waswaswana ye akembi* ankaka. Ke vena nkento ko ovanganga kinkembi nze ngeye! Ngeye ofutanga akaka, kansi oyau ke bekufutanga ko. E mpil’aku yaswaswana kikilu.’
35 “Muna kuma kiaki, e nkembi,+ wá e diambu dia Yave.
36 I wau wuwu kavovele o Mfumu Yave: ‘Wau vo e nsatu zaku za vukana zisakidi, e kimpene kiaku kisenzamene muna zumba kiaku ye makangu maku ye teke yaku yawonso yambi ye yangemi,*+ ina wakelela wan’aku se yimenga,+
37 ikutakesa makangu maku mawonso ana wamwesanga e kiese, awonso ana wazola ye awonso ana wamenga. Ikubakutakesa tuka muna fulu yawonso mu kunuanisa, isenzeka e kimpene kiaku kwa yau, oyau bemona e nitu aku yawonso.+
38 “‘Ikutumba wauna utumbilwanga akento asompwa betanga e zumba+ ye akento bebungulanga o menga,+ o menga maku mu makasi ye kimpala mebungulwilwa.+
39 Ikuyekola vana moko mau, oyau bewula e fulu yaku osambidilanga e nzambi zaluvunu yo bangula mabata maku;+ bekuvula e mvuatu miaku+ yo bonga e lekwa yaku yantoko+ yo senzeka e kimpene kiaku.
40 Bekutwasila ulolo wa wantu,+ oyau bekutuba matadi,+ bekuvondela muna nsosolo miau.+
41 Beyoka e nzo zaku muna tiya+ yo kufundisila vana meso m’akento ayingi; ifokola e kinkembi kiaku,+ ongeye kufuta diaka makangu maku ko.
42 Muna ngeye ifokolwela o makasi mame,+ e nsita zame zikatuka omu ngeye;+ mu luvuvamu ikala, kifunga diaka makasi ko.’
43 “‘Wau vo kusungamene lumbu yaku ya kileke ko+ ye umfungisi makasi muna vanga mambu mama mawonso, omono itwasa e mfwilu mia mavangu maku vana ntu aku,’ u kavovele o Mfumu Yave, ‘ongeye kukwamanana diaka muna mavangu maku mansoni ko ye muna mavangu maku mawonso mangemi.
44 “‘Wantu awonso betanga yingana, beta kingana eki mu kuma kiaku: “Owu wina o ngudi, i wina o mwana!”+
45 Ongeye wafwanana yo ngudi aku, ona wabembola o yakala yo wan’andi. Wafwanana mpe ye mpangi zaku zamakento, ana babembola akazi au yo wan’au. O ngudi aku Nkete kakala, o se diaku Nyamore.’”+
46 “‘O mbut’aku ankento i Samaria,+ ona ozingilanga kuna lumonso lwaku* yo wan’andi amakento;*+ o nleke aku ankento i Sodoma,+ ona ozingilanga kuna lunene lwaku* kumosi yo wan’andi amakento.+
47 Kwalanda kaka nzila zau ko ngatu mavangu mau mangemi, kansi muna kolo kiakete, wayifunzula muna mavangu maku mawonso lutila nkutu yau.+
48 E nkala ame kaka,’ u kavovele o Mfumu Yave: ‘O mpangi aku ankento Sodoma yo wan’andi amakento ke basidi vanga ko dina ongeye yo wan’aku amakento nuvangidi.
49 Owau i bi wa Sodoma wa mpangi aku ankento: oyandi yo wan’andi amakento+ akwa lulendo,+ bakala ye ulolo wa madia+ yo zingila mu luvuvamu;+ kansi ke basadisa mimbona mpasi ko ye asukami.+
50 Bakwamanana songa lulendo+ yo vanga mambu mangemi vana ntadisi ame,+ dianu yamwena vo mfwete kubafwasa.+
51 “‘Kana nkutu i Samaria,+ kavanga kana ndambu a masumu mana ovangidi ko. Ongeye ovangidi mambu mayingi mangemi lutila mpangi zaku zamakento, oyau bamonekene nkutu vo ansongi mu kuma kia mavangu maku mawonso mangemi. +
52 Owau zizidila e nsoni zaku, kadi olungisi mavangu ma mpangi zaku zamakento. Mu kuma kia sumu diaku, muna vanga mambu mangemi lutila nkutu yau, e mpangi zaku zisundidi o unsongi ke mu ngeye ko. Owau fusuka e nsoni, zizidila o luvezo wau ofididi e mpangi zaku zamakento mu monekena vo ansongi.’
53 “‘Ikutakesa abakami au: awana babakama muna Sodoma yo wan’au amakento, awana babakama muna Samaria yo wan’au amakento; ikutakesa mpe abakami aku kumosi yo yau,+
54 kimana wazizidila e nsoni zaku; nsoni ofusuka mu kuma kia dina ovangidi, wau vo ubafiaulwisi.
55 E mpangi zaku zamakento, Sodoma yo wan’andi amakento, bevutuka wauna bakala; e Samaria yo wan’andi amakento, bevutuka wauna bakala. Ongeye mpe yo wan’aku amakento nuvutuka wauna nuakala.+
56 Sodoma wa mpangi aku ankento kwafwana kunyika ko muna lumbu kina wakituka se nkwa lulendo,
57 vitila o bi waku wasenzekwa.+ Owau o wan’amakento a Suria ye mfinangani zau ngeye betontanga, o wan’amakento a Afelesetia,+ awonso ana bazungidi ngeye bevezanga.
58 Obak’e mfwilu mia mavangu maku mansoni ye mavangu maku mangemi,’ ukavovele o Yave.”
59 “I wau wuwu kavovele o Mfumu Yave: ‘Owau ivanga kwa ngeye wauna ovangidi,+ kadi ovezele ndofi muna kulula e kangu diame.+
60 Kansi, omono isungamena e kangu dina yakanga yo ngeye muna lumbu yaku ya kileke, isikidisa yaku e kangu diakwele mvu.+
61 Ongeye osungamena mavangu maku, ofusuka e nsoni+ vava otambula e mpangi zaku zamakento, awana bena vo mbuta zaku ye awana bena vo aleke aku, ikubavana kwa ngeye se wan’aku amakento, kansi ke mu kuma kia kangu yakanga yaku ko.’
62 “‘Mono kibeni isikidisa e kangu diame yo ngeye; ozaya wo vo mono i Yave.
63 Ozevo, vava iyambulwila masumu maku, kana una vo mavangu mayingi mambi ovangidi,+ osungamena yo mona e nsoni+ za ziula o nua mu kuma kia luvezo lwaku,’ u kavovele o Mfumu Yave.”
Mvovo vana yand'a lukaya
^ Yovo “saya kiame.”
^ Yovo “nkand’a takasi.”
^ Yovo “wafwana mu tambula fulu kia kimfumu.”
^ Yovo “E nkumbu aku iyantikidi.”
^ Yovo “nkento a ndumba.”
^ I sia vo, e teke ya wan’amakala.
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
^ Yanzala kiakutakenanga nkangu mu teka, sumba lekwa yo tela mambu.
^ Mvovo wa sina: “muna ziula malu maku.”
^ Mvovo wa sina: “mfinangani zaku akwa nsuni mianene.”
^ Mvovo wa sina: “nsi ya Kenani.”
^ Nanga, “Yafungila kikilu o makasi.”
^ Yovo “nkento a ndumba.”
^ Yovo “nkento a ndumba.”
^ Yovo “nkento a ndumba.”
^ O mvovo wa Kiyibere nanga ngwizani wina yo mvovo “doti,” usadilwanga se mvovo a luvezo.
^ Mvovo wa sina: “kuna sude aku.”
^ Nanga mavata makala muna ndambu uyikanga.
^ Mvovo wa sina: “kuna node aku.”
