Yezekele 11:1-25
11 O mwanda unzangwidi, undete kuna vitu dia este dia nzo a Yave, dina ditadidi kuna este.+ Vana nkotelo a vitu mbwene akala 25, vana kati kwau vakedi Yazaneya wa mwan’a Azu yo Pelateya wa mwan’a Benaya, akuluntu a nkangu.+
2 I bosi, Nzambi umpovese vo: “E mwan’a muntu, akala awaya yau besokanga o bi yo vana malongi mambi mu mbanza yayi.
3 Edi bevovanga vo: ‘Nga eyayi ke yau ko i ntangwa ya tunga zinzo e?+ E mbanza* i kinzu,*+ oyeto i mbizi.’
4 “Muna kuma kiaki, sakula mu kuma kiau. Sakula e mwan’a muntu.”+
5 I bosi, o mwand’a Yave wizidi omu mono,+ Nzambi umpovese vo: “Vova vo, ‘I wau wuwu kavovele o Yave: “E nzo a Isaele, dina nuvovele dialudi, nzeye dina nuyindulanga.
6 Wantu ayingi nuvondese mu mbanza yayi, nuzadisi e bala-bala zandi yo mavimbu.”’”+
7 “Ozevo, i wau wuwu kavovele o Mfumu Yave: ‘O mavimbu numwanganese muna mbanza i mbizi, e mbanza i kinzu.+ Kansi, oyeno katulwa nukatulwa mo.’”
8 “‘Wau vo nsosolo numwenanga o wonga,+ nsosolo ikunutwasila,’ u kavovele o Mfumu Yave.
9 ‘Omono ikunuvaikisa muna mbanza yo kunuyekola vana moko ma nzenza, tumba ikunutumba.+
10 Nubwila muna nsosolo.+ Ikunufundisila vana mwingilu a Isaele,+ nuzaya wo vo mono i Yave.+
11 E mbanza ke ikala se kinzu ko kwa yeno, oyeno mpe ke nukala se mbizi ko muna kinzu; ikunufundisila vana mwingilu a Isaele,
12 nuzaya wo vo mono i Yave. Kadi ke nudiatidi muna nsiku miame ko ngatu lunda e nzengo zame za mfundisa,+ kansi nulende nzengo za mfundisa za zula inuzungidi.’”+
13 Vava mbene sakula, vana vau o Pelateya wa mwan’a Benaya ofwidi, mbwidi mambukama yo kaza mu nding’angolo, oku vo: “Ekwe Mfumu Yave! Nga ofukisa emvimba e nsadisw’a Isaele?” +
14 E diambu dia Yave dizidi diaka kwa mono, oku vo:
15 “E mwan’a muntu, e mpangi zaku, e mpangi zaku ana bena yo nswa wa kûlwa, kumosi ye nzo yawonso ya Isaele, bavoveso kwa esi Yerusaleme vo: ‘Nuvavuka Yave. E nsi yeto; kwa yeto yavewa se vua.’
16 Muna kuma kiaki vova vo: ‘I wau wuwu kavovele o Mfumu Yave: “Kana una vo ibafididi kwandá muna zula yayingi yo kubamwanganesa mu nsi zayingi,+ ikituka se nzo avauka kwa yau mu fikolo muna nsi zina bele.”’+
17 “Muna kuma kiaki, vova vo: ‘I wau wuwu kavovele o Mfumu Yave: “Ikunukutakesa mpe tuka muna nkangu yo kunulunganesa tuka muna nsi zina numwanganene, ikunuvana e nsi a Isaele.+
18 Nuvutuka mo yo katula mo e lekwa yawonso yangemi ye mavangu mambi.+
19 Ikunuvana ntima mosi,+ isia mwand’ampa muna yeno;+ ikatula o ntim’a tadi muna nitu zeno+ yo kunuvana o ntim’a nsuni,*+
20 kimana nuadiatila muna nsiku miame yo lunda e nzengo zame za mfundisa yo lemvokela zo. Ozevo nukala nkangu ame, omono ikala Nzambi eno.”’
21 “‘“Kansi, vo i awana bena ye ntima mikubafilanga muna lekwa yangemi ye mavangu mambi, itwasa e mfwilu mia nzila zau vana ntu miau,” ukavovele o Mfumu Yave.’”
22 I bosi, akelubi bazangwidi mave mau, o tungungu tukedi vana ndambu au,+ o nkembo a Nzambi a Isaele ukedi vana ntandu au.+
23 O nkembo a Yave+ ukatukidi muna mbanza yo ningama vana ntandu a mongo wina kuna este ya mbanza.+
24 O mwanda unzangwidi—muna mona-meso kina yamona muna lusadisu lwa mwand’a Nzambi—yo kundata kwa nkangu wakala muna kinkole kuna Kaladi. I bosi, e mona-meso kina yamona kinkatukidi.
25 Yayantika samunuina o nkangu wakala muna kinkole o mambu mawonso mana Yave kansonga.
Mvovo vana yand'a lukaya
^ I sia vo, mbanz’a Yerusaleme, muna Ayuda bayindulanga vo bekadila mu lutaninu.
^ Yovo “kinzu kianene.”
^ I sia vo, ntima ulemvokelanga luludiku lwa Nzambi.
