Yesaya 46:1-13
46 O Bele ovumbamene,+ o Nebo oyenzamene.
E teke yau itensekelo vana ntandu a bulu, vana ntandu a bulu inatanga mazitu,+Nga funda kiazita vana ntandu a bulu iyoyele.
2 Bayenzamene yo vumbama kumosi;Ke belenda tanina mazitu* ko,Oyau kibeni bele muna kinkole.
3 “Nungwila, e nzo a Yakobo ye nsadiswa yawonso ya nzo a Isaele,+Oyeno ilunga-lunganga tuka nuawutukila, oyeno inatanga tuka muna vumu.+
4 Yavana nununa, kisoba ko;+Yavana nuvaikwa e nsuki zampembe, ikwamanana kununata.
Wauna ivanganga, ikununata yo kunulunga-lunga yo kunuvuluza.+
5 Yo nani nukumfwananisa yovo kuntezanesa,+Kimana twafwanana e?+
6 Vena ye awana besokomonanga e wolo una muna nkutu zau;Betezanga e zitu dia palata vana balanza.
Befutanga mvangi a lekwa ya sengwa, oyandi okitulanga yo se nzambi.+
I bosi befukamanga, elo, besambilanga yo.*+
7 Besianga e teke kiokio vana mavembo mau;+Benatanga kio yo sia kio vana fulu kiandi, i vana kaka kikalanga.
Ke kikatukanga vana fulu kiandi ko.+
Bekazanga kwa teke kiokio, kansi ke kivutulanga ko;Ke kilendi vuluza muntu ko muna mpasi.+
8 Nusungamena e diambu diadi, nukala yo unkabu.
Nusia dio mu ntima, oyeno akuludi a nsiku.
9 Nusungamena mambu mankulu* mana mavangama tuka kolo,Nusungamena vo mono i Nzambi, ke vena wankaka ko.
Mono i Nzambi, ke vena ona ofwanane yame ko.+
10 Tuka kuna lubantiku isamunanga e mbaninu,Tuka kuna nz’ankulu isamunanga o mambu ke mavangamene ko.+
Mpovele vo: ‘E nzengo zame* zisikila,+Ivanga konso dina nzolele.’+
11 Mbokele nuni ambaki tuka kuna kuvaikilanga e ntangwa,*+Mbokele muntu olunganisa e nzengo zame* tuka ku nsi ina kwandá.+
Mono mpovele dio, mvanga dio.
Mono nkanini dio, ilunganisa dio mpe.+
12 Nungwila, oyeno akwa ntima miabala,*Oyeno nuvavukidi o unsongi wame.
13 Ntwese unsongi wame o lukufi;Ke una wavavuka ko,O luvuluzu lwame ke luzingila ko.+
Itwasa luvuluzu muna Zione yo wete wame kwa Isaele.”+
Mvovo vana yand'a lukaya
^ I sia vo, e teke itensekelo vana ntandu a bulu.
^ Mvovo wa sina: “bevumbamenanga yo.”
^ Mvovo wa sina: “mantete.”
^ Yovo “kani diame; longi diame.”
^ Yovo “kuna este.”
^ Yovo “kani diame; longi diame.”
^ Mvovo wa sina: “mia kikesa.”
