Yesaya 36:1-22
36 Muna mvu una wa 14 wa luyalu lwa Kizekeya wa Ntinu, o Sankerebe wa ntinu a Asuri+ otombokele yo nuanisa e mbanza zawonso zangolo za Yuda yo kutumuna zo.+
2 I bosi, tuka kuna Lakisi,+ o ntinu a Asuri otumini Rabesake*+ kumosi yo makesa mayingi kenda kwa Kizekeya wa Ntinu kuna Yerusaleme. Bakiatamene vana mvuil’a utukanga kuna zinga kia ntandu,+ muna nzil’ampwena ya mpatu a nsukudi a mvuatu.+
3 Eleyakime+ wa mwan’a Kilekiya, ona wavitanga o ntu muna nzo,* yo Sebena+ wa nsoneki yo Yoake wa mwan’a Asafi wa nsoneki a lusansu, bavaikidi muna wanana yandi.
4 Rabesake ubavovese vo: “Dodokolo, nuzayisa kwa Kizekeya vo: ‘I wau wuwu kavovele o ntinu anene, o ntinu a Asuri: “Mu nki obundidi e vuvu?+
5 Ongeye ovovele vo: ‘Ngina ye ndekwa ye ngolo za nuana e vita,’ kansi emiami mvovo miankatu. Kwa nani obundidi e vuvu muna kunkolamena?+
6 Tala, ongeye obundidi e vuvu muna tûtu diadi diabosoka, i sia vo, Engipito, edi dikotanga yo tobola e kandazi kia muntu oyekamene dio. I una kena o Faro wa ntinu a Engipito kwa awonso bekumbundanga e vuvu.+
7 Avo umpovese vo: ‘Muna Yave wa Nzambi eto tubundidi e vuvu,’ nga o Kizekeya kabangula mabata mandi ko ye maziku mandi+ yo vovesa Yuda ye Yerusaleme vo: ‘Ova ntadisi a ziku diadi nufwete vumbamena e’?”’+
8 Owau, dodokolo vana e nsimbi yayi kwa mfumu ame wa ntinu a Asuri:+ Ikuvana 2.000 ma mvalu, tutala kana vo olenda solola wantu afwana mu diatisa mio.
9 Ozevo, aweyi osundila kana nkutu nguvulu mosi ona osundidi o keva vana vena e ntaudi za mfumu ame, wau obundidi e vuvu muna Engipito mu vua makalu ma vita ye akwa mvalu?
10 Owau, nga ke mu lutumu lwa Yave ko ntombokele mu nsi yayi kimana yafwasa yo e? Yandi kibeni Yave umpovese vo: ‘Tomboka wanuanisa e nsi yayi yo fwasa yo.’”
11 Muna kuma kiaki, Eleyakime yo Sebena+ yo Yoake bavovese Rabesake vo:+ “Dodokolo, vovesela e ntaudi zaku muna nding’a Ki-aramiti,*+ kadi bakula kweto tubakula yo; kutuvovesela mu nding’a Ayuda ko, kadi o nkangu una vana yaka mu wá bena.”+
12 Kansi, o Rabesake ovutwidi vo: “Nga o mfumu ame kwa mfumu eno ye kwa yeno kaka kantumini yavova mambu mama? Nga ke kwa nkangu mpe ko una ufongele vana yaka, una udia e doti diau yo nua masuba mau kumosi yo yeno e?”
13 I bosi, Rabesake otelamene, okazidi muna nding’a Ayuda,+ oku vo: “Nuwá e mvovo mia ntinu anene, o ntinu a Asuri.+
14 I wau wuwu kavovele o ntinu: ‘Ke nuyambula ko vo Kizekeya kanuvuna, kadi kalendi kunuvuluza ko.+
15 Ke nuyambula ko vo Kizekeya kanufila nuabunda e vuvu muna Yave,+ oku vo: “O Yave vuluza kikilu kekutuvuluza, e mbanza yayi ke iyekolwa vana moko ma ntinu a Asuri ko.”
16 Ke nuwila Kizekeya ko, kadi i wau wuwu kavovele o ntinu a Asuri: “Nuvanga yame luvuvamu, nuyitambika,* konso muntu muna yeno odia e bundu ya nsing’andi a vinyu ye bundu ya nsand’andi yo nua maza ma sima kiandi,
17 yavana ikwiza, yanunata kuna nsi yafwanana ye nsi eno, nsi yazala ye witi ye bale ye uva kimana nuavanga e mbolo ye vinyu.+
18 Ke nuyambula ko vo Kizekeya kanuvuna, oku vo: ‘Yave okutuvuluza.’ Nga vena ye mosi muna nzambi za zula ona wavuluza e nsi andi vana moko ma ntinu a Asuri?+
19 Akweyi zina e nzambi za Kamati ye Ampadi?+ Akweyi zina e nzambi za Sefavayime?+ Nga nzambi zazi zavuluza e Samaria ova moko mame?+
20 Muna nzambi zawonso za nsi zazi, nkia nzambi yavuluza e nsi andi ova moko mame? Nga o Yave olenda vuluza e Yerusaleme ova moko mame?”’”+
21 Kansi, oyau bakedi kaka e pi-i, ke bamvutwidi kana diambu dimosi ko, kadi o ntinu wakanikina vo: “Ke numvani mvutu ko.”+
22 Kansi, Eleyakime wa mwan’a Kilekiya, ona wavitanga o ntu muna nzo,* yo Sebena+ wa nsoneki yo Yoake wa mwan’a Asafi wa nsoneki a lusansu, bele kwa Kizekeya ye mvuatu miau miatiazuka, banzayisi e mvovo mia Rabesake.
Mvovo vana yand'a lukaya
^ Yovo “mfidi wa atambiki a mbungwa.”
^ Yovo “lûmbu lwa ntinu.”
^ Yovo “Kisuria.”
^ Mvovo wa sina: “Nusambulwa yame, nuiza kwa mono.”
^ Yovo “lûmbu lwa ntinu.”
