Tuku 49:1-33
49 Yakobo obokele wan’andi yo kubavovesa vo: “Nulungalakana yanuzayisa mana mekunubwila muna lumbu yambaninu.
2 Nukutakana nuawá, e wan’a Yakobo, elo, nuwá Isaele wa se dieno.
3 “E Rubeni,+ ngeye u mwan’ame antete,+ u ngolo zame ye lubantiku lwa nkum’ame a kiyakala, ngeye osundidi o zitu ye ngeye osundidi e ngolo.
4 Wakondwa volo nze maza menikukanga mu ngolo, kukala nkwa tunda ko, kadi wamanta vana mfulu a se diaku.+ Muna ntangwa yayina, wasafula e mfulu ame. Oyandi wamanta vo kikilu!
5 “O Simeone yo Levi, wan’a ngudi mosi.+ Besadilanga e nsosolo miau mu mavangu mansoki.+
6 E moyo* ame, kukoti mu buka kiau ko. E ntim’ame,* kukoti mu buka kiau ko, kadi muna makasi mau bavondele wantu,+ bazengele mianzi mia nima kulu mia ngombe kuna lukanu.
7 Makasi mau masibilu, kadi mansoki, e nganzi zau, kadi zakondwa e nkenda.+ Ikubamwanganesa muna zunga kia Yakobo, ikubamwanganesa muna Isaele.+
8 “Vo i ngeye, e Yuda,+ mpangi zaku bekukembelela.+ O koko kwaku kukala muna nsingu a mbeni zaku.+ O wan’a se diaku bekuvumbamena.+
9 O Yuda mwan’a nkosi.+ E mwan’ame, ongeye otomboka vava odia e bulu obakidi. Oyandi obubamanga yo kuyinana nga nkosi, nga nkosi, nani okabuka kunsikamesa?
10 E mvuala ke ikatuka muna Yuda ko,+ ngatu nkau a kimfumu vana kati kwa malu mandi, yavana kikwiza Silo,*+ ona wantu awonso belemvokela.+
11 Okangidila e buluku diandi muna nsing’a vinyu yo mwan’andi a buluku muna nsing’a vinyu wambote, osukula mvuatu andi muna vinyu ye yunga kiandi muna menga ma uva.
12 O meso mandi mambwaki yafufukila mu kuma kia vinyu, o meno mandi mampembe mu kuma kia kimvumina.
13 “O Zebulune+ ozingila muna nlambu a mbu, muna muningamenanga e nzaza,+ o mwingilu andi ulwaka yakuna Sidone.+
14 “O Yisakare+ buluku dia visi yangolo, dibubamene vana kati kwa funda yole yazita.*
15 Omona vo e fulu kiandi kiavundila kiambote, o ntoto mpe wambote-mbote. Ovueteka e vembo diandi mu nata mazitu, osadiswa salu yangolo.
16 “O Dani+ una vo dimosi muna makanda ma Isaele,+ ofundisa nkangu andi.
17 Yambula Dani kakala se nioka vana ndambu a nzila, mpidi vana ndambu a nzila, ona otatikanga e kole dia mvalu kimana o nkwa mvalu kabwa mambemba.+
18 E Yave, ivingila luvuluzu lutuka kwa ngeye.
19 “Vo i Ngadi,+ buka kia asanzi kikunuanisa, kansi oyandi okubakulanesa yo lakama e bombo yau.+
20 “O madia* ma Asere+ mayingi* mekala, ovata madia mambote meyangalelwa kwa ntinu.+
21 “O Nafetali+ nkayi. Ovovanga mvovo miambote.+
22 “O Yosefe+ i tayi kia nti uyimanga e mbongo, nti uyimanga e mbongo una vana ndambu a nto a maza, e ntayi zandi zilwakanga vana ntandu a yaka.
23 Kansi, akwa nzanza bakwamanene kumwesa e mpasi, banóngene, bakwamanene kulundila e kunda.+
24 Kansi, o mfumba andi ukedi kaka vana fulu kiau kimosi,+ o moko mandi makedi kaka e ngolo ye zabu-zabu.+ Ediadi va moko ma nengolo a Yakobo ditukidi, kwa mvungudi, wa tadi dia Isaele.
25 Oyandi* i lukau lwatuka kwa Nzambi a se diaku, o Nzambi okusadisa, o Mpungu-ngolo una yandi, okusambula ye nsambu za ntandu kuna zulu, ye nsambu za ntoto muna nsi,+ okusambula yo ulolo wa wana yo makambi.
26 E nsambu za se diaku zisunda e nsambu za miongo miakwele mvu, zisunda e lekwa yambote ya miongo miakwele mvu.+ Zikwamanana kala vana ntu a Yosefe, vana mband’a ntu a ndiona wasolwa vana vena e mpangi zandi.+
27 “O Benyamini+ okwamanana tiazuna e bulu kabakidi nze dievua.*+ Muna mene odia e bulu kabakidi, muna nkokela okayana e sanzu.”+
28 Awonso awaya i makanda 12 ma Isaele. I wau wuwu kabavovese o se diau vava kabasambwidi. Ovene kwa konso muntu muna yau e nsambu zimfwanukini.+
29 I bosi, ubakanikini vo: “Lufwa lwame lufinamene. Muna kuma kiaki, nunzika vamosi yo mase mame+ muna nduka una muna mpatu ya Eferone wa Nkete,+
30 o nduka wina muna mpatu a Makepela, ina mantalani ye Mamere muna nsi ya Kenani, e mpatu ina Abarayama kasumba kwa Eferone wa Nkete yakala se ziami kia kuvuila.
31 I kûna bazikila Abarayama yo Sara wa nkaz’andi.+ I kûna bazikila Isaki+ yo Rebeka wa nkaz’andi, i kûna yazikila Lea.
32 E mpatu yo nduka una mo kwa wan’a Kete+ yasumbilwa.”
33 Muna mpila yayi, Yakobo omene vana luludiku kwa wan’andi. I bosi, okonkele malu mandi vana mfulu, ofwidi yo zikwa wauna wazikilwa akulu andi.*+
Mvovo vana yand'a lukaya
^ Tala Nsas’a Mvovo.
^ Yovo “zitu wame.”
^ Ina ye nsasa vo: “Ndiona Ovuidi Kio.”
^ I sia vo, funda ina vana buluku.
^ Mvovo wa sina: “mbolo.”
^ Mvovo wa sina: “ma mazi.”
^ I sia vo, Yosefe.
^ Yovo “mbulu.”
^ Mvovo wa sina: “oyikakeso yo nkangu andi.”
