Tuku 25:1-34
25 Abarayama obongele diaka nkento ankaka, e nkumbu andi Ketura.
2 Kuna kwalanda, wanwutila Zimerane, Yokesane, Medane, Midiani,+ Yisebake yo Sua.+
3 Yokesane owutidi Seba yo Dedane.
Muna Dedane mwawutukila: Anesurami, Aneletusi ye Aneyalumi.
4 O wan’a Midiani: Efa, Efe, Kanoke, Abida yo Eleda.
Awonso awaya i wan’a Ketura.
5 Kuna kwalanda, Abarayama ovene Isaki+ yawonso kakala yau,
6 kansi kuna kwa wan’andi kawuta ye makangu, Abarayama ubavene tukau. I bosi, ekolo kakala o moyo, ubasindikidi kuna este, kwandá yo mwan’andi Isaki,+ kuna nsi ya Este.
7 Abarayama mvu 175 kazinga.
8 I bosi, Abarayama ofwidi muna ununu wambote, onunini ye zingu kiakiese, ozikilu wauna wazikilwa akulu andi.*
9 O wan’andi Isaki yo Yisemaele banzikidi muna nduk’a Makepela, muna mpatu ya Eferone wa mwan’a Soka, wa kanda dia Kete, eyi ina mantalani ye Mamere,+
10 e mpatu ina Abarayama kasumba kwa wan’a Kete. I mûna Abarayama kazikwa kumosi yo nkaz’andi Sara.+
11 Vava Abarayama kafwa, Nzambi wakwamanana sambula Isaki wa mwan’andi. Isaki+ wazingilanga lukufi ye Bela-kairoi.+
12 Lwalu i lusansu lwa Yisemaele+ wa mwan’a Abarayama ona Anga+ wa musi Engipito, wa ntaudi a Sara kawutila Abarayama.
13 Ezazi i nkumbu za wan’a Yisemaele, basonekwa muna nkumbu zau, mun’owu wa tuvila twau: O mwan’antete a Yisemaele i Nebayote,+ i bosi Keda,+ Adebele, Mibesame,+
14 Misema, Duma, Masa,
15 Kadadi, Tema, Yetule, Nafisi yo Kedema.
16 Awaya i wan’a Yisemaele, ezazi i nkumbu zau mun’owu wa mavata mau mana bazingilanga ye fulu ina bazingilanga muna saba,* mfumu 12 mun’owu wa makanda mau.+
17 Yisemaele mvu 137 kazinga. I bosi, ofwidi yo zikwa wauna wazikilwa akulu andi.*
18 Wan’andi bazingilanga tuka kuna Kavila,+ lukufi ye Sure,+ eyi ina lukufi ye Engipito, yakuna Asuri. Bazingilanga mantalani ye mpangi zau zawonso.+
19 Lwalu i lusansu lwa Isaki wa mwan’a Abarayama.+
Abarayama owutidi Isaki.
20 Isaki mvu 40 kakala miau vava kasompa Rebeka, wa mwan’a Betwele+ wa musi Arami ya Padani-arami, wa nsang’a Labani wa musi Arami.
21 Isaki wadodokelanga Yave mu kuma kia nkaz’andi, kadi sita kakala; muna kuma kiaki, Yave owidi e ndodokela zandi, o nkaz’andi Rebeka oyimiti.
22 O wana bakala muna vumu kiandi bayantikidi nuana,+ muna diadi ovovele vo: “Avo i wau, ekuma mfwete kwamanena zinga?” Rebeka oyuvuidi Yave.
23 Yave ovovese Rebeka vo: “Zula yole ina omu vumu kiaku,+ makanda mole mevaika omu vumu kiaku;+ zula kimosi kisunda zula kiankaka o nkuma,+ ona wambuta osadila ona wanleke.”+
24 E ntangw’a wuta vava yafwana, kinga mapasa makala muna vumu kiandi.
25 Ona wantete ovaikidi, yandi awonso wa mbwaki, e nitu andi yawonso ikedi nze mvuatu a mika,+ i dianu bamvanini e nkumbu Esau.*+
26 I bosi, nleke andi ovaikidi, o koko kwandi kusimbinini e bombo kia Esau,+ bamvene nkumbu Yakobo.*+ Isaki mvu 60 kakala miau vava kabawuta.
27 Aleke bakudidi, Esau okitukidi nkongo ambote,+ mu nkonda kaka kayendanga, vo i Yakobo munkondwa lusembo kakala, wananginanga muna saba.+
28 Isaki wazolanga Esau mu diambu dia mbizi kantwasilanga, vo i Rebeka wazolanga Yakobo.+
29 Lumbu kimosi, Yakobo supu kalambanga vava Esau katuka muna nkonda wayoya.
30 Esau ovovese Yakobo vo: “Dodokolo, umpana-mpana fisupu fiambwaki una fiau,* kadi mfwidi e mfune!”* Ikuma kayikilwa vo Edome.* +
31 Muna diadi, Yakobo ovovele vo: “Entete untekela e kimbuta kiaku!”+
32 Esau okwamanene vova vo: “Tala, mu fwa se ngina! E kimbuta nkia mfunu diaka kina kwa mono?”
33 Yakobo okudikidi vo: “Dia ntete e ndofi!” Odidi e ndofi, otekele kimbuta kiandi kwa Yakobo.+
34 I bosi, Yakobo ovene Esau e mbolo ye fisupu fiambwaki, odidi yo nua, otelamene wele kwandi. Muna mpila yayi, Esau ovezele kimbuta* kiandi.
Mvovo vana yand'a lukaya
^ Mvovo wa sina: “oyikakeso yo nkangu andi.”
^ Yovo “nzo za saba zazungwa e yaka.”
^ Mvovo wa sina: “oyikakeso yo nkangu andi.”
^ Ina ye nsasa vo: “Nkwa Mika.”
^ Ina ye nsasa vo: “Nsimbi a Bombo; Nsundi.”
^ Mvovo wa sina: “e mbwaki, e mbwaki yoyo.”
^ Mvovo wa sina: “kadi yayoya ngina.”
^ Ina ye nsasa vo: “Mbwaki.”
^ Mvovo wa sina: “nswa wa kimwan’antete.”
