Kuna kwa Esi Roma 5:1-21
5 Dianu vo, wau tubadikilu vo tu ansongi mu kuma kia lukwikilu,+ yambula twakala mu luvuvamu* yo Nzambi muna Yesu Kristu wa Mfumu eto,+
2 ona twinina yo nswa wa finama Nzambi muna lukwikilu, kimana twatambula nsambu zina tutelamene owau;+ twayangalala mu kuma kia vuvu kia tambula nkembo a Nzambi.
3 Ke wau kaka ko, kansi yambula mpe twayangalala muna mpasi,+ kadi tuzeye wo vo e mpasi i zitwasa luzindalalu;+
4 o luzindalalu lutwasa e dienga dia Nzambi;+ e dienga dia Nzambi ditwasa e vuvu,+
5 e vuvu ke kifusulwisanga muntu nsoni ko;+ e kuma kadi o zola kwa Nzambi kwazadiswa muna ntima mieto muna mwand’avelela, una twavewa.+
6 Kadi, vava twakala twatovoka,+ Kristu wafwa muna wete dia yimpumbulu muna ntangwa yasikidiswa.
7 Diampasi kwa muntu kafwa muna wete dia muntu ansongi; kansi muna kuma kia muntu ambote, valenda kala nkwa unkabu ofwa muna wete diandi.
8 Kansi Nzambi mu mpila yayi katusongela o zola kwandi: Kristu wafwa muna wete dieto ekolo twakala asumuki.+
9 Vana ntandu, wau tubadikilu vo tu ansongi muna menga mandi,+ muna yandi mpe tuvuluzilwa muna makasi ma Nzambi.+
10 Kadi vava twakala atantu, e ngwizani eto yo Nzambi yavutulwiswa muna lufwa lwa Mwan’andi,+ owau tuna ye ziku vo tuvuluzilwa muna moyo andi, kadi e ngwizani eto yavutulwiswa.
11 Ke diadi kaka ko, kansi tuyangalelanga mpe muna Nzambi muna Mfumu eto Yesu Kristu, muna yandi owau e ngwizani eto yo Nzambi yavutulwiswa.+
12 I kuma vo, wauna e sumu diakotela ova nza muna muntu mosi, o lufwa mpe muna sumu,+ i nsayana lwasayana o lufwa kwa wantu awonso, e kuma kadi awonso basumuka+—.
13 Kadi una ke kiaveno o Nsiku ko, e sumu diakikadila ova nza, kansi e sumu ke diatumbwanga ko, kadi ke vakala nsiku ko.+
14 Lufwa lwayala nze ntinu tuka muna Adami yamuna Mose, kana nkutu kw’awana balembi sumuka wauna Adami kasumukina, ona wina vo i fwaniswa kia ndiona okwiza.+
15 Kansi, e nluta mia lukau lwa Nzambi miaswaswana ye mia sumu. Kadi muna sumu dia muntu mosi ndonga yafwa. Kansi, ndonga yavua nluta mia lukau kavana o Nzambi ye mu kuma kia nkenda zandi. Muna nkenda za Yesu Kristu,+ o Nzambi i kavanina lukau lolo kwa wantu awonso.+
16 Vana ntandu, dina diayizila muna lukau lwangovo diaswaswana ye dina diayizila muna sumu dia muntu mosi.+ Kadi e sumu dia muntu mosi diatwasa ngielele kwa wantu awonso,+ kansi o lukau lwangovo luna lwayiza mu kuma kia masumu mayingi lwafila ndonga mu badikilwa vo ansongi.+
17 Wau vo muna sumu dia muntu mosi, o lufwa lwayala se ntinu muna nzil’a muntu ndioyo,+ awana betambula ulolo wa nsambu yo lukau lwa nsongi,+ bezinga yo yala se atinu+ muna muntu mosi, Yesu Kristu!+
18 Ozevo, wau vo muna sumu dimosi, wantu a mpila zawonso bayeleswa,+ diau dimosi mpe muna vangu dimosi diansongi wantu a mpila zawonso+ belungisilwa muna vua o moyo.+
19 Kadi wau vo muna ukolami wa muntu mosi, ndonga yakitulwa se asumuki,+ diau dimosi mpe muna nlemvo wa muntu mosi, ndonga bekitulwa se ansongi.+
20 O Nsiku wasiwa kimana e sumu diawokela.+ Kansi vana vawokelela e sumu, e nkenda za Nzambi mpe i vana zawokelela.
21 Ekuma? E kuma kadi, wauna e sumu yo lufwa+ lwayadila se ntinu, i una mpe e nsambu za Nzambi ziyadila muna unsongi kimana zatwasa moyo a mvu ya mvu muna Yesu Kristu wa Mfumu eto.+
Mvovo vana yand'a lukaya
^ Nanga, “tuna mu luvuvamu.”
