Nsiku 27:1-26
27 I bosi, Mose kumosi ye akuluntu a Isaele bakanikini nkangu vo: “Nulemvokela e nkanikinu miawonso ikunukanikinanga o unu.
2 Muna lumbu kina nusauka e Yodani mu kota muna nsi ina Yave wa Nzambi aku kekuvana, tongeka matadi mampwena yo lenga mo e nteke.*+
3 I bosi, vava osauka e Yodani, soneka mo e mvovo miawonso mia Nsiku wau, kimana wakota muna nsi ina Yave wa Nzambi aku kekuvana, e nsi ifwamfumukanga kimvumina yo wiki, wauna o Yave wa Nzambi a akulu aku kasila o nsilu.+
4 Vava nusauka Yodani, nufwete tongeka matadi momo vana Mongo a Ebale+ yo lenga mo e nteke,* wauna ikukanikinanga o unu.
5 Tunga vo mpe ziku mu kuma kia Yave wa Nzambi aku, ziku dia matadi. Kufwete sadila sengwa ko muna matadi momo.+
6 Ofwete tungila e ziku dia Yave wa Nzambi aku muna matadi mamvimba, i vana otambikila tukau twangioka kwa Yave wa Nzambi aku.
7 Ofwete kela yimenga ya ungudi+ yo dila yo vavana,+ ongeye oyangalala vana ntadisi a Yave wa Nzambi aku.+
8 Toma soneka muna matadi e mvovo miawonso mia Nsiku wau.”+
9 I bosi, Mose ye anganga Anelevi bavovese Isaele yawonso vo: “Kala e pi-i, wá, e Isaele. O unu kiaki okitukidi se nkangu a Yave wa Nzambi aku.+
10 Ofwete wila e nding’a Yave wa Nzambi aku yo lunda e nkanikinu miandi+ ye nsiku miandi emi ikukanikinanga o unu.”
11 Muna lumbu kiakina, Mose okanikini nkangu, oku vo:
12 “Omama i makanda metelama vana Mongo a Ngerezime+ mu sambula o nkangu vava nusauka Yodani: Simeone, Levi, Yuda, Yisakare, Yosefe ye Benyamini.
13 Omama i makanda metelama vana Mongo a Ebale+ mu yika e sibu: Rubeni, Ngadi, Asere, Zebulune, Dani ye Nafetali.
14 Anelevi bevova mu nding’angolo kwa nkangu awonso wa Isaele, oku vo:+
15 “‘Wasibwa o muntu ovanga teke kiavalwa+ yovo teke kia sengwa*+ yo muntu osweka yo, kadi lekwa kiangemi kuna kwa Yave,+ salu kia moko ma nkwa umbangu.’* (O nkangu awonso uvova vo: ‘Amen!’*)
16 “‘Wasibwa o muntu oveza se diandi yovo ngudi andi.’+ (O nkangu awonso uvova vo: ‘Amen!’)
17 “‘Wasibwa o muntu osientola mwingilu a mfinangani andi.’+ (O nkangu awonso uvova vo: ‘Amen!’)
18 “‘Wasibwa o muntu ovidisa mpofo e nzila.’+ (O nkangu awonso uvova vo: ‘Amen!’)
19 “‘Wasibwa o muntu obendomona o mfundu+ a nzenza, a mwana wakondwa se yovo wa nkento wafwilwa yakala.’+ (O nkangu awonso uvova vo: ‘Amen!’)
20 “‘Wasibwa o muntu ovukana yo nkento a se diandi, kadi se diandi kakondele luzitu.’*+ (O nkangu awonso uvova vo: ‘Amen!’)
21 “‘Wasibwa o muntu ovukana ye konso bulu.’+ (O nkangu awonso uvova vo: ‘Amen!’)
22 “‘Wasibwa o muntu ovukana yo nsang’andi, i sia vo, mwan’ankento a se diandi yovo mwan’ankento a ngudi andi.’+ (O nkangu awonso uvova vo: ‘Amen!’)
23 “‘Wasibwa o muntu ovukana yo ngudi andi anzitu.’+ (O nkangu awonso uvova vo: ‘Amen!’)
24 “‘Wasibwa o muntu ovingila nkwandi kuna nsweki yo kuvonda.’+ (O nkangu awonso uvova vo: ‘Amen!’)
25 “‘Wasibwa o muntu otonda mbabu kimana kavonda munkondwa-kuma.’+ (O nkangu awonso uvova vo: ‘Amen!’)
26 “‘Wasibwa o muntu ke lunda mambu ma Nsiku wau ko muna lembi mo lemvokela.’+ (O nkangu awonso uvova vo: ‘Amen!’)
Mvovo vana yand'a lukaya
^ Yovo “kusa mo e mpemba.”
^ Yovo “kusa mo e mpemba.”
^ Yovo “Yambula diakala wowo!”
^ Yovo “muntu osalanga salu ya mabaya ye sengwa.”
^ Yovo “teke yazunzwa.”
^ Mvovo wa sina: “kadi mvuatu a se diandi kafukwidi.”
