Nsiku 25:1-19
25 “Avo ntantani zibundumukini vana vena akala wole, bafwete kuyisunzula kwa afundisi;+ oyau bekubafundisa yo lungisa ona wina ye ndungidi yo yelesa ona wina ye ngielele.+
2 Ndiona wina ye ngielele avo zwabulwa kafwanukini,+ o mfundisi okumbubika vana ntoto, ozwabulwa vana ntadisi a mfundisi. O lutangu lwa nzwabulwa kezwabulwa lukala mun’owu wa tezo kia mbi kavangidi.
3 Oyau balenda kunzwabula nkumbu 40,+ kansi kuviokesa kana imosi ko. Avo okwamanene kunzwabula nzwabula ziviokele zazi, o mpangi aku nsoni kefusuka ova meso maku.
4 “Kukaki nu’a ngombe ko ekolo ibundanga e mbwaza.+
5 “Avo ampangi bezinganga vamosi, omosi muna yau kafwa lembi wuta mwana, o nkento a mvumbi kafwete sompwa kwa yakala dia vumu kiankaka ko. O nkwezi andi kafwete kwenda kwa yandi yo kumbonga se nkento andi, kavanga yandi longo lwa kinkwezi.+
6 O mwan’antete kewuta o nkento kafwete nata e nkumbu a yakala ona wafwa,+ kimana e nkumbu a mvumbi yalembi vunzunua muna Isaele.+
7 “Avo yakala diodio kazolele sompana yo nkwezi andi ko, o nkwezi kafwete kwenda kwa akuluntu kuna vitu dia mbanza yo vova vo: ‘O mpangi a nkaz’ame kazolele ko vo e nkumbu a mpangi andi yakwamanana omu Isaele. Kazolele vanga yame longo lwa kinkwezi ko.’
8 Akuluntu a mbanz’andi bafwete kumbokela yo mokena yandi. Oyandi avo okwamanene vova vo: ‘Kizolele sompana yandi ko,’
9 ozevo, o nkwezi andi okumfinama vana vena akuluntu, okatula e nsampatu muna malu mandi,+ okuntaulwila mete vana lose yo vova vo: ‘I wau wuwu ufwete vangwa kwa muntu kazolele wutila mpangi andi mwana ko.’
10 I bosi, e nkumbu a nzo andi* iyikilwa muna Isaele vo: ‘Nzo ya ndiona wakatulwa e nsampatu.’
11 “Avo akala wole benuananga, o nkento a mosi muna yau kayisia muna nkindu yoyo mu tanina yakala diandi vana moko ma ndiona okunwandanga, kalambula o koko kwandi yo simba kiyakala kiandi,
12 ofwete zenga o koko kwa nkento. Ongeye kufwete* kumfwila nkenda ko.
13 “Kufwete kala ye tezelo yole ya matadi yaswaswana ko muna nkutu aku,+ kimosi kianene ye kimosi kiakete.
14 Muna nzo aku kufwete kala ye nzongo miole miaswaswana ko,*+ nzongo mosi wanene ye umosi wakete.
15 Ofwete kalanga ye tezelo kia ziku ye kia nsongi yo nzongo a ziku ye wansongi, kimana wazinga lumbu yayingi muna nsi ina Yave wa Nzambi aku kekuvana.+
16 Kadi konso muntu wakondwa unsongi ovanganga mambu mama, wangemi kuna kwa Yave wa Nzambi aku.+
17 “Sungamena dina Amaleke kavanga kwa ngeye muna nzila vava nuavaika muna Engipito,+
18 una kawananena yaku muna nzila yo nuanisa awonso balandanga kuna nima vava wakala wayoya yo tovoka. Kamona wonga wa Nzambi ko.
19 Vava Yave wa Nzambi aku kekuvana e vundu vana vena e mbeni zaku zawonso zizungidi muna nsi ina Yave wa Nzambi aku kekuvana se vua,+ ofwete fukisa Amaleke, kimana kalembi sungamenua diaka oku nsi a zulu.+ Kufwete vilakana ko.
Mvovo vana yand'a lukaya
^ Mvovo wa sina: “e nkumbu andi.”
^ Mvovo wa sina: “E disu diaku ke difwete.”
