Mavangu ma Zintumwa 6:1-15
6 Muna lumbu yayina, vava alongoki bawokelanga, Ayuda ana bavovanga Kingerekia bayidimini Ayuda bavovanga Kiyibere, e kuma kadi akento au ana bafwilwa akala ke basiwanga sungididi ko muna madia makayuanga konso lumbu.+
2 Muna kuma kiaki, yau Kumi ye Zole babokele ndonga y’alongoki, bavovele vo: “Ke diambote ko kwa yeto twayambula e diambu dia Nzambi twakaya madia vana meza.+
3 Dianu vo ampangi, nusola akala nsambwadi akwa zitu*+ vovo nuina, bazele yo mwanda ye ngangu,+ twabavana e salu kiaki kiamfunu;+
4 kansi oyeto kibeni tukuyivana emvimba muna sambu yo longa e diambu dia Nzambi.”
5 Dina bavovele diyangidikidi e ndonga yawonso, basolele Setefano, wazala ye lukwikilu yo mwand’avelela, kumosi yo Filipo,+ Prokoro, Nikano, Timone, Pamena yo Nikolao, wa munkwikila-kiyuda wa musi Antiokia.
6 Babatwese kwa antumwa, vava basambidi, babatensekele moko.+
7 I bosi, e diambu dia Nzambi dikwamanene sayana,+ o lutangu lwa alongoki luwokele kikilu+ muna Yerusaleme; nganga zayingi za Nzambi ziyantikidi kituka se minkwikizi.+
8 Setefano ona wina* ye dienga dia Nzambi yo nkuma, ovangidi masivi ye sinsu vana vena nkangu.
9 Kansi akaka ana bayikilwanga vo esi Sambilu dia Avevoki bezidi kumosi y’esi Kurene, Alesanderia ye ankaka batukidi kuna Kilikia ye Asia, bafidisi Setefano e mpaka.
10 Kansi ke balendele kunsunda ko, kadi wakala ye ngangu zayingi ye lusadisu lwa mwand’avelela.+
11 I bosi, kuna sweki bele leba wantu mu vova vo: “Tunwidi wau ketiangunanga Mose yo Nzambi.”
12 Bakomekene nkangu ye akuluntu ye asoneki, bezidi kwa yandi kuna kinsalukisa, bambakidi muna ngolo, banète kuna Mbazi a Nkanu.*
13 Bavaikisi mbangi zaluvunu, ana bavovele vo: “O muntu ndioyo ke yambulanga vovela mbi ko muna fulu kiaki kiavauka ye Nsiku.
14 Muna bonga e nona, tunwidi vava kavovele vo Yesu wa musi Nazarete obangula e fulu kiaki yo soba nkanikinu mina Mose katuvana.”
15 Awonso ana bavuende muna Mbazi a Nkanu* bantungunuini, bamwene vo ndose andi yakala nze ndose a mbasi.
Mvovo vana yand'a lukaya
^ Yovo “akala nsambwadi ana besilwanga umbangi wambote.”
^ Mvovo wa sina: “ozele.”
^ Mvovo wa sina: “Sanedina.” Tala Nsas’a Mvovo.
^ Mvovo wa sina: “Sanedina.” Tala Nsas’a Mvovo.
