Mavangu ma Zintumwa 16:1-40
16 Paulu olweke mpe muna Delebe ye muna Luseta.+ Mwakala nlongoki mosi nkumbu andi Timoteo,+ mwan’a Nyuda mosi ankento, wa munkwikizi, kansi o se diandi Mungerekia,
2 kimbangi kiambote kasilwanga kw’ampangi muna Luseta ye Ikonio.
3 Paulu osongele luzolo lwa nata Timoteo, umbongele, unzengese mu kuma kia Ayuda ana bakala muna fulu yayina,+ kadi awonso bazaya wo vo se diandi Mungerekia.
4 Ekolo baviokelanga muna mavata, babazayisanga vo balunda e nkanikinu mina antumwa ye akuluntu babakila e nzengo muna Yerusaleme.+
5 E nkutakani zisikidi muna lukwikilu, o lutangu lwawokelanga lumbu ke lumbu.
6 Baviokele muna Ferungia ye Ngalatia,+ kadi basimwa kwa mwand’avelela balembi samuna e diambu dia Nzambi muna mvivu a Asia.
7 I bosi, vava bakulumuka kuna Musia, bavavidi okwenda kuna Bitunia,+ kansi o mwand’a Yesu ubasimini.
8 Dianu vo, baviokele muna Musia, bakulumukini kuna Teroa.
9 Muna fuku, Paulu omwene mona-meso—musi Makedonia otelamene vana kakala, undodokele, oku vo: “Sauka oku Makedonia, watusadisa.”
10 Vava kamona e mona-meso, tuvavidi kwenda kuna Makedonia, tubakwidi vo Nzambi utubokele twabasamunuina e nsangu zambote.
11 Kuna Teroa tukotele muna nzaza twele kuna Samoterake, kansi muna lumbu kialanda twele kuna Neapoli;
12 i bosi twele kuna Filipi,+ mbanza yakala muna wisa kia Roma, mbanza yasunda o mfunu muna mvivu wa Makedonia. Tunangini mo lumbu yayingi.
13 Muna Lumbu kia Vundu twele kuna mbazi a vitu, vana ndambu a nkoko, vana fulu kina twayindulanga vo kia sambidila, tuvuende, tuyantikidi sila umbangi kw’akento bakutakana vana.
14 Nkento mosi nkumbu andi Ludia, nlele mia se kia nduwa katekanga, musi mbanz’a Tuatira,+ Nzambi kavuminanga, watuwunikina, Yave* waziula ntim’andi kimana kakwikila mana Paulu kavovanga.
15 Vava kavubwa kumosi y’esi nzo andi,+ utudodokele vo: “Avo numwene vo ngina ye kwikizi muna Yave,* nuiza nangina muna nzo ame.” Osiandamene vo twenda.
16 Vava twayendanga kuna fulu kia sambidila, tuwanane ye ntaudi mosi ankento wakala ye nkuya. Ngang’a ngombo kakala,+ nluta miayingi katwasanga kwa mfumu zandi muna salu kiaki.
17 Nkento ndioyo walandanga Paulu yo yeto, wabokanga muna mvovo emi: “Wantu awaya ntaudi za Nzambi a Mpungu-nene,+ bekunusamunuinanga e nzil’a luvuluzu.”
18 Lumbu yayingi kavanganga wo. Kuna kwalanda Paulu kazizidila dio diaka ko, ovilukidi, ovovese nkuya vo: “Ikanikini muna nkumbu a Yesu Kristu, vaika muna yandi.” Vana vau uvaikidi.+
19 Mfumu zandi vava bamwene vo e vuvu kiau kiabakila e nzimbu kivuidi,+ babakidi Paulu yo Sila, babanete kw’akuluntu vana ntanda.*+
20 Wau banatwa kwa afundisi a nkangu, bavovele vo: “O wantu awaya mavuanga mayingi besianga omu mbanza eto.+ Oyau Ayuda,
21 belonganga fu ina vo ke yansongi ko kwa yeto twatanginina ngatu landa, kadi tu esi Roma.”
22 E ndonga ibatelamene kumosi, e mfumu za mbanza batiazuini mvuatu miau yo kanikina vo bawandilwa muna lubamba.+
23 Vava babawende kwayingi, babasidi muna pelezo, bakanikini nlundi a abakami katoma kubalunda.+
24 Muna kuma kia nkanikinu kavewa, ubasidi muna suku diakati dia pelezo, okangidi malu mau muna nsuku.*
25 Kansi muna dingi-dingi, Paulu yo Sila wau basambidinge yo sanisina Nzambi muna nkunga,+ abakami babawidi.
26 Vana vau vakedi nzakama yangolo ya ntoto, e nkubilwa za pelezo zinikukini. Mielo miawonso miziukidi vana vau, o tuvambu twa abakami awonso tudanukini.+
27 O nlundi a abakami vava kasikamene, omwene vo mielo mia pelezo miaziuka, ovolele nsosolo andi kayivonda, kadi obenze vo abakami batinini. +
28 Kansi Paulu ovovele muna nding’angolo vo: “Kuyivondi ko, kadi yeto awonso tuna vava!”
29 O nlundi a abakami olombele e mini, okotele muna kati, wau kezakamanga, ofukamene vana ndose a Paulu yo Sila.
30 Ubavaikisi kuna mbazi, ovovele vo: “Adieyi mfwete vanga muna vuluzwa?”
31 Bavovele vo: “Kwikila muna Mfumu Yesu wavuluzwa kumosi y’esi nzo aku.”+
32 I bosi, bansamunuini e diambu dia Yave* kumosi ye awonso bakedi muna nzo andi.
33 Muna ola yayina ya fuku ubanete, osukwidi e mputa zau. Ke vavioka kolo ko, yandi y’esi nzo andi bavubwa.+
34 Ubanete muna nzo andi, ubavene madia, oyangalele kumosi y’esi nzo andi awonso wau kakwikidi muna Nzambi.
35 Vava o kuma kwakiá, mfumu za mbanza batumini makesa, oku vo: “Vaikisa wantu awaya.”
36 O nlundi a abakami osamwini e mvovo miau kwa Paulu: “Mfumu za mbanza batumini makesa kimana yeno wole nuavaikiswa. I kuma vo, nuvaika owau, nuendela kuna luvuvamu.”
37 Kansi Paulu ubavovese vo: “Batuwendenge vana meso ma ndonga lembi fundiswa kuna mbazi a nkanu, batusidi muna pelezo, kana una vo tu esi Roma.+ Owau bazolele kutuvaikisa kuna kinsweki e? Ke tuvaika ko! Yambula beza kutuvaikisa yau kibeni.”
38 Makesa bele zayisa e mvovo miami kwa mfumu za mbanza. Bamwene wonga vava bawidi vo wantu awaya esi Roma.+
39 Muna kuma kiaki, bezidi kubadodokela yo kubavaikisa, babalombele vo bakatuka muna mbanza.
40 Kansi vava bavaikidi muna pelezo, bele kuna nzo a Ludia; vava bamwene ampangi babakasakese,+ bele kwau.
Mvovo vana yand'a lukaya
^ Yanzala kiakutakenanga nkangu mu teka, sumba lekwa yo tela mambu.
^ Yovo “ku.”
