Zasoneka Matai 25:1-46
25 “E Kintinu kia zulu kilenda tezaneswa ye mienze kumi ana babongele minda miau,+ benda wanana ye toko diansompi.+
2 Atanu muna yau mazowa kwau, kansi atanu alungaladi.*+
3 O mazowa banete minda, kansi yau ke banati mazi mankaka,
4 vo i alungaladi, banete minda miau ye mazi mankaka muna nlangi.
5 Ekolo toko diansompi kazingilanga, yau awonso banimbini yo leka.
6 Muna dingi-dingi vakedi kazu: ‘Tala e toko diansompi! Nuenda kunkika.’
7 E mienze miawonso batelamene, bakubikidi e minda miau.+
8 O mazowa bavovese alungaladi vo: ‘Nutuvana mazi, kadi e minda mieto se mizima.’
9 Alungaladi bavutwidi vo: ‘Nanga mazi ke mefwana ko kwa yeto yo yeno. Nuenda sumba kw’awana betekanga mo.’
10 Ekolo bayenda sumba mazi, toko diansompi olweke. E mienze ana bakubama bakotele yandi muna nkinzi a longo,+ e kielo kizikamene.
11 Kuna kwalanda, e mienze miankaka milweke yo vova vo: ‘E Mfumu, e Mfumu, utuziulwila!’+
12 Ubavutwidi vo: ‘Kieleka inuvovese wo vo, kinuzeye ko.’
13 “Dianu vo, nuyingilanga,+ kadi e lumbu ye ola ke nuzeye yo ko.+
14 “Kadi, e Kintinu kina nze muntu ozolele kwenda mu nkangalu. Vitila kenda, obokele ntaudi zandi yo kubayekeka mavua mandi.+
15 Omosi umvene talanta* tanu, wankaka zizole ye wankaka imosi, ovene kwa konso muntu mun’owu wa ngolo zandi, i bosi wele kwandi.
16 Ndiona watambula talanta tanu, vana vau wele zo kitila, obakidi nluta mia talanta tanu.
17 Diau dimosi mpe kavanga ndiona watambula e talanta zole, obakidi nluta mia talanta zole.
18 Kansi, ndiona watambula imosi, wele, otimini e wulu, ozikidi nzimbu* za mfumu andi.
19 “Vava kiavioka kolo kiayingi, o mfumu a ntaudi zazi wizidi, otele yau e mbalu.+
20 Ndiona watambula e talanta tanu wizidi ye talanta tanu zakulama, oku vo: ‘E Mfumu, talanta tanu wampana; tala, talanta tanu diaka zikulamene.’+
21 O mfumu andi umvovese vo: ‘Otomene sala, u ntaudi ambote ye kwikizi! Osongele kwikizi muna lekwa yakete. Ikuvana kiyekwa kia lekwa yayingi.+ Kota muna nkembo a mfumu aku.’+
22 Ndiona watambula e talanta zole wizidi, oku vo: ‘E Mfumu, talanta zole wampana; tala, talanta zole diaka zikulamene.’+
23 O mfumu andi umvovese vo: ‘Otomene sala, u ntaudi ambote ye kwikizi! Osongele kwikizi muna lekwa yakete. Ikuvana kiyekwa kia lekwa yayingi. Kota muna nkembo a mfumu aku.’
24 “I bosi, o ntaudi ona watambula talanta mosi wizidi, oku vo: ‘E Mfumu, yazaya wo vo u nkwa ntim’ambadi, ovelelanga vana kwakunina ko yo kutikila vana kwavevela ko.+
25 Dianu vo, yamona wonga, yayenda sweka e talanta aku muna nsi a ntoto. E talanta aku i yau eyi.’
26 O mfumu andi umvutwidi vo: ‘U ntaudi ambi ye molo, wazaya wo vo ivelelanga vana kiakunina ko yo kutikila vana kiavevela ko,
27 ekuma walembi kotesela e nzimbu* zame kuna lundilu dia nzimbu? Ozevo wau ngizidi, nga ntambwidi zo ye nluta.
28 “‘Dianu vo, numbonga e talanta, nuvana yo kwa ndiona una ye talanta kumi.+
29 Kadi konso ndiona una ye lekwa, yayingi kevewa ye okala ye lekwa yayingi. Kansi ndiona kena ye lekwa ko, kana nkutu kina kiakete kena kiau katulwa kikunkatulwa.+
30 Nuvaikisa ntaudi ndioyo wakondwa o mfunu kuna mbazi, kuna tombe. I kûna kedidila yo kwetesa o meno.’
31 “O Mwan’a muntu+ vava kekwiza muna nkembo andi ye mbasi zandi zawonso,+ ovuanda vana kunda kiandi kia nkembo.
32 E zula yawonso ilungalakana vana kena, ovambula wantu nze una mvungudi kevambulwilanga mameme ye nkombo.
33 Osia mameme+ kuna koko kwandi kwalunene, kansi e nkombo kuna koko kwalumonso.+
34 “I bosi, o Ntinu ovovesa awana bena kuna koko kwandi kwalunene vo: ‘Nuiza, yeno nuasambulwa kwa Se diame, nuavua e Kintinu kina nuakubikilwa tuka kuna semo dia nza.
35 Kadi yamona nzala, oyeno nuakumpana madia; yamona e vuina, oyeno nuakundwika. Yakala nzenza, oyeno nuakuntambula;+
36 yakala e nkonga, oyeno nuakumvuika.+ Yayela, oyeno nuakwiza kuntala. Yakala muna pelezo, oyeno nuakwiza kunkingula.’+
37 I bosi, ansongi bekumvutula vo: ‘E Mfumu, nkia ntangwa twamona ye nzala yo kudikila yovo ye vuina, twanuikina?+
38 Nkia ntangwa twamona vo u nzenza yo kutambula yovo nkonga twavana e mvuatu?
39 Nkia ntangwa twamona wayela yovo muna pelezo, twayenda kukingula?’
40 O Ntinu okubavutula vo, ‘Kieleka inuvovese vo, konso ntangwa nuavanga wo kwa ndiona wandwelo muna mpangi zame, kwa mono nuavanga wo.’+
41 “I bosi, ovovesa awana bena kuna koko kwandi kwalumonso vo: ‘Nukatuka vava ngina,+ oyeno nuavewa tumbu kia tiya twa mvu ya mvu*+ twakubikilwa Nkadi ampemba ye mbasi zandi.+
42 Kadi yamona nzala, yeno ke numpani madia, yamona vuina, yeno ke nundwiki.
43 Nzenza yakala, ke nuantambula ko; nkonga yakala, yeno ke numvuiki; yayela yo siwa muna pelezo, yeno ke nuizi kuntala.’
44 I bosi, oyau mpe bekumvutula vo: ‘E Mfumu, nkia ntangwa twamona ye nzala, yovo ye vuina, yovo nzenza, yovo nkonga, yovo mbevo, yovo muna pelezo yo lembi kusadila?’
45 I bosi, okubavutula vo: ‘Kieleka inuvovese vo, konso ntangwa nualembi wo vanga kwa ndiona wandwelo muna mpangi zame, kwa mono nualembi wo vanga.’+
46 Awaya befwaswa yakwele mvu,*+ kansi ansongi bevua o moyo a mvu ya mvu.”+
Mvovo vana yand'a lukaya
^ Yovo “akwa ngangu.”
^ Mvovo wa sina: “palata.”
^ Mvovo wa sina: “palata.”
^ I sia vo, “lufwasu lwa mvu ya mvu.” Tala Nsas’a Mvovo, “Ngeena.”
^ Mvovo wa sina: “bekwenda kuna lufwasu lwa mvu ya mvu.”
