Zasoneka Matai 24:1-51
24 Ekolo Yesu kevaikanga muna tempelo, alongoki andi bezidi kwa yandi bansonga o lûmbu lwa tempelo.
2 Ubavutwidi vo: “Nga numwene e lekwa yayi yawonso e? Kieleka inuvovese vo, ovava ke vesala tadi va ntandu a tadi ko, dina dilembi kunkumunua.”+
3 Ekolo kavuende vana Mongo a Olive, alongoki bezidi kwa yandi vana va yau kaka, banyuvuidi vo: “Utuzayisa, nkia ntangwa mekala o mambu mama? Nkia sinsu kisonga e ngiz’aku*+ ye mbaninu a tandu?”*+
4 O Yesu ubavutwidi vo: “Nutoma kuyikenga nualembi vukumunua kwa konso muntu,+
5 kadi ayingi bekwizila muna nkumbu ame yo vova vo: ‘Mono i Kristu,’ yo vukumuna wantu ayingi.+
6 Nuwá vita ye nsangu za vita. Nuyikenga nualembi telamwa e mioyo, kadi mambu mama mafwete vangama, vo i mbaninu* ke yayizidi ntete ko.+
7 “Kadi zula kitelamena zula, kintinu kitelamena kintinu,+ mukala mvengele+ ye nzakama za ntoto muna zunga eki ye kiankaka.+
8 Mambu mama mawonso i lubantiku lwa nsongo.
9 “O wantu bekunumwesa e mpasi+ yo kunuvonda,+ numengwa kwa zula yawonso mu kuma kia nkumbu ame.+
10 Ndonga mpe beta e sakuba yo yekoziana yo mengana.
11 Ngunza zayingi zaluvunu zibundumuka yo vukumuna wantu ayingi;+
12 muna kuma kia wokela kwa umpumbulu, o zola kwa wantu ayingi kuvola.
13 Kansi, ndiona ozindalala yakuna mbaninu,* yandi ovuluzwa.+
14 E nsangu zazi zambote za Kintinu zisamunua mu nza yawonso muna umbangi kwa zula yawonso,+ i bosi e mbaninu ikwiza.
15 “Kansi, vava numona e lekwa kiangemi eki kitwasanga lufwasu, kina kayika Daniele wa ngunza, kitelamene vana fulu kiavauka,+ (yambula o ntangi kasadila o umbakuzi),
16 awana bena muna Yuda, yambula batinina muna miongo.+
17 Ndiona una vana nludi a nzo kakulumuki ko mu kwenda bonga e lekwa ina muna nzo andi,
18 ndiona una kuna mpatu kavutuki ko kenda bonga e kinkutu kiandi.
19 Tâtu kwa akento bayimita ye awana beyemeka muna lumbu yayina!
20 Nusambanga kimana e ntin’eno yalembi kala mu nsungi a sivu* ngatu mu Lumbu kia Vundu;
21 kadi mukala mpasi zayingi+ zina ke zateka kala ko tuka kiasemenua e nza yamu wau, ke zisinga kala diaka ko.+
22 Dianu vo, e lumbu yayina kele vo ke ikufikwa ko, ke vadi vuluka nkutu muntu ko; kansi mu kuma ki’awana basolwa, e lumbu yayina ikufikwa.+
23 “Avo muntu unuvovese vo: ‘Nutala! O Kristu wina vava,’+ yovo ‘Okûna kena!’ ke nukwikila wo ko.+
24 Kadi Kristu zaluvunu ye ngunza zaluvunu+ zibundumuka yo vanga sinsu yanene ye masivi mu vava vukumuna+ kana nkutu awana basolwa.
25 Ntekele kunulukisa.
26 Kansi, avo wantu banuvovese vo: ‘Kuna makanga kena,’ ke nuendi ko ko; ‘Muna suku i kena,’ ke nukwikila wo ko.+
27 Kadi nze una e nsemo mivaikilanga kuna este yo lwaka kuna weste, i una mpe ukala e ngiz’a* Mwan’a muntu.+
28 Konso kuna kwina e bulu kiafwa, e mbemba i kuna zilungalakena.+
29 “Vava kifokoka kaka e mpasi za lumbu yayina, o ntangwa obukama e tombe,+ e ngonde ke ivana diaka miezi ko, e ntetembwa zibetomoka tuka kuna zulu, e lekwa ya zulu inikunua.+
30 I bosi, e sinsu kia Mwan’a muntu kimoneka kuna zulu, makanda mawonso ma nza mebunda e tulu mu kuma kia ntantu,+ bemona Mwan’a muntu+ okwizila muna matuti ma zulu ye nkuma yo nkembo ayingi.+
31 Otuma mbasi zandi ye zú diangolo dia mpungi balungalakesa awana basolwa muna konko* yá, tuka kuna nsuka zulu yakuna nsuka yankaka.+
32 “Ozevo, nulongoka diambu muna kingana kia nsanda: Vava tayi yandi isavukanga yo vaikisa makaya, nuzayanga wo vo nsungi a mvula ifinamene.+
33 Diau dimosi mpe, oyeno avo numwene mambu mama mawonso, nuzaya wo vo Mwan’a muntu ofinamene, va mwelo se kena.+
34 Kieleka, inuvovese vo, e mbandu yayi ke ikuyifwila nkutu ko yavana mambu mama mawonso mevangama.
35 E zulu ye nza vioka ivioka, kansi mambu mame ke mevioka nkutu ko.+
36 “Mu kuma kia lumbu kiakina ye ola, ke vena muntu ko ozeye kio,+ kana nkutu mbasi za zulu yovo Mwana, kansi Se kaka.+
37 Kadi wauna wakala muna lumbu ya Noa,+ i una mpe ukala muna ngiz’a* Mwan’a muntu.+
38 Kadi nze una wakala muna lumbu yayina, ina yavitila e Kizalu, badianga, banuanga, akala basompanga, akento basompeswanga, yamuna lumbu Noa kakota muna nzaza,+
39 ke bavanga diambu ko yavana Kizalu kiayiza, kiabakukulwisa yau awonso,+ i una mpe ukala muna ngiz’a Mwan’a muntu.
40 Wantu wole bekala muna mpatu; mosi obongwa, wankaka obembolwa.
41 Akento wole betuta muna su; mosi obongwa, wankaka obembolwa.+
42 Dianu vo, nukwamanana yingila, kadi ke nuzeye kio ko e lumbu kikwiza o Mfumu eno.+
43 “Nuzaya diambu edi: Kele vo mfumu a nzo kayizayila e ola ikwiza o mwivi muna fuku,+ yingila kadi yingila, ke mu yambula ko vo e nzo andi yabangulwa.+
44 Muna diadi, oyeno mpe nukubama,+ kadi o Mwan’a muntu okwiza muna ola ina nulembi yindula.
45 “Nani kieleka i ntaudi akwikizi yo lulungalalu* ona wavewa kiyekwa kwa mfumu andi kia lunga-lunga selo ya nzo andi, kabavana madia muna ntangwa ifwene?+
46 Kiese kwa ntaudi yoyo avo owanukini kwa mfumu andi vo i wau kevanganga!+
47 Kieleka inuvovese wo vo, okumvana kiyekwa kia lunga-lunga e salanganu yandi yawonso.
48 “Kansi avo ntaudi ambi ovovele muna ntim’andi vo: ‘O mfumu ame mu zingila kena,’+
49 kayantika wanda akwandi ntaudi yo dia yo nua vamosi ye akwa nkolwa,
50 o mfumu a ntaudi ndiona okwiza muna lumbu kina ntaudi kalembi kumvingila ye muna ola kalembi zaya,+
51 okumvana tumbu kiangolo yo kuntuba vana vena ampuki. I kûna kedidila yo kwetesa o meno.+
Mvovo vana yand'a lukaya
^ Tala Nsas’a Mvovo.
^ Tala Nsas’a Mvovo.
^ Yovo “mbaninu a nza.”
^ Yovo “mfoko.”
^ Kuna Isaele, mvula ye wunga dinokanga muna nsungi yayi, dikitulanga nkangalu se wampasi.
^ Tala Nsas’a Mvovo.
^ Mvovo wa sina: “tembwa.”
^ Tala Nsas’a Mvovo.
^ Yovo “nkwa ngangu.”
