Zasoneka Matai 20:1-34
20 “Kadi e Kintinu kia zulu kina nze mfumu a mpatu a vinyu, ona ovaikidi mu mene-mene, wele vavi asadi benda sadila muna mpatu andi a vinyu.+
2 Vava kawizanene ye asadi vo denali* imosi kekubafuta muna lumbu, ubatumini muna mpatu andi a vinyu.
3 Ovaikidi diaka muna tezo kia ola yatatu,* omwene ankaka bakondelo e salu, batelamene vana zandu,
4 ubavovese vo, ‘Oyeno mpe, nuenda sala muna mpatu a vinyu, ikunuvana konso mfutu una nufwanukina.’
5 Bele kuna mpatu. Ovaikidi diaka muna tezo kia ola yasambanu* ye ina yavua,* ovangidi diau dimosi.
6 I bosi, muna tezo kia ola ya 11,* ovaikidi, omwene ankaka batelamene, ubayuvuidi vo, ‘Ekuma nutelamene ovava mwini amvimba yeno ke nukadi ye salu?’
7 Bavutwidi vo: ‘Kadi ke vena muntu ko utubakidi mu salu.’ Ubavovese vo: ‘Oyeno mpe nuenda sala muna mpatu a vinyu.’
8 “Muna nkokela, o mfumu a mpatu a vinyu ovovese selo kiandi vo: ‘Bokela asadi, wabafuta,+ yantikila muna awana basukinini yamuna awana bavitidi.’
9 Vezidi awana bayantikidi e salu muna ola ya 11, konso muntu otambwidi denali* imosi.
10 Ana bavitidi vava bezidi, bayindwidi vo nzimbu zayingi befutwa, kansi yau mpe batambwidi denali* imosi.
11 Vava batambwidi yo, bayantikidi yidimina mfumu a mpatu a vinyu,
12 oku vo: ‘Awaya basukinini ola mosi kaka basadidi; kansi batambwidi mfutu wau mosi yo yeto tufuntukidi lumbu kiamvimba ye mwini!’
13 Ovovese mosi muna yau, oku vo: ‘E nkwame, kivangidi diambu diambi ko. Ke denali* imosi ko tuwizanenge?+
14 Tambula o mfutu aku, wenda kwaku. Nzolele vana kwa ndiona osukinini mfutu wau mosi yo ngeye.
15 Nga ke diansongi ko kwa mono yavanga konso dina nzolele muna nzimbu zame? Yovo kimpala una kiau* wau ibavangidi diambu diambote?’+
16 Dianu vo, awana besukinina bevita, awana bevita besukinina.”+
17 Ekolo betombokanga kuna Yerusaleme, Yesu onete alongoki 12 vana fulu kia yau kaka, ubavovese vo:+
18 “Owau se tutomboka kuna Yerusaleme, o Mwan’a muntu oyekolwa vana moko ma nganga zambuta ye asoneki. Bekunzengela e tumbu kia lufwa,+
19 oyekolwa vana moko ma esi zula bansakanena yo kunzwabula yo kumvondela vana nti;+ ofulwa muna lumbu kiatatu.”+
20 I bosi, o nkaz’a Zebedayo+ ofinamene kwa Yesu kumosi yo wan’andi wole, umvumbamene,* unlombele diambu dimosi.+
21 Yesu unyuvuidi vo: “Adieyi ozolele?” Umvutwidi vo: “Yambula vo wan’ame awaya yau awole, bavuanda muna Kintinu kiaku, o mosi kuna koko kwaku kwalunene, wankaka kuna koko kwalumonso.”+
22 Yesu ovutwidi vo: “Oyeno ke nuzeye dio ko dina nulombanga. Nga nulenda nua e mbungwa ina inu’e?”+ Bamvutwidi vo: “Tulenda kweto.”
23 Ubavutwidi vo: “Kieleka, nulenda kweno nua e mbungw’ame,+ kansi ke mono ko ibaka e nzengo kana nani ovuanda kuna koko kwame kwalunene yovo kwalumonso, kadi Se diame osola awana bevuanda va fulu yoyo.”+
24 Yau kumi vava bawidi wo, bafungidi makasi mu kuma kia mpangi zole zazi.+
25 Kansi, Yesu ubabokele, ubavovese vo: “Nuzeye wo vo atinu a zula bediatidilanga nkangu, akwa tunda mpe bena ye wisa muna yau.+
26 Ke wau ko difwete kala vovo nuina;+ kansi konso ona ozolele kala nene vovo nuina, kafwete kala selo kieno,+
27 konso ona ozolele kala se ntu vovo nuina, kafwete kala se ntaudi eno.+
28 Diau dimosi yo Mwan’a muntu, kayiza sadilwa ko, kansi wayiza muna sadila akaka+ yo vana moyo andi se lukûlu lwa wantu ayingi.”+
29 Ekolo bavaikidinge muna Yeriko, ndong’ayingi inlende.
30 Mpofo zole zifongele vana mbel’a nzila, vava bawidi wo vo Yesu oviokanga, bakazidi oku vo: “E Mfumu, e Mwan’a Davidi, utufwila e nkenda!”+
31 E ndonga ibasimini, ibavovese vo babutama; kansi basakisi diaka okaza, oku vo: “E Mfumu, e Mwan’a Davidi, utufwila e nkenda!”
32 Yesu oningamene, ubabokele yo kubayuvula: “Adieyi nuzolele yavanga kwa yeno?”
33 Bamvutwidi vo: “E Mfumu, yambula meso meto matemoka.”
34 Yesu ubafwididi e nkenda, oviakane meso mau,+ vana vau bamwene, banlende.
Mvovo vana yand'a lukaya
^ I sia vo, tezo kia ola ya 9 muna mene.
^ I sia vo, tezo kia ola ya 12 muna mwini.
^ I sia vo, tezo kia ola ya 15.
^ I sia vo, tezo kia ola ya 17.
^ Mvovo wa sina: “disu diaku diambi; disu diaku dia umpumbulu.”
^ Yovo “umfukamene.”
