Zasoneka Matai 17:1-27
17 Vava kiavioka lumbu sambanu, Yesu obongele Petelo, Yakobo ye Yoane wa mpangi andi, ubanete kuna mongo andá, vana va yau kaka.+
2 Okitukidi vana bena; e ndose andi ikezimini nze ntangwa, e mvuatu miandi mivuidi kezima* nze ntemo.+
3 I bosi, Mose yo Eliya bamonekene vana bena, bamokene yandi.
4 Petelo ovovese Yesu vo: “E Mfumu, diambote twakala vava. Avo ozolele, itunga saba tatu vava, kimosi kiaku, kimosi kia Mose, kimosi kia Eliya.”
5 Ekolo kevovanga, e tuti dia ntemo dibayitalele, i bosi e ndinga itukidi muna tuti, oku vo: “Ndioyo i Mwan’ame anzolwa, ona iyangalelanga.+ Nunwila.”+
6 Vava bawidi wo, alongoki babukikidi e ndose zau, bamwene kikilu o wonga.
7 I bosi, Yesu wizidi, ubasimbidi, ovovele vo: “Nutelama. Ke numoni wonga ko.”
8 Vava basengwele o meso, ke bamwene muntu ko, kansi Yesu kaka.
9 Ekolo bekulumukanga tuka kuna mongo, Yesu ubakanikini vo: “Ke nuzayisi e mona-meso kiaki kwa muntu ko yavana Mwan’a muntu kefuluka muna mafwa.”+
10 Kansi, alongoki banyuvuidi vo: “Ozevo, ekuma asoneki bevovelanga vo Eliya kafwete teka kwiza?”+
11 Ovutwidi vo: “Kieleka, Eliya okwiza, ovutula e lekwa yawonso una yakala.+
12 Kansi, inuvovese vo, Eliya wayiza kala, ke bansungamena ko, kansi bamvanga mawonso bazola.+ Diau dimosi mpe, o Mwan’a muntu omweswa e mpasi vana moko mau.”+
13 I bosi, alongoki babakwidi vo Yoane wa Mvubi kavovelanga.
14 Vava balweke vana vena e ndonga,+ muntu mosi umfinamene, yo kumfukamena, oku vo:
15 “E Mfumu, fwila mwan’ame e nkenda, kadi nkwa niangi, wayela. Nkumbu miayingi kebwanga vana tiya ye muna maza.+
16 Intwese kwa alongoki aku, kansi ke balendele kunwuka ko.”
17 Yesu ovutwidi vo: “E mbandu yakondwa lukwikilu yo bendomoka,+ yamu nkia kolo ikwamanana kala yeno? Yamu nkia kolo izizidila mavangu meno? Untwasa kwa mono.”
18 I bosi, Yesu otumbidi nkuya, ovaikidi muna yandi, o nleke osasukidi tuka muna ola yayina.+
19 I bosi, alongoki bezidi kwa Yesu vana fulu kia yau kaka, banyuvuidi vo: “Ekuma oyeto ke tulendele wo vaikisila ko?”
20 Ubavutwidi vo: “Mu kuma kia filukwikilu lweno. Kadi, kieleka inuvovese vo, avo onene wa lukwikilu lweno ukala nze mbongo yakete-kete,* nuvovesa o mongo wau vo: ‘Yaluka ovava yo kwenda kuna,’ o mongo uyaluka, ke vekala diambu dina ke nulenda vanga ko.”+
21 * ——
22 Vava bakutakene vamosi muna Ngalili, Yesu ubavovese vo: “O Mwan’a muntu oyekolwa vana moko ma wantu,+
23 bekumvonda yo fulwa muna lumbu kiatatu.”+ Bakendalele kikilu.
24 Vava balweke muna Kafanau, avakulwisi a mpaku a tempelo* bezidi kwa Petelo, banyuvuidi vo: “Nga nlongi eno ke futanga mpaku a tempelo ko e?”+
25 Ovutwidi vo: “Ve, futa kefutanga.” Kansi, vava kakotele muna nzo, Yesu otekele kumvovesa vo: “Adieyi oyindwidi e Simone? Kwa aki nani atinu a nza betambulanga e vaku yovo mpaku? Kwa wan’au yovo kwa nzenza?”
26 Vava kavutwidi vo: “Kwa nzenza,” Yesu umvovese vo: “Kieleka, o wana bavevoka muna mpaku.
27 Kansi, muna lembi kubatesesa e sakuba,+ wenda kuna mbu, tuba luvaku, bong’e mbizi antete otakula, vava oziula o nu’andi osolola mo nzimbu za palata.* Bonga yo, futa e mpaku mu kuma kiame yo ngeye.”
Mvovo vana yand'a lukaya
^ Yovo “pemba.”
^ Yovo “mbongo a mutade.” E mbongo yayi ikunuanga kuna Palestina. Ikulanga vioka meta 4 yo vaikisa tayi yayingi.
^ Mvovo wa sina: “drakima zole.” Tala Nsas’a Mvovo.
