Zasoneka Matai 14:1-36
14 Muna ntangwa yayina, Erodi wa nyadi a mvivu owidi e nsangu mu kuma kia Yesu,+
2 ovovese ntaudi zandi vo: “Ndioyo i Yoane wa Mvubi. Wafulukidi muna mafwa, kiaki i kuma kevangilanga e mavangu mama mankuma.”+
3 Kadi Erodi* wabaka Yoane, wankanga yo kunsia muna pelezo mu kuma kia Erodia wa nkaz’a Filipo wa mpangi andi.+
4 Kadi Yoane wamvovesanga vo: “Ke diansongi ko kwa ngeye wasompana yandi.”+
5 Kana una vo wazola kumvonda, wamona o wonga wa ndonga, kadi babadikilanga Yoane vo ngunza.+
6 Kansi vava kiakembelwa e lumbu kia luwutuku lwa Erodi,+ o mwan’ankento a Erodia okinini vana bena, Erodi oyangalele kikilu,+
7 osidi o nsilu yo dia e ndofi vo okumvana konso kina kelomba.
8 I bosi, muna lutumu lwa ngudi andi, ovovele vo: “Umpana o ntu a Yoane wa Mvubi+ omu longa diadi.”
9 Kana una vo ntinu okendalele, okanikini vo bamvana wo mu kuma kia ndofi ina kadidi vana ndose y’awana bedianga yandi.*
10 Muna kuma kiaki, otumini wantu muna pelezo benda zenga o ntu a Yoane.
11 Batwese ntu andi muna longa, bavene wo kwa dumbelele, onete wo kwa ngudi andi.
12 I bosi, alongoki andi bezidi, banete mvumbi, banzikidi; bele zayisa e nsangu kwa Yesu.
13 Vava kawidi wo, Yesu okatukidi vo, obakidi e nzaza wele kuna makanga kakala yandi mosi kaka, kansi e ndonga wau bawidi wo, banlende kia malu tuka muna mavata mau.+
14 Vava kakulumukini muna nzaza, omwene ndong’ayingi, ubafwididi e nkenda,+ owukidi e mbevo zau.+
15 Kansi muna nkokela, alongoki andi bezidi kwa yandi, bavovele vo: “Ovava va makanga, o kuma se kufwa; sindika e ndonga, kimana benda muna mavata bayisumbila o madia.”+
16 Kansi, Yesu ubavovese vo: “Ke bendi ko; oyeno nubavana lekwa kia dia.”
17 Bamvovese vo: “Ke tuna ye lekwa ko ovava, mbolo zitanu kaka tuna zau ye mbizi zole za maza.”
18 Ovovele vo: “Nuntwasila zo.”
19 I bosi, okanikini e ndonga bavuanda vana titi, obongele mbolo zau zitanu ye mbizi za maza zau zole, osengwele o meso kuna zulu, osambwidi zo,+ i bosi obukunuini e mbolo yo vana zo kw’alongoki, alongoki bavene zo kwa ndonga.
20 Awonso badidi yo yukuta, bakutikidi e nkesona zina zisuvidi, yitunga 12 yazala.+
21 Ozevo, o lutangu lwa awana badidi, tezo kia 5.000 m’akala, lembi tanga akento ye yingiana-ngiana.+
22 Vana vau ovovese alongoki andi bakota muna nzaza benda viti kuna simu diankaka, ekolo kesindikanga e ndonga.+
23 Vava kamene sindika e ndonga, otombokele kuna mongo yandi mosi kaka kimana kasamba.+ Vava kuma kufwidi, okedi kûna yandi mosi kaka.
24 Vava e nzaza ilweke kikilu kuna kwandá,* itungianisu kwa mavuku, kadi e tembwa kibalwakidi.
25 Kansi, muna ngingila ya nyá ya fuku,* wizidi kwa yau yo diatila vana ntandu a mbu.
26 Vava bamwene Yesu odiatilanga vana ntandu a mbu, alongoki batokane, oku vo: “Ekiaki mona-meso!” Bakazidi mu kuma kia wonga.
27 Kansi, vana vau Yesu ubavovese vo: “Ke nutokani ko! I mono; ke numoni wonga ko.”+
28 Petelo umvutwidi vo: “E Mfumu, avo i ngeye kikilu, umpan’o nswa ngiza kwa ngeye vana ntandu a maza.”
29 Umvovese vo: “Wiza!” I bosi, Petelo okulumukini muna nzaza, odiete vana ntandu a maza, wele kwa Yesu.
30 Kansi vava kamwene e tembwa, o wonga umbakidi. Vava kayantikidi dimuka, okazidi vo: “E Mfumu, umvuluza!”
31 Vana vau Yesu olambwidi o koko kwandi, umbakidi, umvovese vo: “E nkwa filukwikilu, ekuma okatikisidi?”+
32 Vava bakotele muna nzaza, e tembwa kidingalele.
33 I bosi, awana bakedi muna nzaza bamvumbamene, oku vo: “Kieleka, ngeye u Mwan’a Nzambi.”
34 Basaukidi yo lwaka kuna Ngenesarete.+
35 Wau babakwidi vo i Yesu, esi vata diadi batwikidi e nsangu muna zunga yawonso yakala lukufi, bantwasidi mbevo zawonso.
36 Bandodokele vo baviakana kaka o nswiku a mvuatu andi,+ awonso ana baviakane wo, basasukidi.
Mvovo vana yand'a lukaya
^ I sia vo, Erodi Antipa. Tala Nsas’a Mvovo.
^ Yovo “y’awana bena yandi vana meza.”
^ Mvovo wa sina: “yavavuka stadia zayingi.” E stadia mosi, meta 185.
^ I sia vo, tuka muna ola ya 3 muna fuku yamuna mpaik’a ntangwa muna ola ya 6 muna mene.
