Zasoneka Maku 3:1-35
3 Okotele diaka muna sambilu, mukedi muntu una yo koko kwayuminina.*+
2 Bantungunuini mu zaya kana vo okunwuka muna Lumbu kia Vundu, kimana bamfunda.
3 Ovovese nkwa koko kwayuminina* vo: “Telama, wiza ova kati.”
4 I bosi ubavovese vo: “Nga diansongi mu vanga o wete yovo mbi mu Lumbu kia Vundu, vuluza moyo yovo fwasa wo?”+ Badingalele kwau.
5 Vava kabatadidi kuna makasi, omwene ntantu mu kuma kia bala kwau kwa ntima,+ ovovese o muntu vo: “Lambula o koko kwaku.” Oyandi olambwidi ko, o koko kwandi kusasukidi.
6 I bosi, Afarisi bavaikidi, vana vau bele kumvuandila e mfulu ye alandi a Erodi+ kimana bamvonda.
7 Kansi, Yesu wele kuna mbu ye alongoki andi, ndong’ayingi itukidi kuna Ngalili ye kuna Yuda, banlende.+
8 Akaka batukidi mpe kuna Yerusaleme, Idumeya, kuna simu dia Yodani ye muna zunga kia Turo ye Sidone, bezidi kwa yandi wau bawidi mambu mayingi kavangidi.
9 Ovovese alongoki andi vo bankubikila nzaza yakete kimana e ndonga yalembi kumfinangesa.
10 Wau kawukidi wantu ayingi, awonso bena ye yimbevo yampasi banzungidi kimana bamviakana.+
11 Kana nkutu awana bena ye mianda mia usafu,+ konso ntangwa bafukamanga vana kena yo kaza vo: “Ngeye u Mwan’a Nzambi.”+
12 Kansi, nkumbu miayingi kabakanikina vo ke bazayisi kwa wantu ko kana yandi i nani.+
13 Wele kuna mongo, obokele akaka muna alongoki,+ bele kwa yandi.+
14 Osolele 12, ubayikidi vo antumwa, yau bakangalanga yandi yo kubatuma benda longinge
15 yo kubavana e wisa kia vaikisa nkuya.+
16 Ezazi i nkumbu za ntumwa 12+ kasolele: Simone, ona kavene mpe nkumbu a Petelo,+
17 Yakobo wa mwan’a Zebedayo yo Yoane wa mpangi a Yakobo (ubavene mpe nkumbu a Boanenge, i sia vo, “Wan’a Mwandazi”),+
18 Andere, Filipo, Batolomai, Matai, Toma yo Yakobo wa mwan’a Alefayo yo Tadai yo Simone wa musi Kenani,*
19 yo Yuda wa musi Kereote, ona wanyekola.
I bosi, okotele muna nzo,
20 ndonga ilungalakene diaka, ke balendele nkutu dia ko.
21 Kansi, vava yitu yandi bawidi wo, bele kimana bambaka, kadi edi bavovele vo: “Ozengomokene.”+
22 Asoneki ana bakulumukini tuka kuna Yerusaleme, bavovele vo: “Belezebube* kena yandi, mu nkum’a mfumu a nkuya kevaikisilanga e nkuya.”+
23 Vava kababokele, ubavovesele muna yingana oku vo: “O Satana aweyi kalenda vaikisila Satana?
24 E kintinu avo kivambanene, e kintinu kiakina ke kisikila ko,+
25 e nzo avo ivambane, e nzo yoyo ke isikila ko.
26 Diau dimosi mpe, o Satana avo uyitelamene yo kuyivambanesa, kesikila ko, i mbaninu andi.
27 Kieleka, ke vena muntu ko olenda kota muna nzo a nkwa ngolo kayiya mavua mandi, nanga vo kateka kanga o nkwa ngolo. I bosi kelenda sanza e nzo andi.
28 Kieleka inuvovese vo masumu mawonso ye lutiangu lwa wan’a wantu, lolokwa lulolokwa.
29 Kansi, konso ona otianguna mwand’avelela, ke lolokwa ko yakwele mvu,+ kadi onete sumu dia mvu ya mvu.”+
30 Ubavovese wo, kadi edi bavovele vo: “Mwand’ambi kena wau.”+
31 O ngudi andi ye mpangi zandi+ bezidi, batelamene vana mbazi, batumini muntu kambokela.+
32 Muna kuma kia ndonga inzungidi, bamvovese vo: “Tala, o ngudi aku ye mpangi zaku kuna mbazi bena, ngeye bevavanga.”+
33 Kansi, ubavutwidi vo: “Nani i ngudi ame ye mpangi zame?”
34 I bosi, otadidi awana banzungidi, ovovele vo: “Tala o ngudi ame ye mpangi zame!+
35 Konso ona ovanganga luzolo lwa Nzambi, yandi i mpangi ame, i nsang’ame ye ngudi ame.”+
Mvovo vana yand'a lukaya
^ Yovo “kwakonzama.”
^ Yovo “kwakonzama.”
^ Yovo “nkwa vema.”
^ Nkumbu yankaka ya Satana.
