Luvaiku 9:1-35
9 Yave ovovese Mose vo: “Wenda kwa Faro, umvovesa vo: ‘I wau wuwu kavovele o Yave wa Nzambi a Ayibere: “Sindika o nkangu ame kimana wenda kunsadila.+
2 Kansi, avo kukubasindika ko, wakwamanana kubasimbinina,
3 o koko kwa Yave+ kutumba e twelezi yaku ina muna yana. E mvalu, mabuluku, samo, ngombe ye mameme, mebakama kwa vuku kiampondi.+
4 Yave osia e nswaswani vana vena twelezi ya Isaele ye twelezi ya Engipito, ke vefwa kana bulu kimosi ko kia Aneyisaele.”’”+
5 Vana ntandu, Yave osikidisi e ntangwa, oku vo: “O mbazi, omono Yave ivanga diambu diadi omu nsi.”
6 Muna lumbu kialanda, Yave ovangidi wo kikilu. E twelezi yawonso muna Engipito iyantikidi o fwa,+ kansi ke vafwidi kana bulu kimosi ko muna twelezi ya Isaele.
7 Vava Faro katumini wantu benda tala, bamwene vo ke bulu kimosi ko muna twelezi ya Isaele kifwidi. Kana una vo i wau, Faro okwamanene badisa o ntim’andi, kasindikidi nkangu ko.+
8 I bosi, Yave ovovese Mose yo Arone vo: “Nuzadisa moko meno yo ntoto ampolo a fûlu, o Mose kafwete wo mwanga muna zulu vana ntadisi a Faro.
9 O ntoto ampolo ukituka se mbundukutu muna nsi yawonso ya Engipito yo twasa mavumbu mevaikanga mafina muna wantu ye bulu muna nsi yawonso ya Engipito.”
10 Muna kuma kiaki, babongele o ntoto ampolo a fûlu, batelamene vana ntadisi a Faro; Mose omwenge wo kuna zulu, utwese mavumbu mevaikanga mafina muna wantu ye bulu.
11 E nganga za nkisi ke balendele telama vana vena Mose ko mu kuma kia mavumbu, kadi mavumbu mavaikidi muna nganga za nkisi ye muna esi Engipito awonso.+
12 Kansi, Yave oyambwidi vo Faro kabadisa o ntim’andi, Faro kawididi Mose yo Arone ko, wauna o Yave kazayisa kwa Mose.+
13 I bosi, Yave ovovese Mose vo: “Sikama muna mene-mene, telama vana ndose a Faro, umvovesa vo: ‘I wau wuwu kavovele o Yave wa Nzambi a Ayibere: “Sindika nkangu ame wenda kunsadila.
14 Kadi, wanda ikuwanda,* iwanda mpe ntaudi zaku yo nkangu aku, kimana wazaya wo vo ke vena muntu ko ofwanane yame ova nza yawonso.+
15 Omono nga yalambwidi kala koko kwame yatumba kumosi yo nkangu aku mu vuku kiampondi, wavempolwa* ova nza.
16 Kiaki i kuma iyambulwidi wakala o moyo: muna kusonga o nkum’ame, e nkumbu ame yasamunua mu nza yawonso.+
17 Kansi, ongeye wakinu kuyitundidika muna nkangu ame muna lembi kubasindika.
18 O mbazi muna ola yayi, inokesa mvul’anene ya matadi, ina ke yateka noka ko omu Engipito tuka yatungilwa yamu wau.
19 Ozevo, tuma wantu bakutakesa twelezi yaku yawonso muna lundilu ye lekwa yaku yawonso ina muna kiana. Konso muntu yovo bulu kiwanuka muna kiana, kilembi kala muna nzo, fwa kifwa vava mvul’a matadi ikubabwila.”’”
20 Konso selo kia Faro ona wazitisa e mvovo mia Yave, vana vau wakutika e ntaudi zandi ye twelezi yandi muna nzo,
21 kansi, awana ke basia mvovo mia Yave muna ntima ko, bayambula e ntaudi ye twelezi yau muna kiana.
22 Yave ovovese Mose vo: “Lambula koko kwaku kuna zulu kimana mvul’a matadi yanoka muna nsi yawonso ya Engipito,+ muna wantu ye bulu ye muna titi yawonso ya kiana ya nsi ya Engipito.”+
23 Mose olambwidi o nkau andi kuna zulu, Yave otwikidi miandazi ye mvul’a matadi, o tiya* tubwidi ova ntoto. Yave okwamanene nokesa mvul’a matadi muna nsi ya Engipito.
24 Vakedi mvul’a matadi, vakedi tiya twalekokanga vana kati kwa mvul’a matadi. Ngolo kikilu yakala; ke vakedi mvul’a matadi ya mpila yayi ko tuka Engipito yakitukila se zula.+
25 E mvul’a matadi ifwasidi lekwa yawonso muna yana, muna nsi yawonso ya Engipito, tuka wantu ye bulu, ifwasidi e mvudi yawonso yo tolola e nti miawonso mia kiana.+
26 Muna Ngosene kaka, muna mwakala Aneyisaele i ke mwanoka mvul’a matadi ko.+
27 Muna kuma kiaki, Faro otumisi Mose yo Arone, ubavovese vo: “Owau tu, nsumukini. O Yave wansongi, omono yo nkangu ame ku ngielele twina.
28 Nudodokela Yave kimana e miandazi miandi ye mvul’a matadi yafokoka. Ozevo, ikunusindika, ke nukala diaka mwamu ko.”
29 Mose ovovese Faro vo: “Vava ivaika mu mbanza, ilambula moko mame kwa Yave. E miandazi mifokoka, e mvul’a matadi ke ibwa diaka ko, kimana wazaya wo vo e nza Yave ovuidi yo.+
30 Kansi, kana nkutu i wau, nzeye wo vo ongeye ye ntaudi zaku ke nuvumina Yave wa Nzambi ko.”
31 E nti mia lino ye bale mifwasukidi, kadi e bale ilweke mu ntangw’a nkutika, e lino ivaikisi e mvuma.
32 Kansi, witi ye sepeleta ke ifwasukidi ko, kadi ke yakikudila ko.*
33 Mose okatukidi vana ndose a Faro, ovaikidi muna mbanza, olambwidi moko mandi kwa Yave, e miandazi ye mvul’a matadi ifokokele, e mvula iyambwidi bwa ova ntoto.+
34 Vava Faro kamwene vo e mvula, mvul’a matadi ye miandazi mifokokele, osumukini diaka yo badisa o ntim’andi,+ oyandi ye ntaudi zandi.
35 Faro okwamanene badisa o ntim’andi, kasindikidi Aneyisaele ko, wauna o Yave kavova muna Mose.+
Mvovo vana yand'a lukaya
^ Mvovo wa sina: “iwanda e nkome zame zawonso muna ntim’aku.”
^ Yovo “wafukiswa.”
^ Nanga miandazi miangolo uyikanga.
^ Yovo “ke yakibwakila ko.”
