Lusengomono kwa Yoane 22:1-21
22 Unsongele nkoko a maza ma moyo,+ wavelela nze tadi dia kristale, ukukulanga tuka vana kunda kia Nzambi ye kia Mwan’a meme+
2 yavana kati kwa nzila ampwena. Kuna konso simu dia nkoko wau, kukedi nti mia moyo miyimanga mpila 12 za bundu, miyimanga e bundu konso ngonde. O makaya ma nti miami ma wukila e zula.+
3 Ke mukala diaka sibu ko. Kansi e kunda kia Nzambi ye kia Mwan’a meme+ kikala omu mbanza, ntaudi zandi zikunsadila e salu kiavauka;
4 bemona e ndose andi,+ e nkumbu andi ikala vana mbunzu zau.+
5 O fuku ke ukala diaka ko,+ ke bevua diaka mfunu wa ntemo a mwinda ko yovo wa ntangwa, kadi Yave* wa Nzambi okubatemesena ntemo,+ beyala se atinu yamu mvu ya mvu.+
6 Umpovese vo: “Mvovo miami mia ziku* ye mia ludi;+ elo, Yave* wa Nzambi ona wavumunuina angunza,+ otumini mbasi andi kasonga kwa ntaudi andi o mambu mana se mevangama.
7 Tala! Ndweke mu nzaki.+ Nkwa kiese ndiona olundanga mambu ma ungunza wa nkanda wau.”+
8 Mono Yoane, mono yawá yo mona mambu mama. Vava yawá yo mona, mfukamene vana malu ma mbasi ona wansonga mambu mama kimana yansambila.
9 Kansi umpovese vo: “Keba! Kuvangi wo ko! Omono mpe i ntaudi nze ngeye ye mpangi zaku angunza ye awana belemvokelanga mambu ma nkanda wau. Sambila Nzambi.”+
10 Umpovese mpe vo: “Kulundi mambu ma ungunza wa nkanda wau ko, kadi e ntangwa yasikidiswa ifinamene.
11 Yambula o nkwa vilwa kakwamanana muna vilwa wandi, o nkwa usafu kakwamanana muna usafu wandi; kansi yambula o nsongi kakwamanana muna unsongi wandi, yambula o mvauki kakwamanana muna vauka kwandi.
12 “‘Wá! Ndweke mu nzaki, o nsendo wina yame, isendela konso muntu mun’owu wa mavangu mandi.+
13 Omono i Alfa ye Omega,*+ wantete ye wansuka, lubantiku ye mbaninu.
14 Akwa kiese awana basukwidi mvuatu miau,+ kadi baveno nswa wa dia e bundu ya nti amoyo+ yo kotela muna mavitu yamuna mbanza.+
15 Kuna mbazi i kwina e mbwa* ye awana besadilanga e mpandu ye akwa mavangu ma zumba* ye avondi a wantu ye asambidi a teke ye awonso ana bezolanga vova luvunu.’+
16 “‘Mono Yesu, ntumini mbasi ame kanusila umbangi wa mambu mama muna wete dia nkutakani. Omono i mwanzi ye mbongo a Davidi+ ye ntetembw’a mene-mene ya nkezimi.’”+
17 O mwanda ye ndumb’ansompi+ bevovanga vo: “Wiza!” Ndiona owidi yambula kavova vo: “Wiza!” Ndiona una ye vuina yambula keza;+ ndiona ozolele yambula kanua o maza ma moyo e ngovo.+
18 “Mpovele kwa konso ndiona owanga mambu ma ungunza wa nkanda wau vo: Konso ndiona okudikila mo diambu,+ o Nzambi okunkudikila e vuku yasonama mu nkanda wau;+
19 avo muntu okatwidi diambu muna mambu ma ungunza wa nkanda wau, Nzambi okatula kunku kiandi muna nti mia moyo+ yo kumvaikisa muna mbanz’avauka,+ mambu masonama muna nkanda wau.
20 “Ndiona osianga umbangi wa mambu mama ovovele vo: ‘Elo; ndweke mu nzaki.’”+
“Amen! Wiza, e Mfumu Yesu.”
21 Yambula e nsambu za Mfumu eto Yesu zakala ye aveledi.
Mvovo vana yand'a lukaya
^ Yovo “miafwana bundwa e vuvu.”
^ Yovo “A ye Z.” Alfa ye Omega i sono kiantete ye kiansuka muna masono ma Kingerekia.
^ I sia vo, awana bevanganga oma mangemi vana meso ma Nzambi.
^ Tala Nsas’a Mvovo, “Mavangu ma Zumba.”
