Lusengomono kwa Yoane 21:1-27
21 Mbwene zulu diampa ye nz’ampa;+ kadi e zulu diantete ye nza yantete iviokele,+ o kalunga+ kena diaka ko.
2 Mbwene mpe mbanz’avauka, Yerusaleme Yampa, ikulumukini tuka kuna zulu kwa Nzambi,+ yakubama nze ndumb’ansompi ukiviengese mu kuma kia nkaz’andi.+
3 I bosi, ngwidi nding’angolo itukidi vana kunda, ivovele vo: “Tala! E saba kia Nzambi kina yo wantu, yandi okala yau, oyau bekala nkangu andi. O Nzambi yandi kibeni okala yau.+
4 Okunguna mansanga mawonso muna meso mau,+ o lufwa ke lukala diaka ko,+ ngatu kala diaka dilu, yovo kazu ngatu mpasi.+ O mambu mantete maviokele.”
5 Ndiona ofongele vana kunda+ ovovele vo: “Tala! Mu vanga ngina e lekwa yawonso se yampa.”+ Ovovele mpe vo: “Soneka, kadi e mvovo miami mia ziku* ye mia ludi.”
6 Umpovese vo: “Malungane! Omono i Alfa ye Omega,* i lubantiku ye nsuka.+ Konso ona wina ye vuina, ikumvana o maza ma nto a moyo e ngovo.*+
7 Konso ona osunda, ovua mambu mama, omono ikala Nzambi andi, oyandi okala mwan’ame.
8 Kansi akwa unkuta ye awana bakondelo lukwikilu,+ ye akwa usafu ye ungemi, ye avondi a wantu,+ ye akwa mavangu ma zumba,*+ ye akwa mpandu, ye asambidi a teke ye akwa luvunu awonso,+ e kunku kiau kuna yanga dikweme tiya ye lengo.+ Ediadi lufwa lwanzole disunzulanga.”+
9 Mosi muna mbasi nsambwadi zina ye pidi nsambwadi yazala ye vuku nsambwadi yansuka,+ wizidi, umpovese vo: “Wiza, ikusonga ndumb’ansompi, nkaz’a Mwan’a meme.”+
10 Undete muna nkum’a mwanda vana mongo anene ye wandá, unsongele mbanz’avauka, Yerusaleme, ikulumukini kuna zulu, tuka kwa Nzambi+
11 ina yo nkembo a Nzambi.+ O ntemo andi nze tadi diantalu kikilu, nze tadi dia yasepi dikezimanga nze kristale.+
12 Ina ye yaka kiampwena, kiandá, ye mielo 12 ye mbasi 12 vana mielo, vana mielo vasonama e nkumbu za makanda 12 ma wan’a Isaele.
13 Kuna este mielo tatu, kuna node mielo tatu, kuna sude mielo tatu ye kuna weste mielo tatu.+
14 E yaka kia mbanza mpe kina ye nkubilwa 12 za matadi, i mûna mwasonama e nkumbu 12 za ntumwa+ za Mwan’a meme.
15 Ndiona ovovelenge yame okedi ye tutu dia wolo dia tezela kimana kateza e mbanza, mielo miandi ye yaka yandi.+
16 E mbanza ina ye ndambu yá zafwanana, o lambuka yo vonga mpe diau dimosi. O tezele e mbanza muna tutu, 12.000 ma stadia;* o lambuka, yo vonga yo lá kwafwanana.
17 Otezele mpe yaka yandi, 144 ma yikonso* mun’owu wa ntezelo a muntu, eyayi mpe i ntezelo a mbasi.
18 E yaka ya matadi ma yasepi,+ e mbanza ya wolo walembi sangwa lekwa nze pelo.
19 E nkubilwa ya yaka ya mbanza yaviengeselwa muna matadi mawonso mantalu: e nkubilw’antete ya yasepi, yanzole ya safiro, yantatu ya kankedone, ya nyá ya emeraude,
20 yatanu ya sadoni, yasambanu ya saredi, yansambwadi ya kerusolito, yanana ya berile, yavua ya topaze, yakumi ya kerusopraso, yakumi ye mosi ya yakinto, yakumi ye zole ya ametisite.
21 E mielo 12, pelola 12; konso mwelo wa pelola mosi. E nzila zampwena za mbanza za wolo walembi sangwa lekwa nze pelo.
22 Kimwene mo tempelo ko, kadi Yave* wa Nzambi wa Mpungu-ngolo+ i tempelo andi yo Mwan’a meme mpe.
23 E mbanza ke ivuidi ntangwa mfunu ko ngatu ngonde katemesa yo, kadi o nkembo a Nzambi utemenanga yo,+ o mwinda andi i Mwan’a meme.+
24 E zula ikangalela muna ntemo andi,+ e ntinu mia nza betwasa nkembo au muna yandi.
25 E mielo miandi ke mizikwa nkutu ko muna mwini, kadi o fuku ke ukala diaka ko.+
26 Betwasa nkembo yo zitu wa zula muna yandi.+
27 Konso lekwa kiasafuka, konso ona ovanganga mambu mangemi yo vova luvunu ke kota mo nkutu ko;+ awana kaka basonama muna nkand’a moyo a Mwan’a meme i bekota mo.+
Mvovo vana yand'a lukaya
^ Yovo “miafwana bundwa e vuvu.”
^ Yovo “A ye Z.” Alfa ye Omega i sono kiantete ye kiansuka muna masono ma Kingerekia.
^ Yovo “lembi futa nzimbu.”
^ Tala Nsas’a Mvovo, “Mavangu ma Zumba.”
