Zasoneka Luka 20:1-47
20 Lumbu kimosi vava kalonganga nkangu muna tempelo yo samuna nsangu zambote, nganga zambuta, asoneki ye akuluntu bezidi kwa yandi,
2 bamvovese vo: “Utusamunuina, mu nkia wisa ovangilanga e mambu mama? Yovo nani uvene wisa kiaki?”+
3 Ubavutwidi vo: “Mono mpe diambu ikunuyuvula, nunzayisa:
4 E mvub’a Yoane, ku zulu yatuka yovo kwa wantu?”
5 Bavovaziane vo: “Avo tuvovele vo, ‘Ku zulu,’ okutuyuvula vo: ‘Ekuma nualembi kunkwikidila?’
6 Kansi, avo tuvovele vo: ‘Kwa wantu,’ ozevo o nkangu awonso bekutuvondela muna matadi, kadi bena ye ziku vo Yoane i ngunza.”+
7 Bavutwidi vo ke bazeye ko kuna yatuka.
8 Yesu ubavovese vo: “Omono mpe kikunuvovesa ko kana mu nkia wisa ivangilanga o mambu mama.”
9 I bosi, otelele nkangu e kingana eki: “Muntu mosi okunini mpatu a vinyu+ yo sompeka yo kwa avati, wele kuna nsi yankaka, okedi kûna kolo kiayingi.+
10 Muna nsungi a nkutika, otumini ntaudi kuna kw’avati, bamvan’e kunku kiandi kia mbongo a mpatu a vinyu. Kansi avati, banwende, bansindikidi moko mankatu.+
11 Otumini diaka ntaudi ankaka. Oyandi mpe banwende, bansakanene, bansindikidi moko mankatu.
12 Otumini diaka ona wantatu; oyandi mpe banlwekele, banyinganese.
13 O mfumu a mpatu a vinyu ovovele vo: ‘Aweyi mpanga? Yambula yatuma mwan’ame, ona wanzolwa.+ Nanga zitisa bekunzitisa.’
14 Avati wau bàmwene, bavovazianene vo: ‘I yandi ndioyu osala ye fwa dia mpatu a vinyu. Yambula twamvonda, e fwa diakala se dieto.’
15 Dianu vo, bamvaikisi kuna mbazi a mpatu a vinyu, bamvondele.+ Ozevo, o mfumu a mpatu a vinyu aweyi kekubavanga?
16 Kwiza kekwiza kavonda avati awaya yo vana e mpatu a vinyu kwa wantu ankaka.”
Vava bawidi wo, bavovele vo: “Ke dilendi vangama ko!”
17 Ubatadidi, ovovele vo: “Ayeyi i nsas’a sono eki: ‘E tadi dina diabembolwa kw’atungi i diau diakituka se mbut’a tadi dia konko’?*+
18 Konso ona obwa vana tadi diadi, kosomoka kekosomoka.+ Konso ona dibwila, tufakesa dikuntufakesa.”
19 Asoneki ye nganga zambuta bavavidi kunkanga muna ntangwa yayina, kansi bamwene o wonga mu kuma kia nkangu, kadi babakwidi wo vo mu kuma kiau katelele kingana kiaki.+
20 Bankondelele, batumini wantu ana bafuta e nzimbu kuna sweki bavuna vo wantu ansongi, kimana bambakila muna mvovo miandi+ yo kunyekola kwa luyalu ye muna wisa kia nguvulu.
21 Banyuvuidi vo: “E Nlongi, tuzeye wo vo otoma vovanga yo longa, kutalanga ndose ko, kansi olongelanga nzil’a Nzambi muna ludi:
22 Nga diansongi kwa yeto dia futa e mpaku kwa Kaisa yovo ve?”
23 Kansi wau kazeye umpuki wau, ubavovese vo:
24 “Nunsonga denali.* E fwaniswa ye sono ina mo ya nani?” Bavutwidi vo: “Ya Kaisa.”
25 Ubavovese vo: “Ozevo, nuvana kwa Kaisa ina ya Kaisa,+ kwa Nzambi ina ya Nzambi.”+
26 Ke balendele kumbakila muna mvovo miandi ko vana vena o nkangu. Kansi wau basivikidi e mvutu zandi, badingalele kaka.
27 I bosi, vezidi Asaduki ankaka, ana bevovanga vo ke vena lufuluku ko,+ banyuvuidi vo:+
28 “E Nlongi, Mose watusonekena vo: ‘Avo muntu ofwidilu o mpangi, kasisa nkento, kansi yandi kawuti wana, o nleke andi obonga nkento ndioyo, kawutila mpangi andi o wana.’+
29 Vakala ye mpangi nsambwadi. Ona wantete osompele nkento, ofwidi, kansi kasisidi wana ko.
30 Ona wanzole,
31 ye ona wantatu mpe umbongele. Diau dimosi yau nsambwadi; bafwidi lembi sisa wana.
32 I bosi, o nkento mpe ofwidi.
33 Muna lufuluku, nkento a nani kekala? Kadi yau nsambwadi bambonga se nkaz’au.”
34 Yesu ubavovese vo: “O wan’a tandu* kiaki sompa besompanga yo sompeswa,
35 kansi, awana bebadikilwanga vo bafwana vua moyo muna tandu kikwiza yo fuluka muna mafwa, ke besompa ko, ngatu sompeswa.+
36 Ke balendi fwa diaka ko, bekala nze ambasi ye wan’a Nzambi, kadi i wan’a lufuluku.
37 Muna diambu dia mafwa mana mefuluka, o Mose nkutu wazayisa dio muna lusansu lwa nti walemanga, vava kayikila Yave* vo: ‘Nzambi a Abarayama, Nzambi a Isaki ye Nzambi a Yakobo.’+
38 Oyandi ke Nzambi a mafwa ko, kansi Nzambi y’awana bena o moyo, kadi kuna kwa yandi awonso bena o moyo.”+
39 Akaka muna asoneki bavutwidi vo: “E Nlongi, otomene vova.”
40 Ke bakedi ye unkabu wa kunyuvula diaka diambu ko.
41 I bosi, ubayuvuidi vo: “Ekuma bevovelanga vo Kristu i mwan’a Davidi?+
42 Kadi o Davidi yandi kibeni wavova muna nkand’a Nkunga vo: ‘Yave* ovovese Mfumu ame vo: “Vuanda oku koko kwame kwalunene
43 yavana isia e mbeni zaku se sikinua kia tambi yaku.”’+
44 Wau vo Davidi wanyikila vo Mfumu; aweyi kenena se mwan’andi?”
45 Ekolo nkangu awonso bewanga, ovovese alongoki andi vo:
46 “Nuyikenga ye asoneki, ana bazola kangadila muna mvuela yo kayiswa muna mazandu yo vuanda vana kunda yantete* muna masambilu ye vana fulu y’akwa tunda muna malambu,+
47 ana beyiyanga e nzo* za akento bafwilwa akala yo samba e sambu yandá muna kuyisonga kwa wantu. Awaya tumbu kisundidi bevewa.”
Mvovo vana yand'a lukaya
^ Mvovo wa sina: “ntu a konko.”
^ Tala Nsas’a Mvovo.
^ Yovo “yambote.”
^ Yovo “lekwa.”
