Zasoneka Luka 11:1-54
11 Lumbu kimosi, vava kamanisa osamba, mosi muna alongoki andi umvovese vo: “E Mfumu, utulonga o samba, nze una Yoane kalongela alongoki andi.”
2 Ubavovese vo: “Avo se nusamba, nuvova vo: ‘E Tata, yambula nkumbu aku yazitiswa.*+ E Kintinu kiaku kiza.+
3 Utuvana o dia* kweto kwa lumbu ke lumbu mun’owu wa nsatu za konso lumbu.+
4 Loloka o masumu meto,+ kadi oyeto mpe tulolokanga awonso ana batudia e mfuka;+ kutuyambula ko twabwa muna lutonto.’”+
5 I bosi, ubavovese vo: “Avo mosi muna yeno una yo nkundi, wele kwa yandi muna dingi-dingi, umvovese vo: ‘E nkundi, unsompeka mbolo zitatu,
6 kadi o nkundi ame una mu nkangalu unduakidi, kina ye lekwa ikumvana ko.’
7 Kansi, ndiona una muna nzo ovutwidi vo: ‘Yambula kuntokanesa. E kielo kizikamene kala, va mfulu ngina yo wan’ame; kilendi telama ko ngiza kuvana e lekwa.’
8 Inuvovese vo, avo muna kuma kia kikundi kiandi ke telama ko kamvana e lekwa, muna siandama kwandi+ i ketelamena kamvana konso kina kavuidi o mfunu.
9 Inuvovese vo, nukwamanana lomba,+ ozevo nuvewa; nukwamanana vava, ozevo nusolola; nukwamanana dodela, ozevo nuziulwilwa.+
10 Kadi konso ona olombanga, ovewa,+ konso ona ovavanga, osolola; konso ona ododelanga, oziulwilwa.
11 Nkia se vovo nuina, avo mwan’andi unlombele mbizi a maza, oyandi kayambula mbizi a maza, kamvana e nioka?+
12 Yovo unlombele diaki, kamvana nkutu?
13 Dianu vo, oyeno nuna yo bi, avo nuzeye vana tukau twambote kwa wan’eno, o Tata kuna zulu, nga ke luta vana mwand’avelela ko kwa awana bekunlombanga?”+
14 I bosi, ovaikisi nkuya kwa baba,+ o nkuya vava wavaika, e baba divovele. E ndonga isivikidi.+
15 Kansi, akaka vana bena bavovele vo: “Oyandi mu Belezebube* wa mfumu a nkuya kevaikisilanga e nkuya.”+
16 Akaka muna kuntonta, banlombele kabasong’e sinsu+ kituka kuna zulu.
17 Wau kazeye ngindu zau,+ ubavovese vo: “Konso kintinu kiavambana, bwa kibwa, e nzo yavambana bwa ibwa.
18 Diau dimosi, avo Satana uyivambanese, aweyi e kintinu kiandi kisikidila? Kadi oyeno nuvovele vo muna Belezebube ivaikisilanga e nkuya.
19 Avo omono mu Belezebube ivaikisilanga nkuya, ozevo wan’eno mu nani bevaikisilanga mio? Kiaki i kuma bekadila se afundisi eno.
20 Kansi, avo mu nlembo a Nzambi+ ivaikisilanga e nkuya, ozevo e Kintinu kia Nzambi kinulwakidi kikilu.+
21 O nkwa ngolo una ye nuaninua, avo olangididi o lûmbu lwandi, e salanganu yandi yawonso itaninua.
22 Kansi ndiona unsundidi e ngolo, avo wizidi kunuanisa yo kunsunda, kambaka e nuaninua yawonso ina kesianga e vuvu, ozevo okayanisa lekwa ina kabakidi kwa yandi.
23 Konso ona olembi kala ku sambu diame, i ntantu ame, konso ona ke kutikanga yame kumosi ko, mwanganesa kemwanganesanga.+
24 “Vava o mwand’a usafu uvaikanga muna muntu, ukwenda vumvulanga muna makanga mu vava fulu kia vundila, avo ke usolwele kio ko, uvovele vo: ‘Ivutuka muna nzo ame yatuka.’+
25 Vava ulwakanga, uwene nzo yatoma kombwa yo kubikwa.
26 I bosi ukwendanga, ubakanga mianda nsambwadi miankaka, emi misundidi o bi ke mu yandi kibeni ko, mikotanga yo vuanda mo. Muna mpila yayi, e kadilu kiansuka kia muntu ndioyo kiviokanga kina kiantete o bi.”
27 Ekolo kavovelenge mambu mama, nkento mosi vana vena ndonga otumbwidi e ndinga, umvovese vo: “Kiansambu e vumu kina kiànata ye ntulu zina wayema!”+
28 Kansi, ovovele vo: “Ke wau ko, akwa kiese awana bewanga e diambu dia Nzambi yo lunda dio!”+
29 E ndonga vava ikutakene, oyantikidi vova vo: “E mbandu yayi mbandu ambi; mbandu ivavanga e sinsu, kansi kana sinsu kimosi ke nusongwa kio ko, nanga vo sinsu kia Yona kaka.+
30 Kadi wauna Yona+ kakadila se sinsu kwa esi Ninive, i una mpe o Mwan’a muntu kekadila kwa mbandu yayi.
31 Muna lufundisu, o ntinu ankento a sude+ ofuluka kumosi yo wantu a mbandu yayi ye okubayelesa, kadi kuna nsuk’a nza katuka mu kwiza wá e ngangu za Solomo. Kansi tala! Ona osundidi Solomo una vava.+
32 Muna lufundisu, esi Ninive befuluka kumosi ye mbandu yayi yo yelesa yo, kadi baviluk’o ntima muna nsangu za Yona.+ Kansi tala! Ona osundidi Yona una vava.
33 Ke vena muntu ko okwika mwinda, kasia wo vana fulu kiaswekama, ngatu kuna nsi a mbangu,* kansi vana fulu kiazanguka kaka,+ kimana awana bekota mo bamona o ntemo.
34 O mwinda a nitu i disu diaku. Avo disu diaku dialungalala,* e nitu aku yawonso mpe itemokene; kansi, avo dia kimpala,* e nitu aku mpe ibukamene tombe.+
35 Dianu vo, lungalala kimana o ntemo wina omo ngeye walembi kala se tombe.
36 E nitu aku yawonso avo itemokene, kondwa ndambu a tombe, yawonso itemoka nze una mwinda ukuvaninanga o ntemo.”
37 Ekolo kavovelenge, Mfarisi mosi umbokele kenda dia yandi. Wele kota muna nzo andi, ovuende vana meza.
38 O Mfarisi osivikidi vava kamwene vo katekele kuyisukula* ko vitila kadia.+
39 O Mfumu umvovese vo: “Yeno Afarisi nuvelelesanga kuna mpiluk’a mbungwa ye longa, kansi muna kati nuazala ye loko yo bi.+
40 Nu mazowa! Ndiona wavanga oku mbazi, nga ke yandi ko wavang’omu kati e?
41 Kansi, nuvana yina yakati se tukau twa nkenda,* ozevo lekwa yeno yawonso iveleleswa.
42 “Tâtu kwa yeno Afarisi, kadi nuvananga tini kiakumi kia mana-nsusu, penganone* ye mvûdi yawonso,+ kansi nubembolanga unsongi yo zola kwa Nzambi! I mambu mama nufwete vanga, lembi bembola mambu mankaka.+
43 Tâtu kwa yeno Afarisi! e kuma kadi, nuzolanga kunda yantete* muna masambilu, yo kayiswa muna mazandu!+
44 Tâtu kwa yeno! e kuma kadi, nuna nze ziami ilembi moneka,*+ o wantu beviokela vo, ke bazeye wo ko!”
45 Mosi muna alongi a Nsiku umvutwidi vo: “E Nlongi, mambu mama ovovele, yeto mpe otiangwini.”
46 Ovovele vo: “Tâtu kwa yeno mpe alongi a Nsiku! Kadi yeno nukomekenanga wantu mazitu mampasi muna nata, kansi yeno kibeni, kana nkutu i nlembo eno mosi, ke nuviakanesa wo muna mazitu ko.+
47 “Tâtu kwa yeno! kadi nutunganga e ziami* ya ngunza zavondwa kwa mase meno.+
48 Kieleka, oyeno kana una vo nu mbangi za mavangu ma mase meno, kansi nukubatondanga, kadi oyau bavonda angunza,+ oyeno nutunganga e ziami yau.
49 Kiaki i kuma e ngangu za Nzambi zavovela vo: ‘Ikubatumina angunza ye antumwa; bevonda yo bangika akaka muna yau,
50 kimana o menga ma ngunza zawonso, mana mabunguka tuka kuna semo dia nza mavavilwa muna mbandu yayi,+
51 tuka muna menga ma Abele+ yamuna menga ma Zakariya, ona wavondelwa vana vena e ziku ye nzo.’*+ Kieleka, inusamunuini wo vo, menga mau omu mbandu yayi mekala.*
52 “Tâtu kwa yeno alongi a Nsiku! e kuma kadi, nukatwidi nsabi a zayi. Yeno kibeni ke nukotele mo ko, nukakididi awana bazolele mo kota!”+
53 Vava kavaikidi mo, asoneki ye Afarisi bayantikidi kuntokanesa yo kunyuvula yuvu yayingi,
54 bankondelele kimana bambakila muna mvovo miandi.+
Mvovo vana yand'a lukaya
^ Yovo “yavaulwa; yaveleleswa.”
^ Mvovo wa sina: “mbolo.”
^ Nkumbu yankaka ya Satana.
^ Yovo “mbangu ya tezela.”
^ Yovo “diakiá.” Mvovo wa sina: “diakumosi.”
^ Mvovo wa sina: “diambi; dia umpumbulu.”
^ I sia vo, kuyivelelesa mun’owu wa kinkulu kia Ayuda.
^ Yovo “tukau kwa asukami.” Tala Nsas’a Mvovo.
^ Muna Kingerekia, ‘pe’ga·non.’ Nti wasadilwanga mu wuka yo tomesa madia.
^ Yovo “yambote.”
^ Yovo “ziami yakondwa sinsu.”
^ Yovo “ziami ya luyindulu.”
^ Yovo “tempelo.”
^ Yovo “mevavilwa.”
