Zasoneka Luka 1:1-80
1 Wantu ayingi bakivene mu soneka mambu mavangama, mana tukwikidi mpe oyeto,+
2 wauna twazayisilwa mo kwa awana bakala mbangi za mambu mama+ ye ateleki a diambu dia Nzambi tuka kuna lubantiku,+
3 omono mpe wau yatoma fimpa mawonso tuka kuna lubantiku, mbwene vo diambote yasonekena mo muna ndandani, e mfumu Teofilo,+
4 kimana watoma zaya e ziku vo mambu mana walongwa maludi.+
5 Muna lumbu ya Erodi*+ wa ntinu a Yuda, mukedi nganga muna buka kia Abiya,+ e nkumbu andi Zakariya. O nkaz’andi mosi muna wan’amakento a Arone, e nkumbu andi Elisabete.
6 Yau awole wantu ansongi bakala vana ndose a Nzambi, kadi badiatilanga muna nkanikinu miawonso ye nsiku mia Yave* yo kondwa e tumbu.
7 Kansi ke bakala yo mwana ko, wau vo Elisabete sita kakala, yau awole mpe se anunu kwau.
8 Vava Zakariya kasadiding’e salu kia kinganga vana ndose a Nzambi muna buka kiandi,+
9 mun’owu wa fu kia anganga, e ntangw’andi a kota muna nzo avauk’a Yave*+ kayoka e ndumbu+ ifwene.
10 Nkangu wawonso usambidinge kuna mbazi muna ntangw’a yoka e ndumbu.
11 O mbasi a Yave* omonekene kwa yandi, otelamene kuna lunene lwa ziku dia ndumbu.
12 Zakariya vava kamwene, oyangamene o ntima, wonga umbakidi.
13 Kansi, mbasi umvovese vo: “E Zakariya, kumoni wonga ko, kadi e ndodokela zaku ziwakane kwa Nzambi, o nkaz’aku Elisabete okuwutila mwan’a yakala, okumvana e nkumbu vo Yoane.+
14 Okala ye yangi ye kiese, ayingi beyangalela luwutuku lwandi,+
15 wanene kekala vana meso ma Yave.*+ Kalendi nua vinyu ko ngatu konso malavu mankolwa,+ ozala yo mwand’avelela vitila luwutuku lwandi,*+
16 wan’a Isaele ayingi kevutulwisa kwa Yave* wa Nzambi au.+
17 Ovita kuna ndose andi muna mwanda ye ngolo za Eliya,+ ovilula e ntima mia mase muna wana,+ akolami mpe basikila muna ngangu zansongi, kakubikila Yave* nkangu akubama.”+
18 Zakariya ovovese mbasi vo: “Aweyi ndenda kadila ye ziku kia diambu diadi? Kadi se i nunu, o nkaz’ame mpe se nunu.”
19 Mbasi umvutwidi vo: “I Ngambiele,+ itelamanga vana ndose a Nzambi,+ ntuminu ngiza mokena yaku, yo kusamunuina e nsangu zazi zambote.
20 Wá, okituka se baba, kuvova diaka ko yamuna lumbu kina mevangama o mambu mama, kadi kukwikidi muna mvovo miame ko mina milungana muna kolo kiasikidiswa.”
21 Muna kolo kiokio, o nkangu ukwamanene vingila Zakariya, usivikidi wau kazingidi kwayingi muna nzo avauka.
22 Vava kavaikidi, kalendele vovana yau ko, babakwidi wo vo mona-meso kamwene muna nzo avauka. Ovangidi kaka e sinsu kwa yau, okedi se baba.
23 E lumbu yandi ya salu kiavauka* vava yalunga, wele kuna nzo andi.
24 Vava vavioka e lumbu yayingi, nkaz’andi Elisabete oyimiti, ukiswekele ngonde tanu, oku vo:
25 “I wau wuwu kampangidi o Yave* muna lumbu ina kansidi e sungididi. Okatwidi luvezo lwame vana vena o wantu.”+
26 Vava kalungisi e ngonde sambanu, Nzambi otumini mbasi Ngambiele+ kuna mbanza mosi ya Ngalili, ina ye nkumbu vo Nazarete,
27 kuna kwa mwenze+ wazitikilwa kwa yakala dimosi wakala ye nkumbu vo Yosefe, musi nzo a Davidi, e nkumbu a mwenze, Maria.+
28 Vava mbasi kakotele muna kakala, umvovese vo: “Kiambote kiaku, ngeye nkwa dienga, o Yave* una yaku.”
29 Kansi, otokane kikilu mu kuma kia mvovo miandi, ovavidi zaya e nsasa nkayisa yayi.
30 O mbasi umvovese vo: “Kumoni wonga ko, e Maria, kadi Nzambi usongel’e dienga.
31 Tala! Ongeye oyimita yo wuta mwan’a yakala,+ okumvana e nkumbu vo Yesu.+
32 Nene kekala,+ Mwan’a Mpungu-nene keyikilwa,+ Yave* wa Nzambi okumvana e kunda kia kimfumu kia Davidi wa se diandi,+
33 okala se Ntinu muna nzo a Yakobo yakwele mvu, e Kintinu kiandi ke kikala ye nsuka ko.”+
34 Kansi, Maria ovovese mbasi vo: “Aweyi divangamena ediadi, wau vo kisidi vukana ye yakala ko?”+
35 Mbasi umvutwidi vo: “O mwand’avelela ukwiza mu ngeye,+ o nkum’a Mpungu-nene ukuyitalela. Dianu vo, ndiona owutwa oyikilwa vo wavelela,+ Mwan’a Nzambi.+
36 Elisabete wa yitu kiaku, oyu oyikilwanga vo sita, yandi mpe lukau lwa mwan’a yakala kabakidi muna kinunu kiandi, eyayi i ngonde andi yasambanu;
37 kadi kuna kwa Nzambi kavena diambu ko dilenda funga.”+
38 Maria ovutwidi vo: “Mono i ntaudi a Yave! Yambula diambu diaku diavangama omu mono.” Mbasi okatukìdi vana kena.
39 E lumbu yayina, Maria otelamene, wele nswalu kuna zunga kia miongo, kuna mbanza mosi ya Yuda,
40 okotele muna nzo a Zakariya, okayisi Elisabete.
41 Elisabete vava kawidi e nkayiswa kakayisu kwa Maria, mwana onikukini muna vumu kiandi, Elisabete ozele yo mwand’avelela,
42 ovovele muna nding’angolo, oku vo: “Osambwilu vana vena akento awonsono, isambwilu mpe e mbongo a vumu kiaku!
43 Aweyi nginina ye lau diadi diakingulwa kwa ngudi a Mfumu ame?
44 Kadi e zú dia nding’aku vava diwakane mu matu mame, o mwana mu vumu kiame onikukini kuna kiese.
45 Kiese kwa ndiona okwikidi wo, e kuma kadi mambu mana kavoveswa kwa Yave* lungana melungana.”
46 Maria ovovele vo: “Moyo ame utundidikidi Yave,*+
47 o ntim’ame uyangalele muna Nzambi wa Mvuluzi ame,+
48 kadi watadidi o lusakalalu lwa ntaudi andi a nkento.+ Tuka wau, mbandu zawonso zikungikila vo i nkwa nsambu,+
49 kadi o Nengolo ovangidi mambu manene kwa mono, e nkumbu andi yavauka,+
50 kadi muna mbandu ye mbandu, osonganga e nkenda zandi kw’awana bekumvuminanga.+
51 Ovangidi owu wankuma muna koko kwandi; omwanganese akwa lulendo muna makani ma ntima miau.+
52 Obwisidi ayadi muna kunda yau,+ otundidikidi awana basakalele;+
53 awana befwanga e nzala ubayukutisi ye lekwa yambote,+ osindikidi mvuama moko mankatu.
54 Osadisi Isaele wa selo kiandi muna kunsungamesa e nkenda zandi,+
55 una kavovesa mase meto, kuna kwa Abarayama ye mbongo andi,+ yakwele mvu.”
56 Maria tezo kia ngonde tatu kakala yandi, i bosi kavutuka kuna nzo andi.
57 E ntangw’a Elisabete ya wuta ifwene, owutidi mwan’a yakala.
58 Esi belo kiandi ye yitu yandi bawidi vo Yave* unsongele nkenda zayingi, dianu vo bayangalele yandi.+
59 Muna lumbu kina kia nana bele zengesa o mwana,+ bazolele kumvana e nkumbu ya se diandi Zakariya.
60 Kansi, o ngudi andi ovutwidi vo: “Ve! Yoane keyikilwa.”
61 Bamvovese vo: “Muna yitu yaku ke mosi ko una ye nkumbu yayi.”
62 Bayuvuidi se diandi muna sinsu, kana aweyi kazolele vo kayikilwa.
63 Olombele babu kia sonekena, osonekene vo: “Yoane i nkumbu andi.”+ Yau awonso basivikidi.
64 Vana vau o nu’andi uziukidi, o lubini lwandi mpe luzezele, oyantikidi vova+ yo kembelela Nzambi.
65 Awonso bakala kuna belo kiau bamwene o wonga, muna londe lwawonso lwa Yuda mambu mama mawonso bamokenenanga.
66 Awonso bawá mo, balundi mo muna ntima miau, bavovele vo: “Aweyi kekala o mwana ndioyo?” Kadi o koko kwa Yave* kwakala yandi.
67 I bosi, Zakariya wa se diandi ozele yo mwand’avelela, osakwidi, oku vo:
68 “Yambula kakembelwa o Yave* wa Nzambi a Isaele,+ e kuma kadi ovutwidi e sungididi kiandi kwa nkangu andi muna kubakûla.+
69 Utuvaikisidi mpok’a luvuluzu*+ muna nzo a Davidi wa selo kiandi.+
70 Kadi i diau kavova muna nua mia ngunza zandi zavelela tuka kuna nz’ankulu.+
71 Wavova vo okutuvuluza kuna kw’atantu eto, ye muna moko m’awonso bekutumenganga;+
72 okutusonga e nkenda mun’owu wa nsilu kasia kwa mase meto, yo sungamena e kangu diandi diavauka,+
73 i ndofi kadila se dieto Abarayama.+
74 Vava kekutuvuluza muna moko m’atantu eto, okutuyambula twansadila kondwa wonga,
75 kuna kwikizi ye unsongi e lumbu yeto yawonso.
76 Kansi, vo i ngeye, e mwana, ngunz’a Mpungu-nene oyikilwa, kadi oviti kuna ntwal’a Yave* mu kubika e nzila zandi,+
77 ozayisa o luvuluzu kwa nkangu andi muna luloloko lwa masumu mau,+
78 mu kuma nkenda za Nzambi eto. Muna nkenda zazi tumona ntemo utuka kuna zulu ukezima nze nkielelo a kuma,
79 otemesa ntemo kw’awana bafongele vana tombe ye kini kia lufwa,+ kimana twasingika o malu meto muna nzil’a luvuvamu.”
80 O mwana okudidi yo kumama muna mwanda, okedi muna makanga, yavana kialwaka e lumbu kayisonga kuna kwa Isaele.
Mvovo vana yand'a lukaya
^ Tala Nsas’a Mvovo.
^ Yovo “tuka muna vumu kia ngudi andi.”
^ Yovo “salu kiandi muna wete dia nkangu.”
^ Yovo “mvuluzi ankuma.” Tala Nsas’a Mvovo, “Mpoka.”
