Kuna kwa Esi Efeso 4:1-32
4 Ozevo, mono mbakami+ muna Mfumu, inudodokele nuakangalanga e nkangala ifwene+ e mboka ina nuabokelwa,
2 yo lulembamu yo lusakalalu lwawonso+ yo luzindalalu,+ nuyambulwilanga mambu muntu yo nkwandi muna zola,+
3 nusianga e sungididi kia tatidila kintwadi kia mwanda muna kangwa kia ungudi.+
4 Vena ye nitu imosi,+ mwanda umosi,+ wauna venena ye vuvu kimosi+ kaka kina nuabokelelwa;
5 Mfumu mosi,+ lukwikilu lumosi, luvubu lumosi;
6 Nzambi mosi ye Se dia wantu awonso, ona una vana ntandu a wantu awonso, kw’awonso ye muna awonso.
7 Konso muntu mu yeto wavewa e nsambu muna tezo kia lukau lwa ngovo Kristu kavana.+
8 Kadi e sono kivovanga vo: “Vava katomboka kuna zulu wanata abakami; wavana wantu se tukau.”+
9 Ozevo, o mvovo “katomboka” aweyi usongele? Usongele vo wakulumuka mpe muna nsi, i sia vo, muna ntoto.
10 Ndiona wakulumuka i yandi mpe watomboka+ vana ntandu a zulu diawonso,+ kimana kalunganesa mambu mawonso.
11 Oyandi wavana ankaka se ntumwa,+ ankaka se ngunza,+ ankaka ateleki a nsangu zambote,+ ankaka se avungudi ye alongi,+
12 ye kani dia singika* avauki muna salu kia uselo, muna vangamesa e nitu a Kristu,+
13 yavana yeto awonso tulwaka muna kintwadi kia lukwikilu yo vua zayi wasikila wa Mwan’a Nzambi, kimana twazikuka+ yo lwaka emvimba muna tezo kia kiwuntu kia Kristu.
14 Ozevo, ke tukadi diaka nze yingiana-ngiana ko, twanatumunuanga kwa mavuku, yo tungianiswa kwa tembwa yawonso ya malongi ma luvunu,+ muna ngangu za wantu, muna umpuki wa ndekwa zambi.
15 Kansi wau tuvovanga e ludi, yambula twanungunuka muna mambu mawonso, muna zola, mun’owu wa Kristu una vo i ntu.+
16 Muna yandi, e nitu yawonso+ yayikakiana kimana e yîkwa yawonso yasalanga kumosi muna lungisa mambu mavuilu o mfunu. Vava konso kîkwa kisalanga una ufwene, disadisanga e nitu yanungunuka yo kumikwa muna zola.+
17 Mpovele yo sia umbangi muna Mfumu vo, ke nufwete kangalela diaka ko nze esi zula+ ana bekangalelanga muna ngindu zau za kizowa.*+
18 E nyindu miau mina muna tombe yo vambana muna moyo watuka kwa Nzambi, muna kuma kia bubu kiau yo bâla kwa ntima miau.
19 E ntona zau zayiva kikilu, bakivana muna mavangu mansoni,*+ bevanganga mambu mawonso ma usafu kuna loko.
20 Kansi, oyeno ke nualongoka ko vo Kristu i wau kena,
21 Yesu walonga e ludi, avo muna yandi nuawila yo longelwa muna yandi, ozevo nuzeye mambu mama mawonso.
22 Nualongwa kimana nuakatula kiwuntu kiankulu+ kina kiafwanana ye kadilu kieno kiankulu, kina kiyiviswanga mun’owu wa zolela yandi ya luvuki.+
23 Nukwamanana vanguluka muna nyindu mieno,*+
24 nuvuata kiwuntu kiampa+ kina kiavangilwa muna luzolo lwa Nzambi, muna unsongi wakieleka ye kwikizi kiakieleka.
25 Dianu vo, wau nuayambula luvunu, nuvovanga e ludi muntu yo nkwandi,+ kadi tu yîkwa yayikakiana.+
26 Numona makasi, kansi ke nusumuki ko;+ ke nufungi makasi ko yakuna ndimuk’a ntangwa;+
27 ke nusisila Nkadi ampemba nzila ko.*+
28 Ndiona oyiyanga, kayiyi diaka ko; kansi yambula kasalanga ye fululu kiawonso, kimana kasala e salu kiambote muna moko mandi,+ kakala ye kina kekayila ndiona okondelo.+
29 Muna nua mieno ke mulendi vaika mvovo miambi ko,+ kansi nuvova kaka edi diambote mu kumika akaka muna ntangwa ifwene, kimana diatwasa nluta kw’awana bewá dio.+
30 Ke lukendeleka mwand’avelela a Nzambi ko,+ una nuasilwa e dimbu+ yamuna lumbu kia luvevoko muna lukûlu.+
31 Nuyambula e fidititi diawonso,+ makasi, nganzi, ntantani, mvovo mialutiangu+ ye mbi yawonso.+
32 Kansi nusonganga ngemba kwa muntu yo nkwandi, nukala yo walakazi,+ nulolokanga muntu yo nkwandi kuna mvevo wauna o Nzambi kanulolokela muna Kristu.+
Mvovo vana yand'a lukaya
^ Yovo “longa.”
^ Yovo “mpavala; vavala.”
^ Muna Kingerekia, a·sel′gei·a. Tala Nsas’a Mvovo.
^ Yovo “muna ngolo za nyindu mieno.” Mvovo wa sina: “muna mwand’a ntima mieno.”
^ Yovo “ke nusisila Nkadi ampemba fulu ko.”
