Daniele 2:1-49
-
Nebukandesa wa ntinu olotele ndozi yampimpita (1-4)
-
Ke vena nkwa ngangu ko olendele sasila e ndozi (5-13)
-
Daniele olombele lusadisu kwa Nzambi (14-18)
-
Osanisini Nzambi wau kasengomwene mbumba (19-23)
-
Daniele ozayisi ndozi kwa ntinu (24-35)
-
Nsas’a ndozi (36-45)
-
Tadi dia Kintinu dikosomwene teke (44, 45)
-
-
Daniele ozitisu kwa ntinu (46-49)
2 Muna mvu wazole wa luyalu lwandi, Nebukandesa olotele ndozi zayingi, oyangamene o ntima,*+ kalendele diaka leka ko.
2 O ntinu obokelese nganga za mpandu, nganga za ngombo, ndoki ye Akaladi* kimana bazayisa o ntinu e ndozi kalotele. Ozevo, bakotele yo kuyisunzula kwa ntinu.+
3 Ntinu ubavovese vo: “Ndozi ndotele, ngiangamene kikilu o ntima,* nzolele zaya e ndozi ina ndotele.”
4 Akaladi bavutwidi kwa ntinu muna nding’a Ki-aramiti vo:*+ “E ntinu, zinga yakwele mvu. Zayisa e ndozi olotele kwa ntaudi zaku, oyeto tusasila yo.”
5 Ntinu ovutwidi kwa Akaladi vo: “Ediadi i diambu diansuka mpovele: Avo ke nunzayisi ko e ndozi ina ndotele ye nsas’andi, zengononua nuzengononua, e nzo zeno zikituka se kozo.*
6 Kansi avo nunzayisi ndozi ye nsas’andi, ikunuvana tukau, nsendo ye nkembo anene.+ Ozevo, nunzayisa ndozi ye nsas’andi.”
7 Bavutwidi diaka vo: “Yambula ntinu kazayisa ndozi kwa ntaudi zandi, oyeto tuzayisa e nsas’andi.”
8 O ntinu ovutwidi vo: “Nzeye wo vo ntangwa nuvavanga, kadi nuzeye nzengo zame zansuka muna diambu diadi.
9 Avo ke nuzayisi e ndozi ame ko, yeno awonso tumbu kimosi nuvewa. Kansi nuwizanenge kimana nuanzayisa diambu dialuvunu yo kumpunginika yavana mambu mesoba. I dianu vo nunzayisa e ndozi, i bosi izaya wo vo nulenda yo kunsasila.”
10 Akaladi bavutwidi kwa ntinu vo: “Ova nza ke vena muntu ko olenda vanga dina ntinu kalombele, kadi ke vena ntinu anene ko ngatu nguvulu walomba kala e diambu diadi kwa ngang’a mpandu yovo ngang’a ngombo ngatu kwa Nkaladi.
11 Dina kalombele o ntinu diampimpita kikilu, ke vena muntu ko olenda dio zayisa kwa ntinu, nanga zinzambi kaka, zina ke zikalanga yo wantu ko.”
12 Vava kawidi ediadi, ntinu ofungidi kikilu makasi, okanikini vo akwa ngangu awonso a Babele bavondwa.+
13 Vava nkanikinu wavewa, ekolo akwa ngangu se bevondwa, bavavidi mpe Daniele ye akundi andi kimana bavondwa.
14 I bosi Daniele kuna ndekwa yo lulungalalu ovovese Arioke wa mfumu a ayingidi a ntinu, ona wavaika kimana kavonda akwa ngangu awonso a Babele.
15 Oyuvuidi Arioke wa mfumu a ayingidi a ntinu vo: “Ekuma ntinu kavanini nkanikinu wau wampasi?” Arioke ozayisi diambu diabwa kwa Daniele.+
16 Dianu vo, Daniele wele kuyisunzula kwa ntinu, olombele kimana kamvana e ntangwa muna zayisa nsas’a ndozi kwa ntinu.
17 I bosi Daniele wele kuna nzo andi, ozayisi e diambu diabwa kw’akundi andi Kananiya, Misaele yo Azareya.
18 Ubalombele vo basamba kwa Nzambi a zulu kabafwila e nkenda mu kuma kia mbumba yayi, kimana Daniele ye akundi andi balembi vondwa kumosi ye akwa ngangu a Babele.
19 I bosi, e mbumba yasengomonua kwa Daniele muna mona-meso muna fuku.+ Ozevo, Daniele okembelele Nzambi a zulu.
20 Daniele ovovele vo:
“Yambula nkumbu a Nzambi yakembelwa yakwele mvu,*Kadi yandi kaka una ye ngangu yo nkuma.+
21 Osobanga kolo ye nsungi,+Okululanga atinu yo tundidika atinu,+Ovananga ngangu kwa nkwa ngangu yo zayi kw’awana bena yo umbakuzi.+
22 Osengomonanga mambu masina yo mambu maswekama,+Ozeye mambu mena muna tombe,+Muna yandi i mwina ntemo.+
23 Vo i ngeye, e Nzambi a mase mame, ivutwidi matondo yo nkembo,Kadi ngeye umpene ngangu yo nkuma.
Owau unsengomwene mana tulombele;Utusengomwene diambu ditokanesanga o ntinu.”+
24 I bosi, Daniele wele kwa Arioke, ona ntinu kavana kiyekwa kia vonda akwa ngangu a Babele,+ umvovese vo: “Kuvondi akwa ngangu a Babele ko. Undata vana ndose a ntinu, izayisa nsas’a ndozi kwa ntinu.”
25 Muna nzaki zawonso, Arioke onete Daniele kwa ntinu, umvovese vo: “Nsolwele muntu vana vena abakami a Yuda,+ ona olenda zayisa nsas’a ndozi kwa ntinu.”
26 O ntinu vovese Daniele, ona wavewa e nkumbu a Beletesasa vo:+ “Nga olenda kunzayisa ndozi ndotele ye nsas’andi?”+
27 Daniele ovutwidi kwa ntinu vo: “Kavena nkwa ngangu ko, ngang’a ngombo, ngang’a mpandu, ngatu mfimpi a ntetembwa olenda zayisa kwa ntinu e mbumba ina kazolele zaya.+
28 Kansi, vena yo Nzambi kuna zulu ona osengomonanga e mbumba,+ yandi ozayisi Nebukandesa wa ntinu mambu mevangama muna lumbu yambaninu. E ndozi aku ye mona-meso omwene vana mfulu aku i yau yayi:
29 “Vo i ngeye, e ntinu, vava okedi vana mfulu aku, oyindwidi mana mevangama kuna ntwala, o Nsengomoni a mbumba uzayisi mambu mevangama.
30 E mbumba yayi yisengomweno kwa mono ke mu kuma kia sia ko vo mono ndutidi wantu ankaka e ngangu; kansi yasengomona e nsas’andi kwa ntinu kimana wabakula e ngindu za ntim’aku.+
31 “Ongeye e ntinu, wau otadidinge, mwene teke kiampwena. E teke kiaki kiampwena yo kezima, kitelamene vana ndose aku, e mpw’andi yansisi kikilu.
32 O ntu a teke wa wolo wakenzwa,+ e ntulu ye moko mandi ma palata,+ e vumu ye matungi ma malu mandi ma nsongo,+
33 e nkwakwa mia malu mandi mia sengwa,+ e tambi yandi ndambu sengwa e ndambu tûma.*+
34 Ekolo otadidinge, e tadi didungwinu kuna mongo, ke mu moko ko, ditelele e teke muna malu mandi ma sengwa ye tûma yo kosomona mo.+
35 I bosi, e sengwa, tûma, nsongo, palata ye wolo, yawonso ikosomokene yo kituka nze vevele ivevomokanga vana bundilwa muna nsungi a sivu; yawonso ivevomweno kwa tembwa yavana ke vasolokele diaka lekwa ko. Vo i tadi dina dikosomwene e teke, dikitukidi se mongo ampwena, dilungidi e nza yawonso.
36 “Eyayi i ndozi olotele, owau tuzayisa nsas’andi kwa ntinu.
37 Ongeye, e ntinu—ntinu atinu ona Nzambi a zulu kavene kimfumu,+ nkuma, ngolo ye nkembo,
38 vana koko kwandi i kayekwele wantu, konso kuna bezingilanga, ye bulu ya mfuta ye nuni za zulu, ona kavene kimfumu kia yau awonso+—ongeye i ntu a wolo.+
39 “Kansi vetongama kintinu kiankaka kikunlandila,+ kina ke kikusunda ko, i bosi, vevaika diaka kintinu kiankaka kiatatu, kia nsongo, kiyala nza yawonso.+
40 “Vo i kintinu kiaya, kiangolo kikala nze sengwa.+ Kadi wauna e sengwa kikosomonanga yo wula yawonso, elo, wauna e sengwa kizengononanga, e kintinu kiaki kikosomona yo wula yawonso yayi.+
41 “Wauna wamwena malu ye nlembo mia malu minina ndambu tûma, e ndambu ya sengwa, e kintinu vambulwa kivambulwa, kansi e ndambu yabala kwa sengwa ikala mûna, wauna omwenene e sengwa kiasangwa tûma twaleboka.
42 Wauna e nlembo mia malu minina ndambu sengwa, e ndambu tûma, i una kikala e kintinu, ndambu yangolo, e ndambu yaleboka.
43 Wauna omwenene sengwa kiasangwa yo tûma twa leboka, oyau besangana yo nkangu;* kansi ke beyikana ko wauna sengwa ke kisangananga ye tûma ko.
44 “Muna lumbu ya atinu awaya, o Nzambi a zulu otongeka kintinu+ kina ke kifwaswa ko.+ E kintinu kiaki ke kivewa kwa nkangu wankaka ko.+ Kikosomona yo sukisa yintinu yayi yawonso,+ kiau kaka kiyala yakwele mvu,+
45 wauna wamwenene tadi dia dungunua muna mongo, kansi ke mu moko ko, dikosomwena e sengwa, nsongo, tûma ye palata ye wolo.+ O Nzambi Anene osengomwene kwa ntinu e diambu divangama kuna ntwala.+ E ndozi ya kieleka, nsas’andi yafwana bundwa e vuvu.”
46 I bosi, Nebukandesa wa Ntinu ofukamene vana vena Daniele ye ndose vana ntoto yo kumvumbamena. Okanikini vo bamvana lukau ye ndumbu.
47 Ntinu ovovese Daniele vo: “Kieleka, o Nzambi eno i Nzambi a zinzambi, Mfumu atinu yo nsengomoni a mbumba, kadi ongeye olendele sengomona e mbumba yayi.”+
48 O ntinu otundidikidi Daniele yo kumvana ulolo wa tukau twantalu, untumbikidi se nyadi a mvivu wawonso wa Babele+ ye mfidi akwa ngangu awonso a Babele.
49 Muna ndomb’a Daniele, o ntinu otumbikidi Saderake, Mesake yo Abedenengo+ se atwadisi a mvivu wa Babele, kansi Daniele kuna lûmbu lwa ntinu kasadilanga.
Mvovo vana yand'a lukaya
^ Mvovo wa sina: “o mwand’andi uyangamene.”
^ I sia vo, buka kia wantu bakibadikilanga se nganga za ngombo ye afimpi a ntetembwa.
^ Mvovo wa sina: “O mwand’ame uyangamene kikilu.”
^ Daniele 2:4b yakuna 7:28 mu Ki-aramiti yasonekenua.
^ Nanga, “fuku dia titi; fuku dia nkal’a ngombe.”
^ Yovo “yamu mvu ya mvu.”
^ Yovo “tûma twawumbwa.”
^ Yovo “mbongo a nkangu.”
