Daniele 11:1-45
11 “Vo i mono, muna mvu una wantete wa luyalu lwa Dareyuse+ wa Madai, ntelamene kimana yankasakesa ye kuntanina.*
2 Mana ikuzayisa owau ma ludi:
“Atinu tatu diaka bebundumuka muna Parasa, ndiona wayá osunda awonso muna wokesa kimvuama. Vava kekumama mu kuma kia kimvuama kiandi, ovukumuna awonso batelamena kintinu kia Ngerekia.+
3 “Vetelama ntinu angolo, e wisa kiandi kwandá kilwaka+ yo vanga mana kazolele.
4 Kansi, vava ketelama, e kintinu kiandi kitololwa yo kayaneswa kwa tembwa yau yá ya zulu,+ kansi ke kwa wan’andi ko, e wisa kiau ke kikala kiafwanana ko ye wisa kia luyalu lwandi; kadi e kintinu kiandi vuzwa kivuzwa yo vewa wantu akaka, ke kwa yau ko.
5 “O ntinu a sude, i sia vo, mosi muna akuluntu andi okala ye ngolo; kansi mosi okunsunda yo yala ye wisa kiampwena lutila e wisa kiandi.
6 “E mvu vava mivioka beyikakiana, o mwan’ankento a ntinu a sude okwiza kwa ntinu a node kimana bakanga e kangu. Kansi ke simbinina nkum’a koko kwandi ko; o ntinu ke telama ko, ngatu telamesa koko kwandi; o nkento oyekolwa y’awana bantwese ye ona wanwuta ye ona wankumika muna kolo kiakina.
7 Mosi otuka muna ntombo a mianzi mia mwan’ankento otelama vana fulu kiandi, okwiza kwa vu kia makesa, okwiza nuanisa nzo zangolo za ntinu a node, okubanuanisa yo kubasunda.
8 Okwiza tuka kuna Engipito ye nzambi zau, teke yau ya sengwa, lekwa yau yantalu ya palata, ya wolo ye abakami. Muna miaka mvu, ke finama ntinu a node ko,
9 okwiza nuanisa kintinu kia ntinu a sude, kansi ovutuka kuna nsi andi.
10 “O wan’andi bekubama mu nwana vita, bekutakesa makesa mayingi, ma vu kiangolo. Onungunuka yo fwasakesa yawonso nze kizalu. I bosi ovutuka, kanuana yavana kelwaka muna nzo andi yangolo.
11 “O ntinu a sude ofunga kikilu makasi, ovaika kimana kenda kunuanisa, i sia vo, kanuanisa ntinu a node; okutakesa ndong’ayingi, kansi e ndonga iyekolwa vana moko ma ndiona.
12 E ndonga inatwa. O ntim’andi utundalala, obwisisa yazi ya mafunda; kansi kesadila wisa kiandi ko.
13 “O ntinu a node ovutuka yo kutakesa ndong’ayingi ivioka ina yantete; kuna mbaninu a kolo, e mvu vava mivioka, olwaka ye vu kiampwena kia makesa ye mavua mayingi.
14 Muna kolo kiakina engi betelama banuanisa ntinu a sude.
“Akwa nsoki vana vena nkangu aku betelama mu vava kitula e mona-meso se kiakieleka; kansi sakuba beta.
15 “O ntinu a node okwiza yo bumbika kundubulu kia vita, obaka mbanza angolo. E vu kia* sude ke kisikila ko, kana nkutu makesa mandi mana masolwa; ke bekala ye nkuma ko muna sunda.
16 Ndiona okwiza kunuanisa ovanga mana kazolele, ke mosi ko otelama vana ndose andi. Otelama muna Nsi a Nkembo,*+ o nkum’a lufwasu ukala vana koko kwandi.
17 Obaka nzengo za kwiza* ye ngolo zawonso za kintinu kiandi, okanga yandi e kangu; osikila muna mana kevanga. Vo i mwan’ankento oyekolwa vana moko mandi kimana kamfwasa. O mwan’ankento ke telama ko, ke ke kala diaka se wandi ko.
18 Ovilula ndose andi muna nsi za nlambu a kalunga kimana kabaka zo. Kansi mfumu mosi a makesa osukisa lusembo lwandi, i dianu vo lusembo lwandi ke lukala diaka ko. Vutulula kekumvutulula lusembo.
19 I bosi, ovilula ndose andi muna nzo zangolo za nsi andi, ota sakuba yo bwa, ke sololwa ko.
20 “Vana fulu kiandi vetelama muntu oviokesa mvakulwisi a mpaku* muna kintinu kia nkembo, kansi vioka lumbu yakete okosomonua, ke mu makasi ko ngatu muna vita.
21 “Vana fulu kiandi vetelama ona wavezwa, ke bekumvana zitu wa kintinu ko; olwaka muna ntangw’a luvuvamu,* otambula kintinu muna malengo.*
22 E vu kia makesa* mena nze kizalu mekukulwiswa mu kuma kiandi, mekosomonua; o Mfidi+ a kangu+ mpe okosomonua.
23 Muna kuma kia kangu bekanga yandi, osadila luvunu, otelama yo kumikwa kwa zula kiandwelo.
24 Muna ntangw’a luvuvamu, okota muna fulu ya mvivu isundidi umvuama yo vanga mana ke balenda vanga ko mase mandi ngatu akulu andi. Okaya e lekwa ina yabakwa, sanzu ye mavua vana vena nkangu; okana nuanisa nzo zangolo, kansi mu fikolo kaka.
25 “Oyikakesa o nkum’andi ye unkabu wandi* muna nuanisa ntinu a sude ye makesa mayingi, o ntinu a sude okubama ye vu kiampwena ye kia ngolo muna nuana e vita. Ke telama ko, kadi bekana makani mambi mu kuma kiandi.
26 Awana bedianga madia mandi yau bekuntwasila lufwasu.
“Vo i makesa mandi, bevempolwa,* engi bevondwa.
27 “Vo i atinu awaya yau wole, e ntima miau mikubafila mu vanga mambu mambi, bevuanda va meza mamosi muna vova luvunu kwa muntu yo nkwandi. Kansi ke vesikila diambu ko, kadi e mbaninu ikala muna ntangwa yasikidiswa.+
28 “Ovutuka kuna nsi andi ye ulolo wa mavua, muna ntim’andi osia kangu diavauka e kitantu. Ovanga diambu diasikila, i bosi kevutuka kuna nsi andi.
29 “Muna ntangwa yasikidiswa ovutuka, onuanisa e sude. Kansi o nkumbu wau ke dikala nze kuna lubantiku ko,
30 kadi e nzaza za Kitimi+ zikunuanisa, oyandi okululwa.
“Ovutuka kimana katiamuna makasi mandi muna kangu diavauka+ yo vanga mambu una ufwene; ovutuka kasia e sungididi kw’awana beyambulanga e kangu diavauka.
31 E vu kia makesa mandi* kitelama; kifunzula e nzo avauka,+ nzo zangolo yo katula kimenga kia ntangwa ke ntangwa.+
“Besikidisa e lekwa kiangemi eki kitwasanga lufwasu.+
32 “Muna mvovo mia malengo, obendomona awana bekululanga e kangu. Kansi, o nkangu una uzeye Nzambi au, besunda yo sikila mu mana bevanga.
33 Awana bena ye umbakuzi+ muna nkangu bevana umbakuzi kwa wantu ayingi. Beteswa e sakuba, bebwa muna nsosolo ye tiya, muna kinkole yo sanzwa mu lumbu yakete.
34 Kansi, vava beta sakuba, betambula filusadisu; ayingi bekubayikama muna mvovo mia malengo.
35 Akaka ana bena ye ngangu beteswa sakuba kimana vavangwa lufimpu mu kuma kiau baveleleswa yo pembeswa+ yakuna mbaninu; kadi divangama muna ntangwa yasikidiswa.
36 “O ntinu ovanga mana kazolele, okuyitundidika ye kuyikembesa vana ntandu a nzambi zawonso; ovova nkutu mambu ma lutiangu kwa Nzambi osundidi nzambi zawonso.+ Osikila yavana kifokoka tumbu; kadi dina diakanua difwete vangama.
37 Ke zitisa Nzambi a mase mandi ko; ke zitisa luzolo lwa akento ko ngatu luzolo lwa konso nzambi, kadi okuyitundidika vana ntandu awonso.
38 Kansi,* okembelela nzambi a nzo angolo; kuna kwa nzambi ina mase mandi ke bazaya ko i kevanina nkembo muna wolo, palata, matadi mantalu ye tusalu twantalu.
39 Muna lusadisu lwa nzambi a nzenza onuanisa nzo zisundidi ngolo. Ovana nkembo ayingi kw’awana banzeye yo kubatumbika se ayadi vana vena ndonga; okaya ntoto muna ntalu.
40 “Muna ntangw’a mbaninu o ntinu a sude oyantika kununguna,* o ntinu a node okuntelamena muna tembwa, makalu ma vita, akwa mvalu ye nzaza zayingi; okota muna zinsi yo fwatakesa yawonso muna kizalu.
41 Okota mpe muna Nsi a Nkembo,*+ nsi zayingi zita sakuba. Kansi awaya i bevuluka vana moko mandi: Edome, Moabe ye ndambu ye Aneyamone isundidi o mfunu.
42 Okwamanana lambula koko kwandi muna nuanisa zinsi; vo i nsi ya Engipito, ke ivuka ko.
43 Oyadila muna tusalu twaswekama twa wolo ye palata ye lekwa yawonso yantalu ya Engipito. Esi Libia y’esi Etiopia, belanda ntambi zandi.*
44 “Kansi, e nsangu zituka kuna este* ye node, zikuntokanesa, ovaika kuna makasi mawonso kenda fwasa ayingi.
45 Osumika saba yandi ya kintinu vana kati kwa kalunga ye mongo avauka wa Nsi a Nkembo;*+ olwaka kuna mfoko, ke vekala ona okunsadisa ko.
Mvovo vana yand'a lukaya
^ Yovo “yakala se nzo angolo kwa yandi.”
^ Mvovo wa sina: “O moko ma.”
^ Yovo “Nsi a Wete.”
^ Mvovo wa sina: “Osikidisa ndose yo kwiza.”
^ Yovo “nsoneki a makesa.”
^ Nanga, “lembi zayisa.”
^ Yovo “muna ntantani.”
^ Mvovo wa sina: “O moko.”
^ Mvovo wa sina: “ntim’andi.”
^ Yovo “bekukumunua muna kizalu.”
^ Mvovo wa sina: “O moko mandi.”
^ Yovo “Vana fulu kiandi.”
^ Yovo “kuntula.”
^ Yovo “Nsi a Wete.”
^ Yovo “bekunlanda.”
^ Yovo “kuna mpaikilu a ntangwa.”
^ Yovo “Nsi a Wete.”
