Kuna Kwa Ayibere 12:1-29
12 Dianu vo, wau tuzungilu kwa tuti diadi dianene dia ambangi, tukatula mpe mazitu mawonso ye sumu dikutuzingalakananga mu sazu,+ twalundumukina kuna luzindalalu o nkula una tusidilu,+
2 wau tusianga kaka o meso muna Yesu wa Ntu ye Nzikudi a lukwikilu lweto.+ Kadi muna kiese kasilwa i kazizidila nti ampasi,* waveza e nsoni yo vuanda kuna koko kwalunene kwa kunda kia Nzambi.+
3 Dianu vo, nutoma badika ndiona wazizidila mvovo mia lutiangu mia asumuki+ ana bayikotanga nsoki, kimana nualembi yoya yo vutuka manima.*+
4 Muna ndwan’eno ye sumu diadina, ke nuazizididi ko yamu tezo kia bungulwa menga.
5 Nuvilakene luwondelelo nuavewa nze wana: “E mwan’ame, kubembola longi dia Yave* ko, ngatu vutuka manima avo osembelo kwa yandi;
6 kadi Yave* otumbanga awana kezolanga, kieleka, ozwabulanga konso ndiona ketambulanga nze mwana.”+
7 O luzindalalu lweno luna se longi kwa yeno. O Nzambi okadilanga yeno nze wan’andi.+ Kadi nkia mwana olembi longwanga kwa se diandi?+
8 Kansi, avo yeno awonso ke nutondele longi diadi ko, ozevo ke nu wan’andi ko, nu wan’a zumba.
9 Vana ntandu, o mase meto batulonganga, oyeto twabazitisanga. Nga ke tufwete luta sakalela Se dia zingu kieto kia kimwanda ko kimana twazinga e?+
10 Kadi oyau mu kolo kiandwelo batulonga mana bamona vo mambote, kansi oyandi ovanganga wo muna wete dieto kimana twakala e ntwadi muna vauka kwandi.+
11 Kieleka, ke vena longi ko ditwasanga kiese vava divewanga, mpasi* kaka ditwasanga; kansi kuna kulanda, diyima mbongo a luvuvamu ye unsongi kw’awana baveno dio.
12 Dianu vo, nukumika moko mazeza ye makungunu mayoya,+
13 nusingika nzila za malu meno,+ kimana o malu ma mvanguki malembi saka e mpasi, kansi masasuka.
14 Nuvavanga kadila kuna luvuvamu ye wantu awonso+ yo velela,*+ avo ke wau ko, ke muntu ko omona o Mfumu.
15 Nutoma kuyikenga valembi kala muntu ofunga muna vua nsambu za Nzambi, kimana valembi mena mwanzi a mpondi vovo nuina yo kunumwesa e mpasi yo safula wantu ayingi;+
16 nutoma kuyikenga valembi kala munta-zumba* vovo nuina ngatu muntu olembi yangalelanga mambu mavauka, nze Esau ona wateka e kimbuta kiandi muna dia kumosi.+
17 Kadi nuzeye wo vo vava kazola tambula e nsambu, wabembolwa; kana una vo wavava soba e ngindu* muna kinsanga,+ kalenda wo ko.*
18 Ke nufinamene mongo ko una ulenda simbwa,+ una wakwikwa e tiya,+ wayitalala e tuti dia ndombe ye tombe kina e bú ye tembwa kiangolo,+
19 ye zú dia mpungi+ ye ndinga yavovanga mambu,+ ina vo vava yawakana, o nkangu wadodokela vo ke bavoveswa diaka diambu ko.+
20 Kadi bamona kikilu wonga mu kuma kia nkanikinu owu: “Kana nkutu bulu kiviakene mongo, kifwete tubwa matadi.”+
21 E mona-meso mpe kiansisi kiakala, dianu Mose kavovela vo: “Mbwene wonga yo zakama.”+
22 Kansi, oyeno nufinamene Mongo a Zione,+ e mbanz’a Nzambi amoyo, Yerusaleme+ ya zulu ye yazi ya mbasi*
23 muna lukutakanu lwampwena+ ye nkutakani ya wan’antete a Nzambi ina yasonekwa kuna zulu yo Nzambi wa mfundisi a wantu awonso,+ ye mioyo mia wantu+ ansongi ana bawutwa kwa mwand’avelela yo lunganeswa,+
24 yo Yesu wa nkambami*+ a kangu diampa+ yo menga katuzazila, mana meluta vovanga ke mu menga ma Abele ko.+
25 Nutoma tala nualembi kaka o matu kwa* ndiona ovovanga. Kadi avo awana balembi winikina ndiona wavananga lulukisu lwa Nzambi ova ntoto ke bavenga e tumbu ko, ozevo, diampasi kikilu dikala kwa yeto mu venga e tumbu avo tufididi e nima kwa ndiona ovovanga tuka kuna zulu!+
26 Muna kolo kiakina e nding’andi yanikuna o ntoto,+ kansi owau osidi nsilu vo: “Nkumbu mosi diaka izakamesa, ke ntoto kaka ko, kansi ye zulu mpe.”+
27 O mvovo “nkumbu mosi diaka,” usonganga e nkatul’a lekwa ina yanikunua, lekwa ina yavangwa, kimana e lekwa ina yalembi nikunua yakala kaka.
28 Dianu vo, wau tutambula e Kintinu kina ke kinikunua ko, yambula twakwamanana tambula e nsambu, zina tulenda sadila e salu kiavauka kitondakana kwa Nzambi kuna vumi yo zakama.
29 Kadi o Nzambi eto tiya twambomoni.+
Mvovo vana yand'a lukaya
^ Tala Nsas’a Mvovo.
^ Yovo “yoyesa mioyo mieno.”
^ Yovo “ntantu.”
^ Yovo “vauka.”
^ Tala Nsas’a Mvovo, “Mavangu ma Zumba.”
^ Mvovo wa sina: “kasololwela dio fulu ko.”
^ I sia vo, ngindu za se diandi.
^ Yovo “mafunda ye mafunda ma mbasi.”
^ Muna Kingerekia, mvovo wau uyikanga muntu owizanesanga buka yole.
^ Yovo “nualembi vakula nkalu kwa; nualembi veza.”
