Afundisi 20:1-48
-
Esi Ngibeya banuanisu (1-48)
20 Ozevo, Aneyisaele awonso bavaikidi tuka kuna Dani+ yakuna Bere-seba yakuna nsi a Ngiladi,+ e nkutakani yawonso ilungalakene* vana ndose a Yave kuna Misepa.+
2 I dianu vo, mbuta za nkangu ye makanda mawonso ma Isaele batelamene muna nkutakani a nkangu a Nzambi—400.000 ma makesa bekangalelanga kia malu ye nsosolo miau.+
3 Anebenyamini bawidi vo nkangu a Isaele utombokele kuna Misepa.
Wan’a Isaele bavovele vo: “Nutuzayisa, nkia diambu diadi diambi divangamene?”+
4 O Nlevi+ ona wavondwa o nkento, ovutwidi vo: “Omono yo nkaz’ame twalwaka muna Ngibeya+ ya Benyamini, i mûna twaleka.
5 Kansi, esi Ngibeya bantelamena yo zunga e nzo muna fuku. Bakedi ye kani dia kumponda, kansi vana fulu kia kumponda, balele nkaz’ame mu kingolo, ofwidi.+
6 I dianu vo, mbongele e vimbu dia nkaz’ame, nzengele dio tini-tini yo twika yo muna konso zunga kia vua dia Isaele,+ kadi vangu diansoni ye diangemi bavangidi mu Isaele.
7 Owau, yeno awonso nkangu a Isaele nusonga e ngindu zeno yo vana luludiku lweno.”+
8 Nkangu awonso utelamene kumosi,* bavovele vo: “Ke mosi ko vava twina okwenda kuna saba kiandi ngatu vutuka kuna nzo andi.
9 Owau edi tuvanga kwa Ngibeya: Tutela yo nkas’a mienze, kimana twenda kubanuanisa.+
10 Vana vena 100 wantu muna makanda mawonso ma Isaele, tusola 10, vana vena 1.000 dia wantu, 100 tusola, vana vena 10.000 ma wantu, 1.000 tusola kimana bakutika madia ma makesa ana bekwenda nuanisa Ngibeya ya Benyamini wau vo vangu diansoni bavangidi mu Isaele.”
11 Dianu vo akala awonso a Isaele balungalakene kumosi* mu kwenda nuanisa e mbanza.
12 Makanda ma Isaele batumini wantu kwa kanda diawonso dia Benyamini, bavovele vo: “Nkia diambu diadi diambi divangamene vovo nuina?
13 Owau nuyekola yimpumbulu ya Ngibeya+ kimana twabavonda twasukisa mbi yayi omu Isaele.”+ Kansi Anebenyamini ke bazolele wila mpangi zau Aneyisaele ko.
14 I bosi, Anebenyamini bavaikidi muna mbanza, balungalakene kuna Ngibeya kimana benda nwanisa wan’a Isaele.
15 E lumbu kiakina, Anebenyamini balungalakese 26.000 ma makesa ana bakala ye nsosolo, vana ntandu a 700 za makesa ma Ngibeya masundidi nkuma.
16 Muna vu kiaki mwakala 700 za makesa masundidi nkuma, yau awonso akwa lumonso. Konso muntu muna yau, olenda tuba matadi muna nsinga watubila matadi yo tela muna lusuki lembi vengomoka.
17 O wan’amakal’a Isaele ana bakutakana 400.000 ma makesa ana bakala ye nsosolo,+ lembi tanga Anebenyamini. Konso muntu muna yau watoma zaya nuana e vita.
18 Batelamene yo tomboka kuna Betele, bele yuvula Nzambi.+ Nkangu a Isaele bayuvuidi vo: “Nani ofwete vita ntu muna nuanisa Anebenyamini?” Yave ovutwidi vo: “Yuda ovita ntu.”
19 Aneyisaele bavaikidi mu mene, bele nuanisa Ngibeya.
20 O wan’amakal’a Isaele bavaikidi muna nuanisa Anebenyamini; bakiatamene mu nuana muna Ngibeya.
21 Anebenyamini bavaikidi kuna Ngibeya, muna lumbu kiakina bavondele 22.000 ma wan’amakal’a Isaele.
22 Kansi, makesa ma Isaele bayikasakese, bakubikidi diaka vita vana fulu kina bakala muna lumbu kiantete.
23 Aneyisaele batombokele yo dila vana ndose a Yave yaku masika, bayuvuidi Yave vo: “Nga twenda nuanisa diaka mpangi zeto, o nkangu a Benyamini?”+ Muna diadi Yave ovovele vo: “Nutomboka nuabanuanisa.”
24 Aneyisaele bele nuanisa diaka Anebenyamini mu lumbu kianzole.
25 Anebenyamini bavaikidi muna Ngibeya, bele kubanuanisa e lumbu kianzole, bavondele 18.000 ma Aneyisaele,+ awonso bakala ye nsosolo.
26 Muna kuma kiaki, wan’amakal’a Isaele awonso batombokele kuna Betele. Bavuende yo dila vana ndose a Yave,+ e lumbu kiakina bafionkonuene*+ yaku masika, batambikidi tukau twangioka+ yo tukau twa ungudi+ vana ndose a Yave.
27 I bosi, wan’a Isaele bayuvuidi Yave,+ kadi muna lumbu yayina e nkel’a kangu dia Nzambi aludi i kûna yakala.
28 E lumbu yayina, o Finekase+ wa mwan’a Elaza wa mwan’a Arone, yandi watelamanga vana vena nkel’a kangu. Bayuvuidi vo: “Nga twenda nuanisa diaka mpangi zeto, wan’amakal’a Benyamini, yovo twayambula kweto?”+ Yave ovutwidi vo: “Nuenda, kadi o mbazi ikubayekola ova moko meno.”
29 O Isaele osidi wantu kimana baswekamena+ muna nzunguluka yawonso ya Ngibeya.
30 Aneyisaele bele nuanisa Anebenyamini e lumbu kina kiatatu, bakiatamene Ngibeya una bavanga muna ntangwa zankaka.+
31 Vava Anebenyamini bayenda wanana yau, batuntilu mu sisa e mbanza kwandá.+ Nze una bavanga muna ntangwa zankaka, bayantikidi nuana yo vonda nkangu muna nzila itombokanga kuna Betele ye ina ikwendanga kuna Ngibeya, bavondele tezo kia 30 ma wan’amakal’a Isaele vana nzanza.+
32 Anebenyamini bavovele vo: “Batufakeso vava twina nze una bateka vangwa.”+ Kansi, Aneyisaele bavovele vo: “Yambula twabatunta kwandá ye mbanza yamuna nzila.”
33 Wan’amakal’a Isaele awonso bavaikidi muna fulu yau yo kiatama kuna Bale-tama, ekolo Aneyisaele ana bakala baswekama bavaikidi muna fulu yau muna nzunguluk’a Ngibeya.
34 Muna Ngibeya mulweke 10.000 ma makesa ma Isaele masundidi nkuma, e vita ngolo kikilu yakala. Kansi, Anebenyamini ke bazaya wo ko vo vonza se kikubalwakila.
35 Yave otufakese Benyamini+ vana vena Isaele, muna lumbu kiakina Aneyisaele bavondele 25.100 a wan’amakal’a Benyamini, yau awonso bakala ye nsosolo.+
36 Ozevo, vava wan’amakal’a Isaele batinini vana vena Anebenyamini, o Anebenyamini bayindwidi vo wan’a Isaele batufakeso,+ kansi, Aneyisaele batinini kadi babundidi e vuvu kw’awana baswama muna nuanisa Ngibeya.+
37 Awana baswama muna nzunguluk’a mbanza, bavaikidi mu nzaki yo nuanisa Ngibeya. Bakotele muna mbanza yo tufakesa awonso muna nsosolo.
38 Wan’a Isaele bawizana ye awana baswama muna nuanisa e mbanza vo bavaikisa mwisi muna mbanza se sinsu.
39 Vava Aneyisaele batinini muna vita, wan’amakal’a Benyamini bayantikidi kubatufakesa yo vonda tezo kia 30 ma wan’amakal’a Isaele.+ Bavovele vo: “Kieleka, batufakeso vava twina nze muna vita ina yantete.”+
40 Kansi, e sinsu kiyantikidi tomboka muna mbanza nze lunzi dia mwisi. Vava wan’amakal’a Benyamini batadidi kuna nima, bamwene nlaku a tiya muna mbanza yawonso utombokele kuna zulu.
41 Wan’amakal’a Isaele bavutukidi, wan’amakal’a Benyamini bakendalele kikilu, kadi bamwene vo e vonza kibalwakidi.
42 I dianu batinini vana ndose a wan’amakal’a Isaele yakuna makanga, kansi e vita ibalende; o wantu ana batuka muna mavata babavondele.
43 Wan’amakal’a Isaele bazungidi Anebenyamini yo kubalakama. Babadiatakese vana ntalani a Ngibeya kuna este.
44 Muna wan’amakal’a Benyamini mwabwa 18.000, yau awonso mabamba-ngolo.+
45 Wan’amakal’a Benyamini bavilukidi yo tinina kuna makanga yakuna tadi dia Rimone.+ Aneyisaele bavondele 5.000 ma wan’amakala yo kubalakama yakuna Ngidome; bavondele diaka 2.000 ma wantu.
46 E lumbu kiakina 25.000 ma wan’amakal’a Benyamini bafwa, awonso mabamba-ngolo ana bakala ye nsosolo.+
47 Kansi, 600 za wan’amakala batinina kuna makanga yakuna tadi dia Rimone, ngonde yá bakala muna tadi dia Rimone.
48 Wan’amakal’a Isaele bavutukidi kwa Anebenyamini, bavondele muna nsosolo awana bakala muna mbanza, twelezi ye lekwa yawonso yasala. Bayokele mpe mavata mawonso makala muna nzila zina baviokela.
Mvovo vana yand'a lukaya
^ Mvovo wa sina: “ilungalakene nze muntu mosi.”
^ Mvovo wa sina: “nze muntu mosi.”
^ Mvovo wa sina: “nze muntu mosi.”
^ Yovo “baminini nsoki.”
