Wantete wa Samuele 3:1-21
-
Samuele obokelo kimana kakala se ngunza (1-21)
3 O nleke Samuele wasadilanga+ Yave vana vena Ele, kansi e diambu dia Yave ke diatoma wakananga diaka ko muna lumbu yayina; e mona-meso+ mpe ke yatoma kalanga diaka ko.
2 Lumbu kimosi, Ele walavalala kakala vana fulu kiandi, o meso mandi mafwa; kamonanga diaka ko.+
3 O mwind’a Nzambi+ ke wayiziminua ko, Samuele olele muna tempelo*+ a Yave, vana vakala Nkel’a Nzambi.
4 Yave obokele Samuele, yandi ovutwidi vo: “Mon’oyu.”
5 Wele ntinu kwa Ele, oku vo: “Mon’oyu, kadi ngeye umbokele.” O Ele ovutwidi vo: “Kibokele ko. Nda leka kwaku.” Wele leka.
6 Yave umbokele diaka vo: “E Samuele!” Samuele otelamene, wele kwa Ele, oku vo: “Mon’oyu, kadi ngeye umbokele.” Ovutwidi vo: “Kibokele ko, e mwan’ame, nda leka kwaku.”
7 (Samuele kateka zaya Yave ko, e diambu dia Yave ke diateka sengomonua kwa yandi ko.)+
8 Yave obokele diaka Samuele e mboka ina ya ntatu: “E Samuele!” Otelamene wele kwa Ele, oku vo: “Mon’oyu, kadi ngeye umbokele.”
O Ele obakwidi wo vo Yave obokele o nleke.
9 I dianu vo, Ele ovovese Samuele vo: “Wenda leka, avo ubokele diaka, vova vo: ‘E Yave, vova kwaku, kadi o ntaudi aku mu wá kena.’” O Samuele wele leka vana mfulu andi.
10 Yave wizidi, otelamene yo kumbokela nze una katekele kumbokelela, oku vo: “E Samuele, e Samuele!” O Samuele ovutwidi vo: “Vova, o ntaudi aku mu wa kena.”
11 O Yave ovovese Samuele vo: “Tala, diambu ivanga muna Isaele dimwesa mpasi e matu ma ndiona owá dio.+
12 E lumbu kiakina, ivanga kwa Ele mawonso yavova muna diambu dia nzo andi, tuka kuna lubantiku yakuna mbaninu.+
13 Umvovesa vo tumba itumba e nzo andi yakwele mvu mu kuma kia bi una kazeye,+ kadi o wan’andi bavezele Nzambi,*+ kansi oyandi kabatumbidi ko.+
14 I diau yadila nzo a Ele e ndofi vo yimenga yovo tukau ke tulendi fuka masumu ma nzo a Ele ko.”+
15 Samuele olele yakuna mene-mene; i bosi, oziuwidi yelo ya nzo a Yave. Samuele omwene wonga wa zayisa Ele e mona-meso.
16 Kansi, o Ele obokele Samuele vo: “E mwan’ame Samuele!” Ovutwidi vo: “Mon’oyu.”
17 Unyuvuidi vo: “Nkia diambu kavovesenge? Dodokolo, kunsweki dio ko. O Nzambi okutumba yo lutakesa wo vanga avo unswekele diambu dimosi muna mawonso kavovesenge.”
18 Ozevo, Samuele umvovese mawonso, kanswekele diambu ko. O Ele ovovele vo: “Yave ovovele mo, yambula kavanga owu wambote muna meso mandi.”
19 O Samuele wakulanga, o Yave wakala yandi,+ kayambula ko vo vafunga* kana diambu dimosi muna mawonso kavova.
20 Isaele yawonso tuka kuna Dani yaku Bere-seba bazaya wo vo, Samuele osolelo se ngunz’a Yave.
21 Yave wakwamanana sengomoka kuna Silo, kadi Yave wayisengomona kwa Samuele kuna Silo muna diambu dia Yave.+
Mvovo vana yand'a lukaya
^ I sia vo, “saba.”
^ Mvovo wa sina: “basibidi Nzambi.”
^ Mvovo wa sina: “vasotoka.”
