Wantete wa Samuele 18:1-30
18 Vava Davidi kamene vovana yo Saulu, Yonatane+ yo Davidi bakitukidi se akundi akieleka,* Yonatane unzolele nze yandi kibeni.+
2 Tuka lumbu kiakina, Saulu wakala kaka yo Davidi, kanyambwidi ko kavutuka kuna nzo a se diandi.+
3 Yonatane yo Davidi bakangidi e kangu,+ kadi unzolele nze yandi kibeni.+
4 Yonatane okatwidi mvuel’andi yakondwa moko, ovene yo kwa Davidi ye mvuatu andi wa makesa, nsosolo, mfumba ye mpond’andi.
5 Davidi wayendanga konso kuna Saulu kantumanga yo sunda e vita.*+ Dianu vo, Saulu wantumbika se mfidi a makesa,+ ediadi diayangidika nkangu ye selo ya Saulu.
6 Davidi yo makesa vava bavutukanga muna vonda Afelesetia, akento muna mbanza zawonso za Isaele bavaikanga mu wanana yo Saulu wa Ntinu, bayimbila+ ye kiese yo kina, yo sika tumbamba+ ye nsambi.
7 Akento bakembelanga yo yimbila vo:
“Saulu ovondele mafunda mandi,Vo i Davidi, yazi ya mafunda.”+
8 Saulu ofungidi kikilu makasi,+ o nkunga ke unyangidikidi ko, kadi ovovele vo: “Davidi banyikidi yazi ya mafunda, vo i mono bangikidi kaka mafunda. Kintinu kaka kisidi muna kumvana.”+
9 Tuka lumbu kiakina, Saulu wakala ye makani mambi mu kuma kia Davidi.
10 Muna lumbu kialanda, o mwand’ambi utukidi kwa Nzambi ulwakidi Saulu,+ oyantikidi vova yo vanga mambu ma kinzenza* muna nzo, ekolo Davidi kasikanga e kokolo+ nze una kavanganga lumbu ke lumbu. Saulu wakala ye dionga vana koko.+
11 Otubidi e dionga,+ oku vo: ‘Itobola Davidi muna yaka!’ Kansi Davidi nkumbu miole kavengele dio.
12 Saulu omwenene Davidi o wonga, kadi Yave wakala yandi,+ kansi kakala diaka yo Saulu ko.+
13 Saulu okatwidi Davidi vana ndose andi, untumbikidi se mfumu a funda dia makesa. Davidi watuminanga makesa muna vita.*+
14 Davidi wasikila*+ muna mawonso kavanganga, kadi Yave wakala yandi.+
15 Saulu una kamwene vo Davidi wasikila muna mawonso kavanganga, umwenene o wonga.
16 Kansi, nkangu wawonso wa Isaele ye Yuda bazolele Davidi, kadi wavitanga o ntu muna vita zau.
17 I bosi Saulu ovovese Davidi vo: “Ikuvana Merabe+ wa mwan’ame ambuta, kakala nkaz’aku.+ Kwamanana songa unkabu ova ndose ame, wanuana vita za Yave.”+ Kadi Saulu ovovele muna nsi a ntim’andi vo: ‘Ke fwila va moko mame ko. Yambula kafwila vana moko ma Afelesetia.’+
18 Davidi ovovele kwa Saulu vo: “Omono i nani, aki nani i yitu yame ye nzo a se diame muna Isaele yakala se nzitu a ntinu?”+
19 Kansi, vava ntangwa yafwana mu vana Merabe wa mwan’a Saulu kwa Davidi, wavewa kala kwa Andiele+ wa musi Mekola.
20 Mikale+ wa mwan’ankento a Saulu wazolanga Davidi, disamwinu kwa Saulu, ediadi dinyangidikidi.
21 Saulu ovovele vo: “Ikumvana Mikale kakala se nekwa kwa yandi, kimana Afelesetia bamvonda.”+ Saulu ovovese Davidi mu nkumbu anzole vo: “O unu okituka nzitu ame.”*
22 Vana ntandu, Saulu okanikini ntaudi zandi vo: “Nuvovesa Davidi kuna kinsweki vo: ‘Tala, o ntinu okuyangalelanga, ntaudi zandi zawonso mpe zola bekuzolanga. Kanga e kangu dia longo yo ntinu.’”
23 Vava ntaudi za Saulu bavovesa mambu mama kwa Davidi, o Davidi ovovele vo: “Nga diambu diakete kwa yeno, omono mpasi muntu ye nsukami yakala nzitu a* ntinu e?”+
24 Ntaudi za Saulu bansamunuini vo: “O mama i mambu kavovele o Davidi.”
25 Saulu ovovele vo: “Nuvovesa kwa Davidi vo, ‘O ntinu kazolele nkam’a longo ko,+ 100 kutu+ ya Afelesetia kaka kazolele, kalandila mbeni za ntinu e kunda.’” Saulu ntambu kalekela Davidi kimana kavondwa kwa Afelesetia.
26 Ntaudi za ntinu bavovese diambu diadi kwa Davidi, o Davidi oyangalele okala se nzitu a ntinu.+ Una ntangwa ke yafwene ko,
27 Davidi ovaikidi yo makesa mandi, bavondele 200 za Afelesetia. Davidi otwese kutu yau yawanso kwa ntinu kimana kakituka se nzitu a ntinu. I dianu vo, Saulu umvene Mikale wa mwan’andi ankento kakala se nkaz’andi.+
28 Saulu omwene vo Yave wakalanga yo Davidi,+ o mwan’andi Mikale wanzolanga mpe.+
29 Saulu omwenene kikilu Davidi wonga, Saulu wakala se mbeni a Davidi muna zingu kiandi kiawonso.+
30 Mfumu za Afelesetia bavaikanga mu nuana, kansi ntangwa zawonso bavaikanga, Davidi wabasundanga kaka* lutila ntaudi zawonso za Saulu;+ e nkumbu andi yatoma zitiswa.+
Mvovo vana yand'a lukaya
^ Yovo “o moyo a Yonatane ubakanene yo moyo a Davidi.”
^ Yovo “ye wakalanga ye ngangu.”
^ Yovo “nze ngunza.”
^ Mvovo wa sina: “wavaikanga yo kota vana vena nkangu.”
^ Yovo “wakalanga ye ngangu.”
^ Mvovo wa sina: “okanga yame e kangu dia longo.”
^ Mvovo wa sina: “yakanga e kangu dia longo yo.”
^ Yovo “wakalanga ye ngangu.”
