Wantete wa Paulu Kuna kwa Esi Korinto 7:1-40
7 Muna kuma kia mana nuasoneka, diambote vo yakala kalembi simba* nkento;
2 kansi, mu kuma kia mavangu ma zumba* mawokele, konso yakala yambula kakala yo nkento+ andi ye konso nkento mpe yambula kakala yo yakala diandi.+
3 O yakala yambula kavana kina kifwanukini kwa nkento andi, o nkento mpe yambula kavanga diau dimosi kwa yakala diandi.+
4 O nkento kena ye wisa muna nitu andi ko, yakala diandi kaka; diau dimosi mpe, o yakala kena ye wisa muna nitu andi ko, nkento andi kaka.
5 Ke nuyimina muntu yo nkwandi ko, nanga mu kolo kiakete kaka kina nuwizanene, kimana nuayivana muna sambu. I bosi nukala diaka vamosi, kimana nualembi vukumunua kwa Satana mu kuma kia kondwa kwa volo.
6 Nulenda vanga dina mpovele, kansi ke nsiku ko.
7 Edi nzolele vo wantu awonso bakala nze mono. Kansi konso muntu una yo lukau+ luna kavewa kwa Nzambi, mosi owu, wankaka una.
8 Owau mpovele kwa mpumpa ye akento bafwilwa akala, diambote kwa yau avo bakala kaka nze mono.+
9 Kansi avo ka bena ye volo ko, yambula basompa, kadi o sompa kusundidi wete ke mu zina moyo ko.+
10 Vo i awana basompa ibakanikini, kansi ke mono ko, Mfumu kaka, o nkento kafwete vambana yo nkaz’andi ko.+
11 Kansi avo ovambukidi, yambula kakala kaka mpumpa avo ke wau ko kavutulwisa e ngwizani yo nkaz’andi; o yakala kafwete yambula nkaz’andi ko.+
12 Kansi kuna kw’akaka, mono mpovele, ke Mfumu ko:+ Avo mpangi una yo nkento wa mundembi-kwikila, o nkento mpe otondele kala yandi, o mpangi kafwete yambula nkento andi ko;
13 avo nkento mpe una ye yakala wa mundembi-kwikila, o yakala mpe otondele kala yandi, o nkento kafwete yambula yakala diandi ko.
14 Kadi yakala wa mundembi-kwikila wavaulwa muna diambu dia nkento andi, o nkento wa mundembi-kwikila wavaulwa muna diambu dia mpangi eto; avo ke wau ko, o wan’eno nga bafunzuka badi kala, kansi owau bavelela.
15 Kansi, avo mundembi-kwikila ozolele vambuka, yambula kavambuka; mpangi yovo nsanga eto kakangama ko muna diambu diadi, kadi Nzambi wanubokelela muna luvuvamu.+
16 E nkento, nani ozeye kana vo kuvuluza nkaz’aku ko?+ Yovo, e yakala, nani ozeye kana vo kuvuluza nkento aku ko?
17 Kansi, wauna Yave* kavanina konso muntu ye kunku kiandi, yambula konso muntu kakangalela una Nzambi kambokelela.+ O nkanikinu wau kwa nkutakani zawonso mpene wo.
18 Nga vena yo muntu wabokelwa wau kakala wazengwa?+ Kakituki mundembi-zengwa ko. Nga vena yo muntu wabokelwa wau kakala mundembi-zengwa? Yambula kalembi zengwa.+
19 O zengwa ke kwina mfunu ko, olembi zengwa mpe ke kwina mfunu ko;+ edi dina mfunu i lunda e nkanikinu mia Nzambi.+
20 Konso muntu yambula kakala kaka wauna kakala vava kabokelwa.+
21 Nga ntaudi wakala vava wabokelwa? Kutokanina dio ko;+ kansi avo luvevoko ozolele, vanga wo.
22 Konso ona wabokelwa muna Mfumu, wau kakala se ntaudi, i mvevoki a Mfumu;+ diau dimosi mpe kwa konso ona wabokelwa wau kakala muntu wavevoka, i ntaudi a Kristu.
23 Oyeno mu ntalu nuasumbilwa;+ ke nukadi diaka ntaudi za wantu ko.
24 Ampangi, konso muntu yambula kakala kaka vana ndose a Nzambi wauna kakala vava kabokelwa.
25 Muna diambu dia mienze,* kina ye nkanikinu a Mfumu ko, kansi ngindu zame kaka nsongele+ wau yafwilwa e nkenda kwa Mfumu kimana yakala ye kwikizi.
26 Kadi ngindwidi vo mu kuma kia mpasi za tandu kiaki, diambote kwa yakala kakala kaka una kena.
27 Avo wakangama muna nkento, kuvavi kutuluka ko.+ Avo wakutuluka muna nkaz’aku, kuvavi nkento ko.
28 Kansi avo osompele, kusumuka ko. Avo mwenze osompele, ke sumuka ko. Kansi awana bevanga wo mpasi bemona muna nitu. Mono kizolele ko vo nuamona e mpasi zazi.
29 Ampangi, inusamunuini vo, e ntangwa isidi yankufi.+ Tuka wau, awana basompa yambula bakala nze ke basompa ko,
30 awana bedilanga bakala nze awana ke bedilanga ko, awana bena mu kiese bakala nze awana ke bena mu kiese ko, awana besumbanga bakala nze awana ke bena ye lekwa ko,
31 awana besadilanga e nza bakala nze awana ke besadilanga yo mvimba ko; kadi e mpw’a nza yayi mu soba kaka ina.
32 Dianu, nzolele vo nualembi tokana. O yakala una vo mpumpa otokanenanga mambu ma Mfumu, i sia vo, una kalenda yangidikila Mfumu.
33 Kansi yakala wasompa otokanenanga mambu ma nza,+ i sia vo, una kalenda yangidikila nkaz’andi,
34 e ngindu zandi zavambana. Kuna diaka e sambu, o nkento una vo mpumpa ye mwenze, otokanenanga mambu ma Mfumu,+ kimana kakala wavelela muna nitu ye muna mwanda. Kansi nkento wasompwa otokanenanga mambu ma nza, i sia vo, una kalenda yangidikila nkaz’andi.
35 Inuvovese ediadi muna wete dia yeno kibeni, ke mu kunusima ko,* kansi nuavanga kaka edi diansongi, nuasadila mvimba o Mfumu lembi fwa diya.
36 Kansi avo muntu obenze vo diambu diambi kevanganga muna kimpumpa kiandi,* avo wakola kwandi, ozevo, owu difwete vangamena: Yambula kavanga dina kazolele; kasumukini ko. Yambula basompa.+
37 Kansi avo muntu osikidisi dio muna ntim’andi, ye kavuidi dio mfunu ko, una ye wisa muna luzolo lwandi yo baka nzengo muna ntim’andi za lembi sompa,* diambote kevanga.+
38 Konso ona osompele,* diambote kavangidi, kansi ona olembi sompa olutidi vanga diambote.+
39 O nkento wakangama yo nkaz’andi ekolo kena o moyo.+ Kansi avo yakala diandi ofwidi, o nkento ovevokele mu sompwa kwa konso muntu kezola, kansi muna Mfumu kaka.+
40 Kansi muna ngindu zame, kiese kiayingi kekala kiau avo okala kaka una kena; ngina ye ziku vo mono mpe mwand’a Nzambi ngina wau.
Mvovo vana yand'a lukaya
^ I sia vo, kalembi vukana yo.
^ Muna Kingerekia, por·nei′a. Tala Nsas’a Mvovo, “Mavangu ma Zumba.”
^ Yovo “awana ke basompa ko.”
^ Mvovo wa sina: “ke mu kunuleka ntambu ko.”
^ Yovo “muna kimwenze kiandi.”
^ Yovo “tatidila kimwenze kiandi.”
^ Yovo “ovene kimwenze kiandi muna longo.”
