Wantete wa Paulu Kuna kwa Esi Korinto 14:1-40
14 Nutatidila o zola, nusiamanana vava* tukau twa mwanda, musungula o sakula.+
2 Ndiona ovovelanga muna ndinga zankaka, ke kwa wantu ko kevovanga, kansi kuna kwa Nzambi, kadi ke vena muntu ko owá,+ kana una vo mbumb’avauka+ kevovanga muna mwanda.
3 Kansi, ndiona osakulanga, okumika, okasakesa yo fiaulwisa wantu muna mvovo miandi.
4 Ndiona ovovela muna ndinga zankaka, okuyikumika, kansi ndiona osakula, nkutakani kekumika.
5 Edi nzolele vo yeno awonso nuavovela muna ndinga zankaka,+ kansi nzolele vo nuasakula.+ Kadi ndiona osakula osundidi ndiona ovovela muna ndinga zankaka, nanga vo kasekola, kimana e nkutakani yakumikwa.
6 Owau ampangi, avo ngizidi kunuvovesela muna ndinga zankaka, nkia nluta dikunutwasila avo ndembele kunuvovesela muna lusengomono,+ muna zayi,+ muna ungunza yovo muna longi?
7 Diau dimosi ye lekwa yakondwa moyo ivaikisanga e zú, kana tutu yovo kokolo. Avo masikilu mama ke mavaikisi zú diaswaswana ko, aweyi uzayilwa e lekwa kina kisikilu kana vo tutu yovo kokolo?
8 Kadi avo e mpungi ivaikisi e zú dialembi kiá, nani okubama muna vita?
9 Diau dimosi, avo nuvovele mambu malembi bakulwa, aweyi wantu bezayila dina nuvovele? Dikala nze yeno nuvovele kwa tembwa.
10 Kana una vo ndinga zayingi zaswaswana zivovuanga ova nza, kansi ke vena ndinga ko ikondelo e nsasa.
11 Kadi avo kibakwidi ko dina divovelo, ozevo i nzenza kuna kwa ndiona ovovele dio, oyandi mpe ovovele dio okala se nzenza kuna kwa mono.
12 Diau dimosi mpe kwa yeno, wau nuina ye tima diasaka dia tambula tukau twa mwanda, nuvava wokesa tukau tuna tukumika e nkutakani.+
13 Dianu vo, ndiona ovovela muna ndinga yankaka, yambula kasamba kimana kasekola.+
14 Kadi, avo nsambidi muna ndinga yankaka, i lukau lwame lwa mwanda lusambanga, kansi kibakula kio nsasa ko.
15 Ozevo, adieyi ivanga? Samba isamba muna lukau lwa mwanda, kansi isambidila mpe muna nyindu ame. Yimbila iyimbila nkunga muna lukau lwa mwanda, kansi iyimbidila mpe muna nyindu ame.
16 Avo ke wau ko, avo ovutwidi matondo muna lukau lwa mwanda, o muntu walembi longwa vovo nuina aweyi kevovela “Amen” muna sambu kiaku kia matondo wau kalembele bakula dina ovovele?
17 Kieleka, ovutwidi matondo mu mpila yambote, kansi muntu ndioyo kakumikinu ko.
18 Ntondele Nzambi wau vo ndutidi yeno awonso muna vova ndinga zankaka.
19 Kansi, diambote yavova mambu matanu malenda bakulwa muna nkutakani, kimana yalonga ankaka, ke mu vova mafunda kumi ma mambu ko muna ndinga zankaka.+
20 Ampangi, ke nukadi yingiana-ngiana ko muna umbakuzi,+ kansi nukala se yingiana-ngiana muna mbi;+ nuzikuka muna umbakuzi.+
21 Muna Nsiku mwasonama vo: “‘Ivovesela nkangu wau muna ndinga za kinzenza ye muna nua mia nzenza, kana una vo ke ukungwila ko,’ u kavovele Yave.”*+
22 Dianu vo, o vova ndinga zankaka ke sinsu kia minkwikizi ko, kia mindembi-kwikila kaka,+ kansi o sakula ke kwa mindembi-kwikila ko, kwa minkwikizi kaka.
23 Ozevo, e nkutakani yawonso avo ilungalakene vamosi yo vovela muna ndinga zankaka, i bosi vakota wantu balembi longwa yovo mindembi-kwikila, nga ke bevova ko vo nulaukidi e?
24 Kansi, avo yeno awonso nusakwidi, vakota muntu walembi longwa yovo mundembi-kwikila, oyeleswa yo toma fimpwa kw’awonso.
25 E mbumba za ntim’andi zisengomoka, dianu vo obukika e ndose andi yo sambila Nzambi yo vova vo: “Nzambi wina kieleka vovo nuina.”+
26 Ampangi, adieyi difwete vangama? Vava nukutakananga, omosi oyimbila nkunga, wankaka una ye longi, wankaka una ye lusengomono, wankaka ovovela muna ndinga yankaka ye wankaka nsekodi.+ Yambula mawonso mavangamena muna kasakesa muntu yo nkwandi.
27 Avo wantu bevovela muna ndinga yankaka, ke bavioki tezo kia wantu wole ko yovo atatu, bavova mosi-mosi, vafwete kala mpe ye nsekodi.+
28 Kansi, avo ke vena nsekodi ko, bafwete kala e pi-i muna nkutakani yo vova kwa Nzambi muna ntima.
29 Yambula ngunza zole yovo zitatu+ zavova, akaka bavava zaya e nsasa.
30 Kansi avo muntu akaka omwene mona-meso ekolo kavuende vovo, ndiona ovovanga yambula kabutama.
31 Kadi yeno awonso nulenda sakula mosi-mosi, kimana awonso balongoka yo kasakeswa.+
32 Tukau twa mwanda twa angunza tufwete lungwa-lungwa kwa angunza.
33 Kadi o Nzambi, ke Nzambi a mvuanga ko, wa luvuvamu kaka.+
Wauna wina muna nkutakani zawonso za avauki,
34 yambula akento bakala e pi-i muna nkutakani, kadi ke bena yo nswa wa vova ko.+ Kansi, yambula basonga lusakalalu+ wauna uvovele o Nsiku.
35 Avo diambu bazolele zaya, bafwete yuvula kwa akazi au kuna nzo, kadi diansoni kwa nkento kavova muna nkutakani.
36 Nga diambu dia Nzambi kwa yeno diatuka yovo kwa yeno kaka diayiza?
37 Avo muntu okuyibadikilanga vo ngunza yovo lukau lwa mwanda katambwidi, kafwete wo zaya vo mambu mama inusonekene i nkanikinu a Mfumu.
38 Kansi avo muntu kazolele bakula diambu diadi ko, ku bubu kaka kekala.
39 Dianu vo ampangi, nusiamanana o sakula,+ kansi ke nusimi diambu dia vovela muna ndinga zankaka ko.+
40 Kansi, mambu mawonso yambula mavangamena muna unsongi ye mpila yambote.*+
