E Bibila i nsangu zina o Nzambi kasonekesa mu kuma kia yeto awonso. Tufwete kio longokanga kimana twazaya Ndiona wasonekesa kio. (Yoane 17:3; 2 Timoteo 3:16) Omu Bibila, Nzambi wasengomona e kani diandi mu kuma kia wantu yo ntoto.—Tuku 3:15; Lusengomono 21:3, 4.

Ke vena nkanda wankaka ko usundidi e Bibila muna sadisa o wantu muna zingu kiau. Bibila kikutusadisanga mu songa e fu ya Yave nze zola, nkenda yo loloka. Kivananga e vuvu, kisadisanga wantu mu zizidila kana nkutu mpasi zasaka. Kisenzekanga mpe mavangu ma nza yayi mana ke mena ngwizani ko yo luzolo lwa Nzambi.—Nkunga 119:105; Ayibere 4:12; 1 Yoane 2:15-17.

Kuna lubantiku, Bibila mu ndinga Kiyibere, Ki-aramiti ye Kingerekia kiasonekenua. Owau kiasekwelo kala mu vioka 3.000 ma ndinga, kiakala kiawonso yovo ndambu. I nkanda usundidi sekolwa yo kayaneswa muna lusansu lwawonso lwa wantu. Ediadi ke diasivi ko, kadi ungunza wa Bibila uvovanga vo: “E nsangu zazi zambote za Kintinu [nsangu za sina zina omu Bibila] zisamunua mu nza yawonso muna umbangi kwa zula yawonso, i bosi e mbaninu ikwiza.”—Matai 24:14.

Wau tuzeye o mfunu wa nsangu za Bibila, e kani dieto ke vaikisa kaka nsekola ina e ngwizani ye sono ya sina ko, kansi mpe yakiá ye ke yampasi ko mu tanga. Muna Nkudiku A, e ntu mia mambu: “Tuludiku Muna Sekola e Bibila,” “Mambu Mena mu Nsekola Yayi” ye “Aweyi e Bibila Kialwakila kwa Yeto” misasilanga o tuludiku twa nsekola tusadilu ye mpila ivangilu e nsekola yayi.

Awana bezolanga yo sambila Yave wa Nzambi, nsekola ya Diambu dia Nzambi ya ziku ye yasazu mu bakula bavuidi o mfunu. (1 Timoteo 2:4) Muna kuma kiaki, tuvaikisi e nsekola yayi mu Kikongo, kadi i luzolo lweto lwa vaikisa e Bibila—Nsekola ya Nz’ampa mu ndinga zayingi. Tusambanga ye tuna ye vuvu vo ovua nluta muna Sono yayi Yavauka ekolo ovanga e ngolo za ‘vava Nzambi . . . yo kunsolola.’—Mavangu 17:27.