NTU A DIAMBU WA FUKWA | NGA E SAMBU KILENDA TWASA NLUTA?
Ekuma Nzambi Kelombelanga vo Twasamba?
Nzambi ozolele vo twakala akundi andi.
Akundi bemokenanga muna siamisa kikundi kiau. Diau dimosi mpe, Nzambi ozolele vo twamokenanga yandi muna siamisa kikundi kieto yo yandi. Ovovanga vo: ‘Nukumbokela, nukunsambila, ikunuwá.’ (Yeremiya 29:12) Avo okele ye fu kia samba, ‘ofinama Nzambi, oyandi mpe okufinama.’ (Yakobo 4:8) Nkand’a Nzambi uvovanga vo: “Yave ofinamene awonso bekumbokela.” (Nkunga 145:18) E kikundi kieto yo Nzambi kikumamanga vava tusambanga kwa yandi.
“Yave ofinamene awonso bekumbokela.” —Nkunga 145:18
Nzambi ozolele kutusadisa.
Yesu wavova vo: ‘Nkia muntu vovo nwina, avo mwan’andi unlombele e mbolo, kamvana etadi? Avo mbizi a maza kanlombele, kamvana nioka? Dianu vo, avo yeno . . . nuzeye vana tukau twambote kwa wan’eno, o S’eno wina kun’ezulu, nkia nduta keluta vana lekwa yambote kw’awana bekunlomba!’ (Matai 7:9-11) Nzambi ozolele vo wasambanga kwa yandi kadi ‘okulunga-lunganga’ ye ozolele kusadisa. (1 Petelo 5:7) Nzambi ozolele mpe vo wanzayisa o mambu mekutokanesanga. Nkand’a Nzambi ukutuzayisanga vo: “Ke nutelamenwa uma moyo ko; kansi muna mambu mawonso, muna sambu yo ludodokelo yo matondo, e ndomba zeno, mbula zazayiswa kwa Nzambi.”—Filipi 4:6.
Wantu nsatu za mwanda bena zau.
Akwa ngangu ana belongokanga e fu ya wantu, babakula vo mafunda ye mafunda ma wantu bekalanga ye luzolo lwa samba. Kana nkutu akaka muna awana ke bekwikilanga mu Nzambi ko ye awana bekatikisanga vo Nzambi una bena mpe muna buka kiaki. * Ekiaki i ziku kisonganga vo wantu bavangwa ye luzolo lwa sambila Nzambi. Yesu wavova vo: ‘Akwa nsambu ana bazeye e nsatu zau za mwanda.’ (Matai 5:3) E mpila tulenda lungisila e nsatu zazi i mokenanga yo Nzambi lumbu yawonso.
^ tini. 8 O lufimpu lwavangwa kwa nkubika ya Pew Research Center muna mvu wa 2012, lwasonga vo ndonga muna awana ke bekwikilanga mu Nzambi ko kuna Estados Unidos y’awana bekatikisanga vo Nzambi una besambanga kana nkutu nkumbu mosi muna ngonde.
