Matadi ma nikina masadilwanga mu nika masa mavangilwanga e mbolo. Akento yovo antaudi basadilanga matadi mama lumbu ke lumbu. Wau vo o nika i salu kia lumbu ke lumbu basalanga wantu kuna nza nkulu, mazu ma nikinwa matoma zayakana.—Luvaiku 11:5; Yeremiya 25:10.

E fwaniswa ya Engipito ya nkulu isonganga una e salu kiaki kiavangilwanga. E mbwaza zasiwanga va tadi diakoboka fioti edi diyikilwanga vo saddle-quern. O niki wafukamanga vana ndambu a tadi dia nikina (quern), yo sadila e nsindu (nsindilu) muna nika e mbwaza ye moko mole. Akaka bevovanga vo e nsindu tezo kia yilo 2 yovo 4 yazitanga. Avo isadilu se nwaninwa, e nsindu yakitukanga se lekwa kiampondi.—Afundisi 9:50-54.

E salu kia nika mfunu kikilu kiakala muna zingu kia esi nzo, i kuma o nsiku a Nzambi wasiminanga e fu kia bonga e tadi dia nikina se nsimbi. E sono kia Nsiku 24:6 kivovanga vo: “O muntu katambula nikinwa yovo nsindu se nsimbi ko: kadi moyo ketambula se nsimbi.”

Nkand’a Nzambi uvovanga vo Yesu ‘wina muna nkata Se (yovo vana tulu).’ (Yoane 1:18) O mvovo wau uyikanga e ngwizani ina vana vena Yesu yo Nzambi. O mvovo wau usonganga mpe e fu bakala kiau Ayuda vava badianga.

Muna lumbu ya Yesu, Ayuda bayekamanga vana mfika yasiwanga vana ndambu a meza. Konso muntu wafilanga o ntu kuna meza yo sikinina e nitu ye kongonia kia koko kwa lumonso. Ediadi diabasadisanga mu sadila koko kwa lunene muna dia yo vanga mambu mankaka. Yau awonso ku lumonso bayekamenanga, konso muntu vana ndambu a nkwandi. Nkanda mosi wavova vo: “Wau vo ntu a konso muntu wakalanga va ndambu a tulu kia ndiona wanlandilanga. Muna kuma kiaki ndiona wakala ku ntwala wayikilwanga vo vana tulu kena.”

O kala vana tulu kia mfumu a nzo, diabadikilwanga se lau diampwena, zitu mpe diakudikilanga kwa muntu. Muna kuma kiaki, o Yoane wa ntumwa wa “nlongoki ona kazol’o Yesu” yandi wakala vana tulu kiandi muna nkinzi a nsuka wa Nduta. Yoane wakala ye lau dia yuvula diambu kwa Yesu mu ndinga yakuluka.—Yoane 13:23-25; 21:20.