Nga osambanga ntangwa zawonso? Wantu ayingi besambanga, kana nkutu awana ke bekwikilanga mu Nzambi ko. Ekuma wantu besambilanga? Lufimpu lumosi lwavangwa kuna França lusonganga vo wantu ayingi a nsi yayina besambanga “muna vava kaka lufiaulwisu.” Wantu ayingi kuna nsi za Mputu besambanga ke mu sambila Nzambi ko. Kansi, bevavanga kaka tambula lufiaulwisu muna sambu. Kuna diak’esambu, minkwikizi miakaka besambanga kaka vava bekalanga muna mpasi, besambanga kimana bavevoka muna mpasi vana vau.—Yesaya 26:16.

Adieyi tuvova mu kuma kiaku? Nga obadikilanga e sambu nze mpila ya songela ngindu zaku? Nga okwikilanga muna Nzambi, nga omonanga e nluta mia sambu yaku? Nga kutambulanga mvutu za sambu yaku ko? Vana fulu kia badikila sambu nze mpila yavavila lufiaulwisu, Nkand’a Nzambi ulenda kusadisa mu badikila sambu nze nzila ilenda kufinamesa yo Nzambi.