Nzambi wakanikina Abarayama wa selo kia kwikizi vo e “mbongo” yasilwa o nsilu yadi kala se mosi muna wan’andi. E “zula yawonso,” yadi sambulwilwa muna mbongo yayina. (Etuku 22:18) O Yakobo wa ntekelo Abarayama wayaluka yo kwenda kuna Engipito, kuna nsi yayina e kanda diandi diawokela yo kituka se nkangu a Isaele.

Kuna kwalanda, Faro wa nkwa lulendo wakitula Aneyisaele se abundu yavana Nzambi kabundumuna Mose wa ngunza. Mose wavaikisa nkangu a Isaele muna Engipito vava kavambula Mbu a Mbwaki mu mpil’esivi. I bosi, Nzambi wavana nsiku kwa Aneyisaele ye Nkanikinu Kumi muna kubafila yo kubatanina. E nsiku miamina miasikidisa e mpila tukau twadi tambikwa muna ndoloki a masumu. Mose wavumunwinwa kwa Nzambi mu vovesa nkangu a Isaele vo Nzambi wadi kubatwikila ngunza akaka. Ngunza ndioyo i “mbongo” yasilwa o nsilu.

Vioka nkama yá za mvu, Nzambi wasia nsilu kwa Davidi wa Ntinu vo e “mbongo” yasilwa nsilu muna Edene yadi yala muna kintinu yakwele mvu. E mbongo yayina i Masia wa mvuluzi ona wasolwa kwa Nzambi muna vuluza wantu yo vutulwisa e paradiso ova ntoto.

Muna Davidi ye ngunza zakaka, malembe-malembe Nzambi wasengomona mayingi mu kuma kia Masia. A ngunza awaya basakula vo Masia wadi kala nlembami ye nkwa ngemba, muna kintinu kiandi nzala, vita yo umpumbulu ufokoka. Wantu awonso bezingila kuna luvuvamu kumosi ye bulu. Yimbevo, lufwa ye mpasi, mawonso mefokoka kadi ke makala muna kani dia Nzambi ko. Wantu awonso bafwa badi fuluka.

Nzambi wasakula muna Mika wa ngunza vo Masia wadi wutukila muna mbanza Beteleme, muna Daniele wa ngunza, Nzambi wasakula vo Masia wadi vondwa. Kansi, Nzambi wadi fula Masia yo kunyadika se Ntinu kun’ezulu. Daniele wasakula mpe vo Kintinu kia Masia kifwasa tuyalu twawonso twa nza yo vinga vana fulu kiau. Nga Masia wayiza kikilu nze una wasakulwa?

—Dibongelo muna Etuku kapu kia 22-50 ye Luvaiku, Nsiku, 2 Samuele, Nkunga, Yesaya, Daniele, Mika, Zakariya 9:9.