Kuna vata dia Warialda yasansukila, kuna mbanza akete ya Nova Gales do Sul. Kuna vata diadina, wantu batwelanga mameme, ngombe yo vata e mpatu. E vata diadi diavelela diakala, o umpumbulu mpe ke wakala wayingi ko.

Wau vo mono i mbuta muna wana kumi twawutuka, vava yalungisa mvu 13 yayantika sala muna sadisa esi nzo eto. Wau vo kiatanga sikola zandá ko, yayantika vata e mpatu. Vava yalungisa mvu 15 yayantika sala salu kia lunga-lunga e mvalu.

E salu kiaki nluta kiantwasilanga ye mpe yayangalelanga kio. Muna fuku yavwandanga vana ndambu a ziku yo tala ngonde, ntetembwa kuna zulu yo baka mupepe. Yalwaka mu tezo kia yindula vo vena yo Muntu wavanga lekwa yayi yawonso yambote. Kuna diak’e sambu, yasalanga entwadi yo wantu bakala ye fu yambi. Nkumbu miayingi wantu awaya basadilanga mvovo mia lutiangu yo nua fomo. Ke kolo ko, mono mpe yayantika sadila mvovo mia lutiangu yo nua fomo.

Vava yalungisa mvu 18, yayaluka yo kwenda zingila kuna mbanza Sydney. Yakala yo luzolo lwa kota mu salu kia kisoladi, kansi wau vo kiatanga sikola zandá ko kiatambulwilwa ko. Kansi, yabaka salu kiakaka yo zingila kuna mbanza Sydney mu mvu amvimba. Muna kolo kiakina, yawanana ye Mbangi za Yave mu nkumbu antete. Yatambulwila kwenda kuna lukutakanu lwau yo bakula vana vau vo malongi mau maludi kikilu.

Ke kolo ko, yabaka nzengo za vutuka kuna vata. Yalwakila kuna vata dia Goondiwindi, kuna mbanza Queensland. Yabaka e salu yo kazala, kansi diankenda kikilu wau vo yayantika mpe kolwa malavu.

Mono yo nkaz’ame twawuta wana wole. Vava wan’ame bawutuka, yayantika yindula kuna zingu ­kiame ­kiamfilanga. Yasungamena mana yalongoka muna lukutakanu lwa Mbangi za Yave kuna Sydney yo baka nzengo za vanga diambu mu kuma kiaki.

Yasolola Eyingidilu diankulu diasonganga fulu kiakala e vula dia Mbangi za Yave kuna Austrália. Yatwika nkanda kuna vula yo lomba lusadisu. Mbangi mosi anzolwa a Yave wankingula. Vana vau, wayantika kundonga Nkand’a Nzambi.

Ekolo yalongokanga Nkand’a Nzambi, yabakula vo mfwete soba mpila zingu kiame. E sono kia 2 Korinto 7:1 kiatoma simba ntim’ame. E sono kiaki, kikutukasakesanga vo “twayikiànzisa muna nsafu wawonso wa nitu.”

Yabaka nzengo za yambula nua fomo yo kolwa malavu. Diampasi diakala mu vanga nsobani zazi wau vo se mvu miayingi yakala ye fu yayi. Kansi, yabaka nzengo za yangidika Nzambi. Yabaka lusadisu lwampwena muna sadila nkanikinu wina muna Roma 12:2 uvovanga vo: “Ke nwiyisi’e fwani-fwani ye tandu kiaki ko: nukituk’aka muna mpanguluk’a nyindu mieno.” Yabakula vo muna soba fu yame, mfwete soba ngindu zame yo badikila fu yame una Nzambi kebadikilanga yo, i sia vo yambi. Muna lusadisu lwandi, yayambula nua fomo yo kolwa malavu.

E fu kiakala e mpasi muna sunda i yambula sadila mvovo mia lutiangu. Yatoma zaya luludiku luna muna Efeso 4:29 luvovanga vo: “E diambu diansafu ke divaika mu nua mieno ko.” Kana una vo i wau, kiayambula fu kiaki vana vau ko. Yabaka mpe lusadisu muna badika sono kia Yesaya 40:26. Mu kuma kia ntetembwa kuna zulu e sono kiaki kivovanga vo: “Nusengola meso muna kayè, nwamona: nani osemene yayi yawonso, ovaikisanga vu kiau muna lutangu: obokele yau awonso muna nkumbu; muna nene wa nkum’andi, wau vo nkwa mpamu mun’efuka, ke vakondelo mosi ko.” Yayindula vo, wau vo Nzambi una yo nkuma wavanga lekwa yawonso, ka lukatikisu ko vo okumpana ngolo muna sunda fu yame yambi muna kunyangidika. E ngolo yavanga yo lomba lusadisu muna sambu, diansadisa mu yambula malembe-malembe e mvovo mia lutiangu.

Muna salu kia lunga-lunga mvalu, kiakala ye lau dia mokena yo wantu ayingi ko, e kuma kadi ke vakala wantu ayingi ko vana yasadilanga. Muna malongi ma lukutakanu lwa Mbangi za Yave, yalongoka mpila yambote yavovela. Malongi mama mekunsadisanga mu samuna nsangu za Kintinu kia Nzambi kwa wantu akaka.—Matai 6:9, 10; 24:14.

Se mvu miayingi isalanga se nkuluntu muna nkutakani. Ibadikilanga kiyekwa kiaki se lau diampwena muna sadisa mpangi zame. E nsambu zampwena yatambula i sala entwadi yo nkaz’ame yo wan’ame anzolwa muna salu kia Yave.

Kana una vo kiatanga sikola zandá ko, ivutulanga matondo wau vo Yave wandonga. (Yesaya 54:13) Ikwikilanga muna sono kia Ngana 10:22 kivovanga vo: “O lusambulu lua Yave luvwamisanga.” Mono y’esi nzo ame tuna y’etima dia longoka mayingi mu kuma kia Yave yo kunsadila yakwele mvu.