Nineve yakala mbanza Asuri. Yakala mbanza ampwena ye lumbu lwambote lw’atinu ye tempelo zambote, nzila zampwena ye yaka yampwena. O Nakumi wa ngunza wa Nyibere wayikila Ninive vo “mbanz’a menga.”—Nakumi 3:1.

E mvovo miami mia ziku kadi e fwaniswa yakala muna lumbu lwa Sankerebe kuna Nineve yasonganga o nsoki wa esi Nineve. E fwaniswa kiakaka kiasonganga muntu wavuzanga lubini lwa mbakami wakangwa moko ye malu. Fwaniswa yakaka yasonganga mpe abakami bakangwanga mu nsinga miakala ye luvaku lwazenganga nua yovo nzunu miau. Mfumu za makesa babakamanga muna vita, bavwatiswanga nsanga miasiwa ntu mia ntinu miau muna nsingu.

Archibald Henry Sayce wa nlongoki a lusansu lwa Asuri wayika mavangu ma nsoki bavanganga esi Nineve vava bakutumunanga mbanza: “Bakundidikanga ntu mia wantu muna songa e nsunda zau; matoko ye ndumba bayokwanga kimoyo yovo kubavanga konso mbi bazolele; ayakala bazembekwanga, katulwa nkanda a nitu, bavondwanga meso, babutunwanga moko, malu yo zengwa matu yo nzunu.”

Nzambi wakanikina Ayuda vo: “Ovo otunga nzo ampa, otunga mpe nkakidilwa kuna nludi aku, kwatwasw’o menga muna nzo aku, ovo muntu osotokele ko.” (Nsiku 22:8) Osia nkakidilwa kuna nludi mfunu diakala muna tanina wantu wau vo Ayuda muna nz’ankulu batoma sadilanga nludi mia nzo zau.

Nzo zayingi z’Aneyisaele zakala ye nkakidilwa vana nludi. Kiakala se fulu kiambote kiabavananga viozi muna ntangwa mwini, tembwa kiambote ye fulu kia sadila salu yau ya nzo. Kiakala mpe se fulu kiambote mu leka vava mbangazi yovo diukusa kiasakanga. (1 Samuele 9:26) O mvati a nsengo wasadilanga nludi muna yanika mbongo, yumisa nsanda yovo yanika e mvwatu.—Yosua 2:6.

E nludi mia nzo miasadilwanga mpe muna nsambila aludi ye ya luvunu. (Nekemiya 8:16-18; Yeremiya 19:13) O Petelo wa ntumwa watomboka vana nludi a nzo mu samba, muna tezo kia ola ya kumi ye zole. (Mavangu 10:9-16) Kele vo e viozi kia nsinga mia vinyo yovo ndala, fulu kiambote kibeni kiakalanga.

O nkanda A Terra e o Livro uvovanga vo, muna nzo z’Aneyisaele mwakala ye sikada yasadilwanga muna “kati ye ku mbazi.” Ediadi diasadisanga o muntu mu kulumuka kuna nludi lembi kota muna nzo. Ediadi dikutusadisanga mu bakula o lulukisu lwa Yesu mu kuma kia mbanza yazietwa: “Ona wina vana nludi a nzo, kakulumuka kenda bonga ma kina muna nzo andi ko.”—Matai 24:17.