Nkand’a Nzambi usasilanga “lukwikilu” vo i kala ye ziku kia diambu. Ndiona okwikilanga muna Nzambi, obundanga e vuvu vo Nzambi olungisa e nsilu miandi miawonso.

Mose wasonga muna zingu kiandi kiawonso vo wakwikilanga muna nsilu mia Nzambi. (Etuku 22:15-18) Wakala ye lau dia vwa zingu kiambote kumosi ye kimvwama kia Engipito, kansi wabembola elau diadina yo ‘sola o vangwa e mbi kumosi yo nkangu a Nzambi, ke mu mona wete w’esumu muna kolo kiandwelo ko.’ (Ayibere 11:25) Nga mu nzaki kabakila nzengo zazi yo kuyibanza? Ve, kadi tutanganga muna Nkand’a Nzambi vo o Mose ‘wakwamanana zizidila, wau kamonanga ndion’olembi moneka.’ (Ayibere 11:27) Mose kayibanza nkutu ko muna nzengo kabaka.

Mose wasadisanga akaka mu kala ye lukwikilu lwasikila muna Nzambi. Muna bonga e nona, badika dina diabwa vava Aneyisaele ke bakala y’owu wa tinina ko, Mbu Ambwaki kuna ntwala, oku nima makesa ma Faro. Aneyisaele babakama wonga yo kazila Yave yo Mose kadi bayindulanga vo befwaswa. O Mose, adieyi kavanga?

Mose kazaya wo ko vo Nzambi ovambula Mbu Ambwaki muna ziula nzila kwa nkangu andi Isaele muna tinina. Kansi, Mose wakala ye vuvu vo Nzambi ovanga diambu muna tanina nkangu andi. O Mose wazola vo Aneyisaele bakala mpe ye vuvu kiaki. Tutanganga vo: ‘O Mose ovovese nkangu vo, ke numoni wonga ko, nutelama ngwi, nwamona mpuluz’a Yave, eyi kekunuvuluz’o unu.’ (Luvaiku 14:13) Nga Mose wavwa nluta muna kasakesa akw’andi Aneyisaele? Elo, kadi Nkand’a Nzambi uvovanga mu kuma kia Mose ye Aneyisaele awonso vo: ‘Muna lukwikilu i baviokela muna Mbu Ambwaki nze va senge.’ (Ayibere 11:29) O lukwikilu lwa Mose ke lwatwasa kaka nluta kwa yandi ko, kansi kw’awonso babundanga e vuvu muna Yave.

Tulenda tanginina Mose muna kwikilanga muna nsilu mia Nzambi. Muna bonga e nona, Nzambi osianga nsilu vo olunga-lunga nsatu zeto muna nitu avo tusidi nsambil’andi va fulu kiantete muna zingu kieto. (Matai 6:33) Kieleka, dilenda kala diampasi mu lembi sia mavwa va fulu kiantete wau vo ndonga bevanganga wo. Kansi, tulenda kala ye ziku vo, avo tuvangidi mawonso tulenda muna vevola e zingu kieto yo sia sungididi muna salu kia Nzambi, Yave olungisa nsatu zeto zawonso. Nzambi osianga nsilu vo: “Kikuyambula nkutu ko, ngatu kusisa nkutu.”—Ayibere 13:5.

Tusianga mpe ngolo mu sadisa akaka banungunuka muna mwanda. Muna bonga e nona, mase mazikuka bazeye elau diampwena bavwidi dia sadisa wan’au kimana bakala ye lukwikilu muna Nzambi. Ekolo wana benungunukanga bafwete zaya vo Nzambi una ye okutulonganga edi diambote y’edi diambi. Vana ntandu, bafwete kala ye ziku vo olemvokela nsiku mia Nzambi i diambu disundidi o mfunu muna zingu kiau. (Yesaya 48:17, 18) Mase bevananga lukau lwamfunu kwa wan’au vava bekubasadisanga mu kwikila vo Nzambi ‘wina ye osendanga awana bekuntombanga.’—Ayibere 11:6.