Ku mbanza Santo Domingo yawutukila kuna nsi a República Dominicana, i mwan’a nsuka muna wana yá. Mase mame wantu batoma longwa bakala ye bazola mpe vo o wan’au batoma longwa. Mvu yá vitila yawutuka, mase mame bawanana ye misionario mia dibundu dia Mórmon. Basivika kikilu muna mpil’ambote bavwatila wantu awaya yo baka nzengo zakota muna dibundu diadi diyikilwanga vo, Igreja de Jesus Cristo dos Santos dos Últimos Dias yovo dibundu dia Mórmon.

Ekolo yanungunukanga, yakala ye kiese kia kuyivana muna salu ya dibundu dia Mórmon yo zitisa malongi mu kuma kia zingu kia nzo ye nkal’ambote. Mu kuma kia kiese yamonanga muna dibundu dia Mórmon, yakala ye luzolo lwa kota mu salu kia kimisionario.

Vava yakala ye mvu 18, twayaluka yo kwenda kuna Estados Unidos y’ekani dia tanga sikola zandá. Vava twalungisa mvu mosi, ngudi ame anleke yo nkaz’andi bena vo Mbangi za Yave, bayiza kutukingula kuna Flórida. Batubokela twenda lungana yau kuna lukutakanu lwa mvivu lwa Mbangi za Yave. Yasivika kikilu vava yamona vo awonso bafonga vana ndambu ame batanganga e sono ya Nkand’a Nzambi yo soneka mana bawanga. Muna kuma kiaki, yalomba lapi yo vanga diau adimosi.

Wau vo yakala y’ekani dia sala salu kia kimisionario, ngudi ame anleke yo nkaz’andi bampovesa vo balenda kunsadisa mu longoka oma ma Nkand’a Nzambi. E ngindu zazi zambote zakala kadi yazaya mayingi mu kuma kia dibundu dia Mórmon ke mu Nkand’a Nzambi ko.

Vava yalongokanga Nkand’a Nzambi yo ngudi ame anleke yo nkaz’andi muna telefone, bankasakesanga mu tezanesa malongi ma dibundu diame ye malongi ma Nkand’a Nzambi. Bazola vo yafimp’e ludi mono kibeni.

Yakwikilanga mu malongi mayingi ma dibundu dia Mórmon, kansi kiakala ye ziku ko kana vo malongi mama ngwizani makala ye malongi ma Nkand’a Nzambi. Ngudi ame anleke wantwikila Despertai! ya kia 8 kia ngonde Novemba 1995, yavaikiswa kwa Mbangi za Yave eyi yasasilanga lukwikilu lwa dibundu dia Mórmon. Yasivika kikilu kadi kiazaya mayingi ko mu kuma kia dibundu dia Mórmon. Ediadi diamfila mu vavulula e nzila dibundu dieto muna Internete mu zaya kana vo mana mavovwanga muna Despertai! maludi. Yazaya e ziku vo mambu mama maludi vava yakingula malundilu ma lekwa ya nza nkulu ma dibundu dia Mórmon kuna mbaz’a Utah.

Yakwikilanga vo malongi ma dibundu dia Mórmon ngwizani makala ye malongi ma Nkand’a Nzambi. Kansi, vava yayantika tanga Nkand’a Nzambi ye sungididi kiawonso, yabakula vo malongi ma dibundu diame ke makala ngwizani ko yo Nkand’a Nzambi. Muna bonga e nona, e sono kia Yezekele 18:4 kivovanga vo o moyo fwa ufwanga. Kansi, muna Nkand’a Mórmon, Alma 42:9 kivovanga vo: “O moyo ke ulendi fwa ko.”

Vana ntandu, elongi diyikanga vo muntu kafwete kala ye zola kwasaka muna nsi andi, diantokanesanga kikilu. Muna bonga e nona, e dibundu dia Mórmon dilonganga vo e mpatu a Edene kuna zunga kia Jackson yakala, kuna mbanza Missouri, Estados Unidos. Angunza dibundu bevovanga vo vava “Kintinu kia Nzambi kiyantika o yala, e sinsu kia nsi (bandeira) kia Estados Unidos kizangikwa vana fulu kina e teke kiyikilwanga vo Estátua da Liberdade.”

Yakiyuvulanga, kana vo nkia diambu dialongwanga muna dibundu dia Mórmon mu kuma kia nsi zakaka yovo nsi ina yawutukila. Lumbu kimosi muna fuku, yayuvula diambu diadi kwa toko dimosi dia dibundu diame yamokenanga yandi muna telefone ona wakubikwanga mu kituka se misionario. Yanyuvula kana vo olenda nwana ye akwa dibundu dia Mórmon a nsi akaka kele vo nsi au mu vita ina ye nsi andi. Yasivika kikilu vava kampovesa vo olenda kwandi nwana! Yatoma fimpulula malongi ma dibundu diame yo mokena mpe ye afidi a dibundu. Bampovesa vo e mvutu za yuvu yame mambu ma mbumba, kansi vena ye lumbu mesinga senzekwa vava o ntemo utemoka.

Yakendalala muna mvutu bampana, muna kuma kiaki yafimpa mambu mama mono kibeni yo vava zaya dina diamfilanga mu vava kota mu salu kia kimisionario. Yabakula vo luzolo lwa sadisa akaka i diambu diamfilanga. Yakala mpe y’etima dia salu kiaki kadi yazaya wo vo wantu badi kunzitisa. Kansi, kiazaya mayingi ko mu kuma kia Nzambi. Kana una vo yafimpanga Nkand’a Nzambi, kiavwanga wo mfunu ko. Kiazaya kana diambu dimosi ko mu kuma ki’ekani dia Nzambi, mu kuma kia ntoto yo wantu.

Mun’elongi diame dia Nkand’a Nzambi ye Mbangi za Yave, yalongoka vo Nzambi una ye nkumbu, adieyi dibwilanga wantu vava befwanga ye fulu kia Yesu muna ndungana ekani dia Nzambi. Yayangalela emvimba o tanga Nkand’a Nzambi yo zayisa akaka mana yalongokanga. Yakwikilanga vo Nzambi una, kansi owau ndenda mokena yandi muna sambu nze Nkundi ame. Kina kia 12 kia ngonde a Yuli ya mvu a 2004 yavubwa, vava vavioka ngonde sambanu yayantika sadila Nzambi mu salu kia ntangwa ke ntangwa.

Vioka mvu ntanu, yayantika sadila kuna vula dia sina dia Mbangi za Yave kuna mbanza Brooklyn Nova York, Estados Unidos. Ngina ye kiese kia sadila kuna suku dikubikilwanga Nkand’a Nzambi ye nkanda miakaka misasilanga Nkand’a Nzambi yo sadisa akaka mu longoka oma ma Nzambi.