O Wana Nkia Mambu Bafwete Longoka mu Kuma kia Nzambi?
O Wana Nkia Mambu Bafwete Longoka mu Kuma kia Nzambi?
“E sono yawonso yavumunwinwa kwa Nzambi, ina yo mfunu mpe muna longa, muna tumba, muna ludika, yo muna nsansa ina ya nsongi.”—2 TIMOTEO 3:16.
O WANA bafwete longwa e ludi mu kuma kia Nzambi. Akweyi bafwete longokela e ludi? Muna Nkand’a Nzambi una vo i nkanda usundidi zitiswa omu nza.
O Nkand’a Nzambi una nze nkanda watuka kwa Nzambi. Muna nkanda wau, Nzambi wasengomona e kiwuntu kiandi yo vana e nsiku mia nkal’ambote kwa wan’andi awonso, ambuta ye aleke. Tala e maka malongi mena muna Nkand’a Nzambi ye dina tulenda longoka twakala ambuta yovo aleke.
O Nzambi adieyi kazolele twazaya mu kuma kiandi?
▪ Nkand’a Nzambi adieyi kelonganga: “Nge kaka wina nkumbu a Yave, u Mpungu omu nza yawonso.”—Nkunga 83:18.
Elongi: Nzambi ke nkuma ankatu ko, kansi Una kikilu ye una ye nkumbu.
▪ Nkand’a Nzambi adieyi kelonganga: “O Yave osatanga ntima miawonso, yo bakula mona-mona yawonso ya ngindu: Ovo okuntomba, osolok’oko wina.”—1 Tusansu 28:9.
Elongi: Yave wa Nzambi ovwanga awonso o mfunu kumosi ye wan’akete. (Nkunga 10:14; 146:9) Ozolanga vo twalongoka mu kuma kiandi.
▪ Nkand’a Nzambi adieyi kelonganga: ‘Kumwesesa konso munkondw’ese mpasi ko, ovo okubamwesesa konso fimpasi, oyau mpe basimb’o kunkazila, wa nwa kazu kiau.’—Luvaiku 22:22-24.
Elongi: Yave owanga e sambu kana nkutu ya wan’akete. Tulenda mokena yo Nzambi e ntangwa zawonso yo kunsonga ngindu ye makani meto.
▪ Nkand’a Nzambi adieyi kelonganga: “Bavutukidi, batambididi Nzambi, yo kendeleka Mvaudi a Isaele.”—Nkunga 78:41.
Elongi: E mvovo ye mavangu meto diambu mevanganga kwa Yave, muna kuma kiaki tufwete teka yindulanga una ke twavovele ko yo vanga diambu.
Aweyi tufwete kadilanga y’awana twaswaswana ekanda?
▪ Nkand’a Nzambi adieyi kelonganga: ‘O Nzambi ke swaswanesanga wantu ko, kansi muna zula yawonso, on’okumvumina yo vanga nsongi, wina y’edieng’oku kena.’—Mavangu 10:34, 35.
Elongi: Wau vo Nzambi otondanga wantu a mpila zawonso, oyeto mpe ka tufwete swaswanesanga wantu ko mu kuma kia se kia nitu ye mpw’au yaswaswana.
▪ Nkand’a Nzambi adieyi kelonganga: “Nukubama kak’o vana mvutwilu kwa konso on’okunuyuvul’e kuma kia vuvu kin’omo yeno, kansi kuna lembama, yo vumi.”—1 Petelo 3:15.
Elongi: Vava tusasilanga oma ma lukwikilu lweto, tufwete vovanga ye ziku, kansi kuna ngemba zawonso. Tufwete mpe zitisanga awana bena mu dibundu diaswaswana ye dieto.
Aweyi tufwete kadilanga y’esi nzo eto?
▪ Nkand’a Nzambi adieyi kelonganga: “Wana, nulemvokela mase meno, ye ngudi zeno, muna mambu mawonso, kadi i dialuyangalalu didi kuna kwa Mfumu.”—Kolosai 3:20.
Elongi: O wana belemvokelanga mase besonganga vo bezolanga mase mau yo yangidika Nzambi.
▪ Nkand’a Nzambi adieyi kelonganga: “Nuvezananga mambu yo yambuziana, ovo muntu obakidi nkw’andi diambu; wauna kanuyambulwila o Mfumu, i una mpe nuyambulwila.”—Kolosai 3:13.
Elongi: O wantu akaka kumosi ye yitu yeto, ezak’e ntangwa balenda kutukendeleka. Kansi avo tuzolele vo Nzambi katuloloka, oyeto mpe tufwete loloka akaka.—Matai 6:14, 15.
Ekuma tufwete kadila akwa ziku ye wantu ambote?
▪ Nkand’a Nzambi adieyi kelonganga: “Nutengola luvunu, [yo] vova ludi, muntu yo muntu yandi: kadi tu yîkwa ya yîkwa.”—Efeso 4:25.
Elongi: Vava tuvovanga e ludi, Nzambi tutangininanga yo kunyangidika. Avo tuyima e fu kia vova luvunu, tukala nze Nkadi Ampemba wa mbeni a Nzambi una vo, ‘ese dia luvunu.’—Yoane 8:44; Tito 1:2.
▪ Nkand’a Nzambi adieyi kelonganga: “Konso una nuzolele o wantu vo banuvanga, i nuvanga mpe kwa yau.”—Matai 7:12.
Elongi: Tufwete zayanga ngindu, makani ye nsatu za yitu yeto ye wantu akaka. Vava tusonganga e “ngyambani muna mpasi yo wete,” akaka nanga balenda kadila yeto kuna ngemba.—1 Petelo 3:8; Luka 6:38.
Nze una nona yayi isongele, e malongi mena muna Nkand’a Nzambi malenda sadisa o wana mu songa luyangalalu, luzitu ye ngemba nze una bevanganga ambuta. Kansi, nani ofwete longa malongi mama kwa wana?
