Finama Nzambi

Yave Watuvan’o Nswa a Kuyisolela Nsiku 30:11-20

“NKUMBU miayingi ikalanga ye wonga kana vo kilenda sikila ye kwikizi ko muna Yave.” Ukavova mpangi mosi ankento wamonanga vo mavangu mambi kavanga muna kileke mekuntumbanga. Nga i wau mpe oyindulanga? Nga ke tuna ye ndiona olenda kututanina ko mu ntangw’a mpasi? Ve. Yave wa Nzambi watuvana lukau lwa nswa a kuyisolela kimana twakisolela una tusadila e zingu kieto. Yave ozolele vo twasola nsola yambote, Nkand’a Nzambi ukutusonganga una tulenda wo vangila. Tala e mvovo mia Mose mina muna nkanda Nsiku kapu kia 30.

Nga diampasi mu zaya dina kevavanga Nzambi kwa yeto yo vanga dio? * Mose wavova vo: “O nkanikinu wau una ikukanikinang’o unu, ke wesivi oko wina ko, ngatu valuka.” (Tini kia 11) Yave ka kutulombanga dina katulendi vanga ko. E nkanikinu miandi ke miampasi ko, tulenda mio tumama. Tulenda mpe zaya dina kevavanga kwa yeto. Ke tuvava kwenda “ku zulu” ko mu solola dio, ngatu “sauka mbu” mu longoka dina kevavanga Nzambi kwa yeto. Nkand’a Nzambi ukutusonganga una tufwete zingila.​—⁠Mika 6:⁠8.

Yave ke kutukomekenanga ko vo twanlemvokela. Mose wavova vo: “O unu isididi moyo yo wete, lufwa ye mbi.” (Tini kia 15) Tuvwidi nswa wasola moyo ye lufwa, wete ye mbi. Tulenda sola sambila yo lemvokela Nzambi yovo kunkolamena yo baka e mfwilu. E nsola ya yeto kibeni.​—⁠Ngalatia 6:​7, 8.

Nga Yave otokanenanga e nsola tusolanga? Elo! Mose wavumunwinwa kwa mwand’a Nzambi mu vova vo: “Sola moyo.” (Tini kia 19) Aweyi tulenda solela moyo? Mose wavova vo: “Muna zola Yave wa Nzambi aku, yo wila nding’andi, yo kuntatidila.” (Tini kia 20) Avo tuzola Yave, tuvava kunwila, kunlemvokela yo sikila ye kwikizi kiawonso, kana nkutu nkia diambu dilenda kutubwila. Muna mpila yayi, moyo tusolanga​—⁠mpila zingu kiambote owau ye vuvu kia vwa moyo a mvu ya mvu kuna sentu, muna nz’ampa a Nzambi.​—⁠2 Petelo 3:​11-13; 1 Yoane 5:⁠3.

E mvovo mia Mose milenda kutufiaulwisa kikilu. Kana nkutu nkia diambu dilenda kubwila mu nza yayi yambi, kukondele nsadisi ko ngatu watumbwa mu lembi sikila ye kwikizi. Yave watuvana lukau lwa nswa a kuyisolela. Ozevo, olenda sola zola Yave, kunwila yo sikila ye kwikizi muna yandi. Avo vangidi wo, Yave osambula ngolo zaku.

Dialudi vo, tuvwidi nswa wakisolela. Tulenda kweto sola sadila Yave yo kunzola. Ediadi diafiaulwisa nkento ona tuyikidi kala. Wavova vo: “Itoma zolanga Yave. Ezak’e ntangwa mvilakananga vo e diambu disundidi o mfunu i zaya vo Yave nzolanga. Muna mpila yayi kaka ndenda sikila ye kwikizi.” Muna lusadisu lwa Yave ngeye mpe olenda wo vanga.

[Mvovo Vana Yand’a lukaya]