Longa Wan’aku

Nga u Nkwa Kimpala? Ampangi za Yosefe Kimpala Bamwenanga

YAMBULA twafimpa e nsasa ya kala nkwa kimpala. Nga diampasi omonanga dia zola muntu, musungula vava kesanisinwanga kw’akaka vo mote yovo muntu ambote? *​—⁠I diau dilenda bwa vava omwenanga nkw’aku kimpala.

Kimpala kilenda kota muna nzo kele vo mase balutidi zola mwana oyu ke mu wakaka ko. Nkand’a Nzambi uyikanga lusansu lwa nzo mosi yakota kimpala yo twasa mpasi zayingi. Yambula twabadika e mpasi zilenda twasa kimpala y’elongi tulenda longoka mu dina diabwa.

Yosefe, mwan’a kumi ye mosi wa Yakobo kakala. Ampangi zandi, kimpala bamwenanga. Nga ozeye ekuma?​—⁠Ekuma kadi, Yakobo w’es’au Yosefe kaluta zola. Muna bong’e nona, wantungila kinkutu kiambote kianda. Yakobo waluta zola Yosefe “kadi yandi i mwan’a ununu wandi” ye mwan’antete a Rakele wa nkaz’andi anzolwa.

Muna Nkand’a Nzambi tutanganga vo ‘vava mpangi za Yosefe zamona vo ese diau olutidi kunzola; bamengene.’ Lumbu kimosi Yosefe wasamunwina s’andi ye mpangi zandi e ndozi ina kalota vo yau awonso bamvumbamene. Tutanganga muna Nkand’a Nzambi vo, “e mpangi [zandi] zimwenene e kimpala,” o Yakobo w’es’andi mpe, wansemba mu kuma kia ndozi kabatela.​—⁠Etuku 37:​1-11.

Muna mvu mialanda vava Yosefe kalungisa kimbuta kia mvu 17, ampangi zandi kwanda bakala mu vungula mameme ye nkombo z’es’au. I kuma Yakobo katumina Yosefe kenda zaya mavimpi ma mpangi zandi. Ng’ozeye dina bakana  kumvanga akaka muna mpangi zandi vava bamona vo Yosefe mu kwiza kena?​—⁠Vonda bazola kumvonda. Kansi awole muna mpangi zandi, Rubeni yo Yuda ke batonda dio ko.

Vava akiti bayendanga kuna Engipito baviokela muna nzila bakala, Yuda wavova vo: “Nwiza, twanteka.” I diau mpe bavanga. I bosi, bavonda e nkombo yo zaza menga mandi muna kinkutu kia Yosefe. Banata kinkutu kiandi kwa s’au, vava kamona kio wavova vo: ‘Bulu kiambi kididi Yosefe.’​—⁠Etuku 37:​12-36.

Kuna kwalanda, Yosefe wamwenwa edienga kwa Faro wa nyadi a Engipito. Kadi, Nzambi wansadisa mu zayisa e nsasa za ndozi zole za Faro. E ndozi antete wamona ngombe nsambwadi zamazi. I bosi, wamona ngombe nsambwadi zatanda. E ndozi anzole wamona ntu nsambwadi mia masa miambote, i bosi kamona ntu nsambwadi mia masa mialengela. Yosefe wazayisa vo, e ndozi zau zole zasonganga vo mvu nsambwadi mukala yo ulolo wa madia, i bosi mvu nsambwadi mia mvengele milanda. Faro wavana Yosefe kiyekwa kia kutika yo lunda madia muna mvu miamina mia madia mayingi, kimana bakala ye madia muna mvu mia mvengele.

Vava mvu miamvengele mialwaka, mpangi za Yosefe bakala kwanda ke bakala ye madia ko. Yakobo watuma mpangi kumi za Yosefe benda vava madia kuna Engipito. Bayenda kwa Yosefe kansi, ke bansungamena ko. O Yosefe kayisengomona ko kana yandi i nani, kansi wazola zaya diambu kw’ampangi zandi. Wabakula vo mpangi zandi bakibanza mu mbi ina bamvanga. I bosi kabavovesa vo yandi i Yosefe. Babimbakana muntu yo nkw’andi yo yangalala.​—⁠Etuku kapu kia 40 yakuna 45.

Adieyi olenda longoka mu lusansu lwalu lwa Nkand’a Nzambi mu kuma kia kimpala?​—⁠Kimpala kilenda twasa mpasi zayingi yo fila nkutu o muntu mu vanga mpangi andi e mbi. Yambula twatanga Mavangu 5:​17, 18 ye 7:​54-59 yo mona una kimpala kiafidila wantu mu vanga mbi kw’alongoki a Yesu.​—⁠Wau otangidi sono yayi, ng’omwene ekuma tufwete vengela fu kia mwena akaka kimpala?​—⁠

Yosefe mvu nkama ye kumi kazinga. Wawuta wana, oyau banwutila atekelo, awaya mpe bawuta wana. Tulenda kala ye ziku vo Yosefe mpe wabalonga bazolana yo venga kimpala.​—⁠Etuku 50:​22, 23, 26.

[Mvovo Vana Yand’a lukaya]

Yuvu:

○ O kala nkwa kimpala aweyi disongele?

○ E kimpala nkia diambu kiafila ampangi za Yosefe mu vanga?

○ Ekuma Yosefe kalolokela mpangi zandi?

○ Adieyi tulenda longoka muna lusansu lwandi?