1, 2. Nkia ungunza mu kuma kia lumbu yambaninu watokanesa alongoki a Yesu? Ekuma?

LUMBU kimosi, Petelo, Yakobo, Yoane yo Andere va yau kaka bakala yo Mfumu au. Dina Yesu kabavovesa mu kuma kia lufwasu lwa tempelo diabatokanesanga kikilu. (Maku 13:1-4) Muna kuma kiaki, banyuvula vo: “Utusamunwin’e ntangwa mekal’o mambu mama; nki i sinsu mpe kia ngiz’aku, ye mbaninu a tandu?” (Mat. 24:1-3) Muna mvutu kabavana, Yesu kabazayisa kaka mambu mevangama vitila lufwasu lwa Yerusaleme ko, kansi wabazayisa mpe mana mebwa muna lumbu yambaninu a nza yayi yambi. Yesu wayika mambu mampasi mebwa, nze vita, mvengele ye umpumbulu. Kansi wayika mpe diambu diakiese divangama. Wavova vo: “E nsangu zazi zambote za kintinu zisamunwa muna nza yawonso, muna umbangi kwa zula yawonso; i bosi iluak’e mbaninu.”—Mat. 24:7-14.

² Alongoki a Yesu batoma yangalelanga salu kia samuna e nsangu zambote za Kintinu kumosi yo Kristu. (Luka 8:1; 9:1, 2) Nanga basungamenanga mana kabavovesa vo: “O nsâlu wayingi, nsadi mike: dianu vo, nudodokela Mfumu a nsâlu, katuma nsadi muna nsâlu andi.” (Luka 10:2) Kansi aweyi badi samunwina e nsangu zambote “muna nza yawonso” yo sila “umbangi kwa zula yawonso”? Akweyi badi tuka asadi? Alongoki ke babakula ko e mpila y’esivi ilunganena e mvovo mina muna Matai 24:14.

3. Aweyi sono kia Luka 21:34 kilunganenanga mu lumbu yeto? Nkia yuvu tufwete kiyuvula?

³ Ungunza wa Yesu ulungananga mu tandu kieto. Mazunda ma wantu o unu beyikamanga e salu kia samuna nsangu zambote za Kintinu mu nza yawonso. (Yes. 60:22) Kansi, Yesu wasonga vo diampasi dikala kw’akaka mu sia e salu kia samuna nsangu zambote va fulu kiantete mu lumbu yayi yambaninu. E ntima mia wantu ayingi ‘mizemboka’ wau vo bekuyivana mu mambu makaka oma mekubafwis’e diya. (Tanga Luka 21:34.) Tumonanga mpe ndungan’a mvovo miami. Akaka vana vena nkangu a Nzambi ke besianga oma masundidi o mfunu va fulu kiantete ko. Tulenda dio zayila muna nzengo bebakanga mu kuma kia salu yau, tanga sikola zandá, vava mavwa mayingi yovo muna ntangwa beviokesanga muna nsaka. Akaka beyoyanga muna salu kia Nzambi kadi betokananga kwayingi mu kuma kia zingu kia lumbu ke lumbu. Ukiyuvula: ‘Aweyi ibadikilanga mambu mama? Nga isianga luzolo lwa Nzambi va fulu kiantete muna zingu kiame?

4. (a) Adieyi Paulu kalomba muna sambu mu kuma ki’Akristu kuna Filipi? Adieyi Akristu ayingi bavanga? (b) Adieyi tubadika mun’elongi diadi ye dina dilanda? Aweyi malongi mama malenda kutusadisila?

⁴ Muna tandu kiantete, diavavanga vo Akristu bavanga ngolo za sia salu kia Nzambi va fulu kiantete muna zingu kiau. Ekiaki i kuma kiafila Paulu mu samba mu kuma kia Akristu kuna Filipi kimana ‘bavavang’o zaya oma masundidi o mfunu.’ (Tanga Filipi 1:9-11.) Nze Paulu wa ntumwa, Akristu ayingi ‘basonganga unkabu wa vovela diambu dia Nzambi kondwa kwa wonga.’ (Fili. 1:12-14) Diau adimosi, ayingi muna yeto o unu besamunanga Diambu dia Nzambi kuna unkabu wawonso. Kana una vo i wau, o fimpa e salu kisalwanga o unu muna nkubik’a Yave dilenda kutusadisa mu sia sungididi muna salu kisundidi o mfunu. Mun’elongi diadi, tubadika e nkubika kevanganga o Yave muna lungisa e sono kia Matai 24:14. Nkia salu kisalwanga muna nkubik’a Yave? Aweyi dilenda kutukasakesela kumosi y’esi nzo zeto? Mun’elongi dilanda, tubadika dina dilenda kutusadisa mu zindalala muna salu kia Nzambi yo land’e mfil’a nkubik’a Yave.

5, 6. (a) Ekuma Yave kasongela mona-meso ya nkubik’andi kun’ezulu? (b) Adieyi tulongokele muna mona-meso kiasongwa Yezekele?

⁵ Vena ye mambu mayingi mana Yave kasonekesa ko muna Diambu diandi. Kasikil’owu, Yave kayika mambu mayingi ko mu kuma kia tomfo twa muntu yovo mu kuma kia nsema. Kansi, watuvana kaka mana tuvwidi o mfunu muna bakula makani mandi yo zingila ngwizani ye makani mama. (2 Tim. 3:16, 17) Diakiese wau vo Nkand’a Nzambi ukutuzayisanga oma ma nkubik’a Yave kun’ezulu. Tuyangalalanga vava tutanganga oma masonama mu kuma kia nkubika yayi muna nkanda Yesaya, Yezekele, Daniele ye muna Lusengomono. (Yes. 6:1-4; Yez. 1:4-14, 22-24; Dan. 7:9-14; Lus. 4:1-11) Ekuma Yave keyambulwilanga vo twazaya maka mambu mebwanga kun’ezulu?

⁶ Yave ozolele vo twalembi vilakananga vo mu nkubik’andi ya nz’amvimba twina. E nkubik’a Yave kun’ezulu salu kiayingi isalanga muna lungisa luzolo lwa Yave. Kasikil’owu, Yezekele wasongwa mona-meso kia nkubik’a Yave isunzulwanga kw’ekalu diampwena di’ezulu. Ekalu diadi nzaki didiatanga ye dilenda soba e nzila vana vau. (Yez. 1:15-21) Muna lusadisu lwa tungungu twandi, ekalu diadi dilenda lwaka kwandá. Yezekele wamona mpe ndiona odiatisanga ekalu diadi. Wavova vo: “Mbwene mpw’ekwata nga tiya vana kati e kinzieta . . . una ukedi e mpw’a fwaniswa kia nkembo a Yave.” (Yez. 1:25-28) Ka lukatikisu ko vo Yezekele wasivika kikilu mu kuma kia mana kasongwa muna mona-meso kiaki. Wamona vo Yave yandi kibeni odiatisanga nkubik’andi. Osadilanga mwand’andi avelela muna fila nkubika yayi. Ekalu diadi di’ezulu diasongwa muna mona-meso, ditoma songanga una usadilanga e nkubik’a Yave kun’ezulu.

7. E mona-meso kiasongwa Daniele aweyi kisiamisinanga vuvu kieto?

⁷ Daniele mpe wasongwa mona-meso kisiamisanga vuvu kieto muna Nzambi. Wamona Yave, “wa munkulu-nkulu a lumbu,” wavwanda vana kunda kina ye nlaku mia tiya. E kunda kiaki kiakala ye tungungu. (Dan. 7:9) Yave wazola vo Daniele kabakula vo nkubik’andi isalanga ntangwa zawonso muna lungisa ekani diandi. I bosi, Daniele wamona ndiona wakala “nze mwan’a muntu,” Yesu wavewa wisa kia kala se mfidi a nkubik’a Yave ova ntoto. O Yesu keyala mu kolo kiandwelo ko. E “wisa kiandi i wisa kiakwele mvu, kina ke kivioka ko, e kintinu kiandi kina ke kibangalakeswa ko.” (Dan. 7:13, 14) E mona-meso kiaki kikutufilanga mu bund’e vuvu muna Yave yo yangalela mana kelungisanga. Yave wavana Yesu wa Mwan’andi “wisa yo nkembo ye kintinu” mu songa vo vuvu kekumbundanga. Muna kuma kiaki, yeto mpe tufwete bundang’e vuvu muna Yesu wa Mfidi eto.

8. Aweyi Yezekele yo Yesaya bamona vava basongwa mona-meso kia nkubik’a Yave? E mona-meso yayi adieyi ifwete kutufila mu vanga?

⁸ E mona-meso ya nkubik’a Yave kun’ezulu adieyi ifwete kutufila mu vanga? Nze Yezekele, tusivikanga yo kuyisakidika mu kuma kia mana kelungisanga o Yave. (Yez. 1:28) O badika oma ma nkubik’a Yave dilenda kutufila mu vanga nze dina Yesaya kavanga. Vava kavewa mboka ya zayisa akaka mana Yave kevanganga, Yesaya watambulwila vana vau. (Tanga Yesaya 6:5, 8.) Yesaya wakala ye vuvu vo muna lusadisu lwa Yave, olenda lungisa konso salu kaveno. Diau adimosi, e mona-meso ya nkubik’a Yave ifwete kutufila mu kuyivana muna salu kia Nzambi. Ekwe kiese kia zaya vo tu yîkwa ya nkubik’a Yave eyi isalanga yo vema kwawonso muna lungisa luzolo lwandi!

9, 10. Ekuma divavilanga vo vakala ye nkubik’a Yave ova ntoto?

⁹ Muna Mwan’andi, Yave wasikidisa nkubika ova ntoto kimana yasalanga kumosi ye nkubik’andi kun’ezulu. E nkubika yayi mfunu ina muna lungisa e salu kiasakulwa muna Matai 24:14. Ekuma? Tubadika kuma tatu.

¹⁰ Diantete, Yesu wavova vo alongoki andi besamuna nsangu zambote “yo kuna nsuk’a nza.” (Mav. 1:8) Diazole, divava vo awana besala e salu kiaki bavewanga madia ma mwanda yo lungwa-lungwa. (Yoa. 21:15-17) Diatatu, awana besala e salu kia samuna nsangu zambote bafwete kutakananga mu sambila Yave yo longwa una bafwete sadila salu kiaki. (Ayib. 10:24, 25) Muna lungisa mawonso mama, alandi a Kristu bafwete kala batoma kubama.

11. Aweyi tulenda songela vo tuyikamanga nkubik’a Yave?

¹¹ Aweyi tulenda songela vo tuyikamanga e nkubik’a Yave? Imosi muna mpila tulenda wo vangila i bundang’e vuvu kw’awana besolwanga kwa Yave yo Yesu mu vit’o ntu muna salu kia samuna nsangu zambote. Ampangi awaya bafwana sadila ntangwa ye ngolo zau muna mambu ma nza yayi. Kansi, ke bevanganga wo ko. E nkubik’a Yave ova ntoto nkia salu isianga va fulu kiantete?

12, 13. Aweyi akuluntu Akristu belungisilanga kiyekwa kiau? Ediadi ekuma dinina dia lukasakeso kwa ngeye?

¹² Akuluntu azikuka mu nza yawonso bevewanga kiyekwa kia kubika yo vit’o ntu muna salu kia samuna nsangu zambote muna nsi zina besadilanga. Aweyi bevangilanga wo? Vava mpangi zazi bebakang’e nzengo, bevavanga luludiku muna Diambu dia Nzambi, kimana diakala se mini kia tambi yau yo ntemo eyendelo diau, yo lomba lusadisu lwa Yave muna sambu.—Nku. 119:105; Mat. 7:7, 8.

¹³ Nze awana bavitang’o ntu muna tandu kiantete, akuluntu Akristu ana besikidisanga e salu kia samuna nsangu zambote o unu, bekuyivananga muna “uselo wa diambu.” (Mav. 6:4) Betoma yangalalanga vava bemonanga lunungunuku lwa salu kia samuna nsangu zambote muna nsi zau ye mu nz’amvimba. (Mav. 21:19, 20) E mpangi zazi ke besianga nsiku miayingi ko. Kansi, belandanga luludiku lwa Nkand’a Nzambi ye mfil’a mwand’avelela vava besikidisanga mana mavwilu o mfunu muna sayanesa nsangu zambote. (Tanga Mavangu 15:28.) Muna mpila yayi, e mpangi zazi besonganga mbandu ambote kw’awonso bena muna nkutakani za zunga kiau.—Ef. 4:11, 12.

14, 15. Nkia nkubika zivangwanga zikutusadisanga mu samuna nsangu zambote mu nza yawonso? (b) Aweyi obadikilanga elau dia yikama e salu kia samuna nsangu zambote za Kintinu?

¹⁴ Ayingi ke bemonanga ko e ngolo zivangwanga muna kubika madia ma mwanda mevaikiswanga muna nkanda mieto, melongwanga muna tukutakanu twakete ye twampwena. Ulolo wa mpangi bekuyivananga kuna mvevo mu sekola madia mama ma mwanda mu tezo kia 600 za ndinga kimana wantu balongoka “mavangu manene ma Nzambi” muna ndinga zau za kingutukila. (Mav. 2:7-11) Mpangi za matoko ye ndumba besadilanga muna masini mampwena ma nietekena nkanda. I bosi, e nkanda miami mikayaneswanga muna nkutakani, kana nkutu y’ezi zina mu zunga yandá.

¹⁵ Vena mpe ye salu yayingi isalwanga mu kutusadisa twasianga salu kia samuna nsangu zambote va fulu kiantete muna nkutakani zeto. Kasikil’owu, mazunda ye mazunda ma mpangi bekuyivananga kuna mvevo mu tunga Maseka ma Kintinu ye Maseka ma Tukutakanu twampwena, mu sadisa awana bebwilanga sumbula yovo awana benwananga ye yimbevo ivavanga vo bavutulwa menga. Akaka bekubikanga tukutakanu twakete ye twampwena yo longa muna sikola za kimfumu. Adieyi i kani dia salu yayi yawonso? Muna kutusadisa twasamuna nsangu zambote, nungunuka muna ludi yo sadisa wantu ayingi kimana bakituka selo ya Yave. Kieleka, e nkubik’a Yave ova ntoto isianga oma masundidi o mfunu vana fulu kiantete.

16. Nkia diambu diamfunu tulenda vavulula muna nsambila ya esi nzo yovo mun’elongi dia yeto kibeni?

¹⁶ Nga ovaulanga e ntangwa ya badika e salu kisalanga nkubik’a Yave? Akaka bevavululanga mambu mama muna nsambila ya esi nzo yovo mun’elongi dia yau kibeni yo badika mana belongokanga. E mona-meso yasongwa Yesaya, Yezekele, Daniele yo Yoane ivwidi mambu mambote tulenda longoka. O nkanda Testemunhas de Jeová—Proclamadores do Reino de Deus ye nkanda miakaka yovo DVD zina muna ndinga tutoma bakulanga, zilenda kutulonga mambu mayingi mu kuma kia nkubik’a Nzambi.

17, 18. (a) Aweyi elongi diadi disadisidi? (b) Nkia yuvu tufwete kiyuvula?

¹⁷ Diambote twabadikanga mana Yave kelungisanga muna nkubik’andi. Kumosi ye nkubik’andi, yambula yeto mpe twasianga oma masundidi o mfunu vana fulu kiantete. O vanga wo dikutusadisa mu kala y’etima kakala diau Paulu ona wasoneka vo: “Wau tuna yo uselo wau, una tufwilu nkenda, ke tufuwa ntima ko.” (2 Kor. 4:1) Wakasakesa mpe mpangi zandi vo: ‘Ke tuyambudi vanga wete ko: kadi muna yandi nsungi tusâla, ovo tu lembi yoya.’—Ngal. 6:9.

¹⁸ Nga vena ye mambu nulenda soba ngeye ye esi nzo aku kimana nwasia oma masundidi o mfunu vana fulu kiantete muna zingu kieno kia lumbu ke lumbu? Nga olenda vevola zingu kiaku kimana wasia sungididi muna salu kisundidi o mfunu? Mun’elongi dilanda, tubadika mambu tanu malenda kutusadisa mu land’e mbandu a nkubik’a Yave.