1, 2. E mona-meso ya nkubik’a Yave adieyi ikutufilanga mu vanga?

DIAKIESE mu zaya vo mu nkubik’a Yave twina. E mona-meso yasonama muna Daniele kapu kia 1 ye muna Daniele kapu kia 7 itoma songanga una Yave kediatisilanga mambu muna lungisa ekani diandi. Yesu ofilanga e nkubik’a Yave ova ntoto kimana yasia sungididi muna salu kia samuna nsangu zambote, kasakesa awana besalanga salu kiaki yo sadisa akaka kimana bakituka asambidi a Yave. Ediadi dikutufilanga mu bund’e vuvu muna nkubik’a Yave.—Mat. 24:45.

² Nga tulandang’e mbandu a nkubika yayi? Nga e kiese kieto muna ludi mu wokela kina yovo mu kuluka kina? Avo tufimpidi yuvu yayi, tulenda bakula kana vo twayantikidi yoya yovo kulula vema kweto muna salu kia Nzambi. Ediadi dilenda vangama. Muna tandu kiantete, Paulu wa ntumwa wakasakesa mpangi zandi z’Akristu mu badika e mbandu a vema kwa Yesu. Paulu wavova vo luludiku lwalu lwadi kubasadisa mu ‘lembi yoya yo lebokw’e mioyo.’ (Ayib. 12:3) Mun’elongi diaviokele, twabadikidi e salu kisalanga nkubik’a Yave o unu. Nze una e mbandu a Kristu yakasakesela Akristu a tandu kiatete, e mbandu a nkubik’a Yave ilenda kutusadisa mu zindalala yo song’o vema muna salu kia Nzambi.

3. Adieyi tufwete vanga muna lembi yoya? Adieyi tubadika mun’elongi diadi?

³ Kansi, Paulu wasonga vo vena ye diambu diakaka tufwete vanga muna lembi yoya. Wavova vo tufwete kwamanana ‘vanga wete.’ (Ngal. 6:9) Yambula twabadika mambu tanu malenda kutusadisa mu land’e mbandu a nkubik’a Yave yo lembi kulula vema kweto. I bosi, konso muntu kumosi y’esi nzo andi balenda zaya kana nkia mambu bafwete toma sia sungididi.

4. Ekuma tulenda vovela vo tukutakanu mfunu twina muna nsambil’aludi?

⁴ O kutakana diambu diamfunu kikilu kwa selo ya Yave. Kun’ezulu, ambasi bekutakananga vana ndose a Yave muna ntangwa yasikidiswa. (1 Nti. 22:19; Yobi 1:6; 2:1; Dan. 7:10) Kuna Isaele yankulu, nkangu wakanikinwa vo bakutakananga kimana “bawa yo longwa.” (Nsi. 31:10-12) Muna tandu kiantete, Ayuda bayendanga muna masambilu mu tanga Nkand’a Nzambi. (Luka 4:16; Mav. 15:21) Tukutakanu mfunu mpe twakala vava kiasikidiswa nkutakani y’Akristu ye twakinu o mfunu muna nsambil’eto. Akristu akieleka bekutakananga mu ‘badikaziana yo kindaziana muna zola yo mavangu mambote.’ Tufwete kwamanana ‘kasakesa muntu yo nkw’andi yo siamisa wo vanga, wau tumwene vo e lumbu [kia Yave] kifinamene.’—Ayib. 10:24, 25.

5. Aweyi tulenda kasakesela muntu yo nkw’andi muna tukutakanu?

⁵ E mpila yambote tulenda kasakesela muntu yo nkw’andi i vananga mvutu muna tukutakanu tweto. Tulenda vana mvutu za kiuvu kiyuvwilu, sasila sono kia Nkand’a Nzambi yovo yika nona kisonganga una nkanikinu mia Nkand’a Nzambi mikutusadisilanga. (Nku. 22:22; 40:9) Kana nkutu vo se mvu miayingi twina muna ludi, dialukasakeso kikilu dikalanga mu wá e mvutu bevananga ampangi zeto muna tukutakanu, kiakala ambuta yovo aleke.

6. Aweyi tukutakanu tweto tukutusadisilanga mu sikila muna mwanda?

⁶ Nkia kuma yakaka Nzambi eto kasikidisila vo twakutakananga? O tukutakanu tweto twakete ye twampwena tukutusadisanga mu kala yo unkabu wa sila umbangi kwa wantu bekutusianga kitantu muna zunga kieto yovo kw’awana ke bezolanga kutuwá ko. (Mav. 4:23, 31) Lukwikilu lweto lukumamanga vava tuwanga malongi metukanga muna Nkand’a Nzambi. (Mav. 15:32; Roma 1:11, 12) Lukasakeso tuvwanga muna tukutakanu kiese kiayingi lukututwasilanga yo kutuvuvika ngindu. (Nku. 94:12, 13) Buka kia Alongi (Comissão de Ensino) muna Buka kia Selo Yambuta kikubikanga malongi mevewanga muna tukutakanu twa nkangu a Yave mu nza yawonso. Tuvutulanga matondo muna malongi mamfunu tuwanga konso lumingu muna tukutakanu tweto.

7, 8. (a) Adieyi i kani diantete dia tukutakanu tweto? (b) Aweyi tukutakanu tukusadisilanga?

⁷ Vana ntandu a nluta tuvwanga, vena ye kuma kiakaka kiamfunu ­tukwendelanga muna tukutakanu. Ekani diantete dia tukutakanu tweto i sambila Yave. (Tanga Nkunga 95:6.) Ekwe elau diampwena tuna diau dia kembelela yo yimbidila Nzambi eto! (Kol. 3:16) E mpila yakaka tukembelelanga Yave i vava tuvanang’e mvutu muna tukutakanu. Yave wafwana kikilu tambula nkembo wau. (Lus. 4:11) Ekiaki i kuma tukasakeselwanga vo twakalanga muna tukutakanu tweto ntangwa zawonso.—Ayib. 10:25.

⁸ Nga tubadikilanga tukutakanu tweto nze lukau katuvana o Yave mu kutusadisa mu zindalala yavana kefwasa e nza yayi yambi? Avo i wau, o kwenda muna tukutakanu dikala dimosi muna ‘mambu masundidi o mfunu’ muna zingu kieto, kana nkutu vo salu yayingi tukalanga yau. (Fili. 1:10) Ke tufwete vidisanga elau dia kutakana ye mpangi zeto ko mu sambila Yave, nanga vo diambu diampwena kikilu ditusimbidi.

9. Aweyi tuzayidi wo vo salu kia samuna nsangu zambote kiamfunu kikilu?

⁹ O kuyivana muna salu kia samuna nsangu zambote dikutusadisanga mu landa e mfil’a nkubik’a Yave. Yesu wayantika salu kiaki vava kakala ova ntoto. (Mat. 28:19, 20) Tuka muna ntangwa yayina, e salu kia samuna nsangu zambote yo kitula wantu s’alongi i salu kisundidi o mfunu kisalanga nkubika yawonso ya Yave. Vena ye nona yayingi isonganga vo ambasi beyikamanga salu kiaki yo kutusadisa mu solola awana ‘basidi moyo a mvu ya mvu etima.’ (Mav. 13:48; Lus. 14:6, 7) E nkubik’a Yave ova ntoto yasikidiswa mu yikama salu kia samuna nsangu zambote. Nga osianga e salu kiaki vana fulu kiantete muna zingu kiaku?

10. (a) Adieyi mpangi mosi kevanganga muna wokesa luyangalalu lwandi muna ludi? (b) Aweyi e salu kia umbangi kikusadisilanga mu lembi yoya?

¹⁰ O sala salu kia umbangi y’etima diawonso dikutusadisanga mu wokesa luyangalalu lweto muna ludi. Badika nona kia mpangi Mitchel, una vo nkuluntu ye mviti a nzila se mvu miayingi. Wavova vo: “Izolanga longa e ludi kwa wantu. Iyangalelanga tanga Eyingidilu ye Despertai! yampa yo sivika mu kuma kia ngangu yo umbakuzi una muna malongi mama ye mpila yambote mesonekenwanga. Ikalanga ye kiese kia vaika muna salu kia umbangi mu mona una wantu bebadikila malongi mama ye una ­ndenda sikamesena luzolo lwau. E salu kia umbangi kikunsadisanga kikilu. Kiyambulanga ko vo konso diambu diavunzanesa e ntangwa ina yavaula mu sala salu kia umbangi.” Oyeto mpe tulenda zizidila lumbu yayi yambaninu kele vo tuyivene muna salu kia Nzambi.—Tanga 1 Korinto 15:58.

11. Ekuma tufwete tangilanga nkanda mieto yo badika mana tutanganga?

¹¹ Yave okutuvananga nkanda miayingi mu kutukumika. Nanga olenda sungamena lumbu kimosi watanganga nkanda mieto yo vova vo: ‘Lwalu i lusadisu kikilu mvwidi o mfunu! Yave nanga mu kuma kiame kakubikidi nkanda wau!’ Vena ye kuma kiasikila mu vova wo. Yave osadilanga nkanda miami mu kutulonga yo kutufila. Wavova vo: “Ikulonga yo kusonga nzil’okwenda.” (Nku. 32:8) Nga tusianga ngolo za tanga nkanda miawonso tutambulanga yo badika mana tutanganga? O vanga wo dikutusadisa mu kwamanana zindalala yo song’o vema muna salu kia Nzambi mu lumbu yayi yambaninu.—Tanga Nkunga 1:1-3; 35:28; 119:97.

12. Adieyi dilenda kutusadisa mu yangalelanga nkanda mieto?

¹² Diambote twabadikanga e ngolo zivangwanga muna vaikisa nkanda miami. E Buka kia Alongi muna Buka kia Selo Yambuta bevitang’o ntu muna vavulula, soneka, fimpulula, sola fwaniswa yo sekola malongi mevaikiswanga muna nkanda mieto yo muna nzil’eto ya Internete. E mavula mana menietekanga e nkanda mieto befilanga mio muna ulolo wa nkutakani. Adieyi i kani dia salu kiaki kiawonso? Kimana nkangu a Yave batambulanga malongi yo luludilu bavwidi o mfunu muna sikila ye kwikizi. (Yes. 65:13) Yambula yeto awonso twakalanga ye fu kia tanga nkanda tutambulanga muna nkubik’a Yave.

13, 14. Aki nani beyikamanga e nkubik’a Yave kun’ezulu? Aweyi tulenda yikamena nkubik’andi ova ntoto?

¹³ Muna mona-meso kasongwa, Yoane wamona Yesu ofongele vana mvalu ampembe mu fwasa awonso ana bekolamenanga Yave. (Lus. 19:11-15) Dialukasakeso mu zaya vo mbasi zakwikizi ye akuswa ana batambula kala nsendo au kun’ezulu beyikamanga Yesu. (Lus. 2:26, 27) E mbandu au itulongele vo yeto mpe tufwete yikamanga awana bevitang’o ntu muna nkubik’a Yave.

¹⁴ Diau adimosi, e ndong’ayingi beyikamanga e salu kisalanga mpangi zakuswa za Kristu ana bakinu ova ntoto, ana bevitang’o ntu muna nkubik’a Yave o unu. (Tanga Zakariya 8:23.) Aweyi tulenda songela vo tuyikamanga nkubik’a Yave? Imosi muna mpila tulenda wo songela i sakalelanga awana bevitang’o ntu. (Ayib. 13:7, 17) Tufwete yantikila muna nkutakani zeto. Nga mana tuvovanga mu kuma ki’akuluntu mefilanga akaka mu kubazitisa yo yangalela salu besalanga? Nga tulonganga wan’eto bazitisanga mpangi zazi zakwikizi yo lemvokela luludiku lwau lwa Nkand’a Nzambi? Vana ntandu, nga tumokenanga y’esi nzo una tulenda sadila mavwa meto muna yikama salu kia samuna nsangu zambote mu nza yawonso? (Nga. 3:9; 1 Kor. 16:2; 2 Kor. 8:12) Nga tubadikilanga dio s’elau diampwena dia velelesanga Eseka dia Kintinu? Yave okutuvananga mwand’andi avelela vava tuyikamanga nkubik’andi muna mambu mama. O mwanda wau ukutuvananga nkuma tuvwidi o mfunu muna lembi yoya mu lumbu yayi yambaninu.—Yes. 40:29-31.

15. Ekuma tufwete kwamanena sila ngolo za zingila e ngwizani yo luzolo lwa Nzambi?

¹⁵ Muna zindalala yo landa mfil’a nkubik’a Yave, tufwete zingilanga e ngwizani ye nsangu tusamunanga muna vanganga ‘oma metondakananga kwa Mfumu.’ (Ef. 5:10, 11) Muna kuma kia usumuki weto ye umpukumuni wa Satana ye nz’andi, diampasi dikalanga mu vanga edi diambote. E mpangi zeto z’akala ye z’akento, tuzeye wo vo akaka muna yeno mambu mayingi mampasi nunwananga mau muna simbinina e ngwizani eno yo Yave. Nukala ye ziku vo Yave zola ketoma kunuzolanga. Ke nuyoyi ko! O zingila e ngwizani yo luzolo lwa Yave kiese kiayingi dikututwasilanga yo songa vo e nsambil’eto ke yampavala ko.—1 Kor. 9:24-27.

16, 17. (a) Adieyi tufwete vanga avo tuvolele esumu diampwena? (b) Adieyi tulenda longoka muna mbandu a Anne?

¹⁶ Kansi, adieyi tufwete vanga avo tuvolele esumu diampwena? Vava lusadisu vana vau. O sweka esumu mambu kaka diwokesanga. Sungamena una Davidi kamona vava kasweka esumu diandi. Wavova vo: “E visi yame ifwidi, muna kungu kiame lumbu ke lumbu.” (Nku. 32:3) Elo, avo tuswekele esumu diampwena tuvangidi, tulenda vidisa kiese kieto yo fwasa ngwizani eto yo Yave. Kansi, “on’otambulwila yo yambula mo, ofwilwa nkenda.”—Nga. 28:13.

¹⁷ Badika nona kia Anne. * Vava kakala ndumba, wasalanga se mviti a nzila a ngonde ke ngonde. Kansi, wayantika landa nzila zambi. Ediadi diantwasila mfwilu miayingi. Wavova vo: “E ntona zame zambangikanga kikilu. E kiese kiame kiavila, yabakama kwa lukendalalu.” Adieyi kavanga? Lumbu kimosi vava kakala mu lukutakanu, mpovi wasasila sono kia Yakobo 5:14, 15. Anne wabakula vo lusadisu kavwanga o mfunu. Wayenda mokena y’akuluntu. Owau osungamenanga vo: “E sono kiaki kiakala nze nlongo mina Yave kasoneka muna wuka kimbevo kiame kia mwanda. E nlongo miami miampasi mikalanga muna mio nua. Kansi, wuka kikilu miwukanga. Yalemvokela luludilu lwa sono kiaki. Lwansadisa kikilu.” Owau Anne wavutukila kiese kiandi kia sadila Yave y’etima diawonso kumosi ye ntona zambote.

18. Nki’ekani tufwete kala diau?

¹⁸ Ekw’elau diampwena tuna diau dia kala muna nkubik’a Yave mu lumbu yayi yambaninu! Ke tuvidisa ko elau diadi. Yambula twasianga ngolo za kala muna tukutakanu twawonso kumosi y’esi nzo zeto, twavavanga akwa luzolo lwambote muna zunga kieto yo kala ye fu kia tanga nkanda miawonso tutambulanga. Yambula mpe twayikamanga awana bevitang’o ntu yo zingila e ngwizani ye nsangu tusamunanga. Avo tuvangidi wo, tusonga vo tulandanga e mfil’a nkubik’a Yave ye ke tuyoya ko vanga o wete.