Nga Ovutulanga Matondo Muna Nsambu Otambulanga?

VAVA bavuluzwa mu mpil’esivi muna ubundu kuna Engipito, Aneyisaele bayangalala mu kuma kia luvevoko bakala lwau mu sambila Yave. (Luv. 14:29–15:1, 20, 21) Kansi, ke kolo ko e ngindu zau zasoba. Bayantika yidima mu kuma kia mpila zingu bakala kiau. Ekuma? E kuma kadi bayantika sia e sungididi kiasaka muna mpasi bakala zau muna makanga ke mu mana Yave kavanga mu kuma kiau ko. Bavovesa Mose vo: “Mu nkia kuma nwatuvaikisila muna Engipito twafwila mwamu makanga? e kuma kadi ke muna madia ko yovo maza; e mioyo mieto mikankumuka dia kwaku [mana] kwayiva.”—Nta. 21:5.

Vioka mvu miayingi, Davidi wa Ntinu a Isaele wayimbila vo: “Muna walakazi waku mbundidi e vuvu; o ntim’ame umwena luvuluzu luaku e kiese: Nyimbidila Yave, kadi umpangìdi o mawete.” (Nku. 13:5, 6) Davidi kavilakana ko mambu mambote kavanga Yave mu kuma kiandi. Wavaulang’e ntangwa mu badika mambu mama. (Nku. 103:2) Yave ovanganga mpe oma mambote kwa yeto. Dia uzowa kele vo tuvezele mana kevanganga muna wete dieto. Yambula twabadika ezaka nsambu za Nzambi tutambulanga o unu.

‘Kikundi yo Yave’

Ntozi a nkunga wayimbila vo: ‘Kikundi yo Yave kina kw’awana bekumvumina.’ (Nku. 25:14) Ekw’elau bena diau wantu alembi lunga dia kala ye ngwizani ambote yo Yave! Kansi, adieyi tuvova kele vo tuyantikidi tokana kwayingi mu kuma kia mambu ma zingu kieto kia lumbu ke lumbu yo lembi vaula ntangwa mu samba? Yindula dina dilenda bwila ngwizani eto yo Yave. Nze Nkundi eto, Yave  ovavanga vo twambund’e vuvu yo ziula ntima mieto kwa yandi muna sambu yo kunzayisa nsatu zeto ye mana mekututokanesanga. (Nga. 3:5, 6; Fili. 4:6, 7) Nga ediadi ke difwete kutufila ko mu toma fimpa e sambu yeto?

Vava nleke mosi wa Mbangi a Yave, una ye nkumbu a Paul kayindula sambu yandi, wabakula vo kafwete tomesa e sambu yandi. * Wavova vo: “Yakala ye fu kia vutukila e mvovo miau mimosi vava yasambanga kwa Yave.” Vava Paul kavavulula muna Índice das Publicações da Torre de Vigia, wabakula vo muna Nkand’a Nzambi muna ye tezo kia 180 lwa sambu. Muna sambu yayi, selo ya Yave kuna nz’ankulu basonga dina bayindulanga muna ntima. Paul wavova vo: “Muna badika e nona yayi ya Nkand’a Nzambi, yayantika vova mambu masikididi muna sambu yame. Ediadi diansadisa mu ziula ntim’ame kwa Yave. Owau ikalanga ye kiese kia kumfinama muna sambu.”

“Madia Muna Ntangw’andi”

E nsambu zakaka tutambulanga kwa Yave i mana tulongokanga muna Nkand’a Nzambi. Wau vo tudianga ulolo wa madia ma mwanda, tuvwidi kuma mu ‘yimbila muna wete wa ntima.’ (Yes. 65:13, 14) Kansi, tufwete venga mambu malenda kutufila mu vidisa kiese kieto muna ludi. Muna bong’e nona, o sia e sungididi muna nsangu bemwanganga avengomoki dilenda yivisa ngindu zeto yo kutuvonda meso mu lembi bakula o mfunu a ‘madia ma mwanda muna ntangw’andi’ kekutuvananga Yave muna “ntaudi akwikizi yo lulungalalu.”—Mat. 24:45-47.

André, ona wasadila Yave mu mvu miayingi, wavukumunwa kwa ngindu z’avengomoki. Edi kabanza vo o tanga kwankatu e ngindu z’avengomoki muna Internete ke dina kwandi dia vonza ko. Wasungamena vo: “Kuna lubantiku, yayantika tuntwa kwa mambu mana avengomoki beyikanga vo ma ludi. Ekolo yafimpanga mana bavovanga, yayantika mona vo kuma yakala yau mu yambula nkubik’a Yave. Kansi, vava yavavulula mu kuma kia mambu mana avengomoki befidisilanga Mbangi za Yave mpaka, yabakula vo malongi mau maluvunu. Bavavanga kutuvunisa mu mambu mena vo ke maludi ko. Muna kuma kiaki, yabaka nzengo za vutukila tanga nkanda mieto yo lungana muna tukutakanu. Vana vau, yabakula mayingi yavidisanga.” Diakiese vo André wavutuka muna nkutakani.

‘Wana-Ngudi Awonso’

Kintwadi kia mpangi zeto zazolwa i nsambu za Yave. (Nku. 133:1) Ekiaki i kuma Petelo wa ntumwa kasonekena vo: ‘Nuzola wana-ngudi awonso.’ (1 Pet. 2:17) Muna kala muna ungudi wa Kikristu, tuvwang’e nluta mia zolwa yo sadiswa kw’awana bena  nze mase, ngudi, mpangi z’akala ye z’akento muna ludi.—Maku 10:29, 30.

Kana una vo i wau, mambu mayingi malenda vunzanesa ngwizani eto ye mpangi zeto z’akala ye z’akento. Kasikil’owu, ke diampasi ko mu funga makasi mu kuma kia usumuki wa muntu akaka yo yima fu kia kunkumba. Kele vo diadi divangamene, nga ke dia lusadisu ko mu sungamena vo Yave ozolanga selo yandi kana una vo asumuki? Vana ntandu, “ovo tuvova vo, ke tuna y’esumu ko, ozevo tungianisa tukutungianisa, e ludi mpe ke kina mu yeto ko.” (1 Yoa. 1:8) Nga ka tufwete sia ngolo ko za “vezananga mambu yo yambuziana”?—Kol. 3:13.

Mwan’andumba mosi una ye nkumbu Ann wabakula o mfunu wa lungana y’Akristu muna mana mambwila. Muna vanga nze dina diavanga mwan’ankolami a kingana kia Yesu, wabembola nkutakani y’Akristu. I bosi, wasoba e ngindu zandi yo vutuka muna ludi. (Luka 15:11-24) Adieyi kalongoka Ann muna mana mambwila? Wavova vo: “Wau vo mvutukidi mu nkubik’a Yave, mpangi zawonso z’akala ye z’akento ikubavwang’o mfunu kana una vo asumuki. Entete, fu kia kumba ampangi yakala kiau. Kansi, owau isiang’e ngolo za lembi yambula konso diambu diakakila e nsambu za kala vamosi ye mpangi zame zakwikizi. Ke vena lekwa ko mu nza yayi kilenda kutufila mu bembola e paradiso eto ya mwanda.”

Vutulanga Matondo Muna Nsambu Otambulanga

E vuvu kieto muna Kintinu kia Nzambi vo kiau kifokola e mpasi za wantu i lusalu lwantalu. Ekwe kiese twakala kiau vava twazaya e vuvu kiaki! Twamona nze una wamona nkiti a kingana kia Yesu ona “wateka yawonso kakedi yau,” mu sumba ‘perle imosi ya ntalu ayingi.’ (Mat. 13:45, 46) Yesu kayika ko vo vakala ye ntangwa ina o nkiti kayangalelanga diaka perle ko. Diau adimosi mpe, ke tuyambula yangalela vuvu kieto ko.—1 Tes. 5:8; Ayib. 6:19.

Badika e nona kia Jean, ona osadilanga Yave se vioka mvu 60. Wavova vo: “O mokena y’akaka mu kuma kia Kintinu kia Nzambi dikunsadisanga mu sungamena kio. Vava imonanga e kiese bekalanga kiau awana bebakulanga e nsas’a Kintinu, ediadi dikunkasakesanga. O mona una e ludi mu kuma kia Kintinu kisobelanga e zingu ki’alongoki a Nkand’a Nzambi, dikumfilanga mu yindula vo: ‘Ekwe mambu mamfunu izayisanga kw’akaka!’”

Tuvwidi kuma yayingi mu vutula matondo mu kuma kia ulolo wa nsambu za mwanda tutambulanga. Kana una vo tunwananga ye mpasi nze lubangamu, mayela, kinunu, ntantu zasaka, lufwa ye mpasi za kondwa nzimbu, tuzeye wo vo za kolo kiakete. Muna Kintinu kia Nzambi, vana ntandu a nsambu za mwanda, tuvwa mpe nsambu za kinsuni. Konso mpasi tuzizidilanga o unu zifokoka muna nz’ampa.—Lus. 21:4.

Muna kuma kiaki, yambula twavutulanga matondo mu kuma kia nsambu za mwanda yo songa luyangalalu nze ntozi a nkunga ona wayimbila vo: “Owokesa mo, ongeye Yave wa Nzambi ame, o masivi maku ye ngindu zaku oku twina, o tetomona zo oko wina, ke kulendakana ko; ovo nzingwidi yo samuna zo, zingi, ke zitangumukakana ko.”—Nku. 40:5.

[Mvovo Vana Yand’a lukaya]

[Foto ina muna lukaya lwa 18]

Nkia nsambu za mwanda oyangalelanga?