Nsilu wa Monana Diaka

I NGUDI a wana, kuna Espanha nkalanga. Nsilu wamfunu yasia. Yambula yanuzayisa ekuma yasila nsilu wau.

Ke twakala yo luvuvamu ko muna nzo a mase mame. E ntantu zakota muna nzo eto vava mbunzi ame a yakala wa mvu nyá kafwa mu sumbula kia kalu. Vana ntandu, ngudi ame kakala diaka ye kiese ko muna longo mu kuma kia fu yambi ya s’ame. Kansi, e mpasi zazi ke zansimba ko mu kutulonga e fu yambote.

Ntangwa vava yafwana, mono yo mpangi ame twasompa. Ke vavioka kolo ko, ngudi eto wabakama kimbevo kia câncer, kina kiamvonda. Kansi, una kafwidi ko, watusisila kimvwama kia mwanda.

Nkundi andi mosi ankento wanzayisa e vuvu kia Nkand’a Nzambi kia lufuluku. Ngudi eto watambulwila longoka Nkand’a Nzambi. Muna lumbu yansuka ya zingu kiandi, e vuvu kia Nkand’a Nzambi kiavana e nsasa muna zingu kiandi yo kunsadisa mu vutukila kala ye kiese.

Vava twamona e nluta mia longoka Nkand’a Nzambi muna ngudi eto, omono yo mpangi ame twayantika mpe longoka Diambu dia Nzambi. Ke kolo ko yavubwa nze Mbangi a Yave. Vioka ngonde mosi, mwan’eto anzole owutukidi, dumbelele kiamote, ona twavan’e nkumbu a Lucía.

E lumbu kia luvubu lwame, kiamfunu kikilu kwa mono. E diantete, kadi yakituka se selo kia Yave, yakiyekola kwa yandi mu kunsadila yakwele mvu. E kuma kiezole, i kiese kia zayisa lukwikilu lwame kwa wan’ame.

Kansi, e kiese yakala kiau ke kiazingila ko. Vava Lucía kakala ye kimbuta kia mvu nyá, wayantika lunzwa e vumu. Vava kafimpwa, dotolo watuzayisa vo lekwa kakala kiau muna vumu, kiakala o vonga nze dilala. Dotolo wavova vo Lucía kimbevo kia câncer kena kiau. Lucía mpasi zayingi kamona mu kimbevo kiaki, mvu nsambwadi, yo kala kolo kiandá muna lupitalu.

Wayivananga Kuna Mvevo

Muna mvu miansuka mia zingu kiandi, Lucía wankumikanga muna kumbimba yo kumfiba. E mpila kakadila ye kimbevo kiandi yasivikisa asadi a lupitalu. Wasadisanga awuki mu kaya má yanzenzo kwa yingyana-ngyana yakaka yambevo. Awuki bamvana nkutu e mvwatu a salu ye lapela mu songa vo “mwuki ansadisi.”

Nsadi mosi muna lupitalu wavova vo: “Lucía wansivikisa kikilu. Nsadi kakala, mwan’a nzunzu yo zola bandula fwaniswa. Wazolanga mokena, ngindu za kimbuta kakala zau.”

Diambu dia Nzambi diavana Lucía o nkuma ye luvuvamu lwa ntima. (Ayib. 4:​12) Wakala ye vuvu muna nsilu a Nkand’a Nzambi vo muna nz’ampa, “o lufwa, ke lukala diaka ko; musungula kala diaka dilu, yovo kazu, ngatu mpasi.” (Lus. 21:⁠4) Wau vo wavwanga akaka o mfunu, wasadilanga konso elau mu zayisa e ludi kia Nkand’a Nzambi kw’akaka. E vuvu kiasikila kakala kiau Lucía, kiansadisa mu zizidila e kimbevo kilembi sasuka ye kiese kiawonso. (Yes. 25:⁠8) Wazindalala songa kiese kiandi yamuna lumbu kafwa.

Ekiaki i lumbu yasia nsilu wau wamfunu. Lucía kalendanga diaka ziula meso ko.  O s’andi wasimba koko kwandi kwalunene ekolo mono yansimba koko kwalumonso. Yamvovesa vo: “Kutokani ko e mwan’ame, kikuyambula ko. Leka fiakete. Vava osikama, wasasuka o kala. Kumona diaka mpasi ko, nsinga kala diaka yaku.”

Owau mfwete simbinina nsilu wau. Nzeye wo vo o vingila e lumbu kia lufuluku, ke diambu diakete ko. Kansi, nzeye wo mpe vo avo izindalala bund’e vuvu muna Yave yo sikila muna lukwikilu, tusinga monana diaka muna lufuluku.

Evwa Katusisila Lucía

O unkabu wa Lucía yo lusadisu lwa mpangi muna nkutakani, lwasivikisa nkaz’ame, ona wakala vo ke Mbangi a Yave ko. Muna lumbu kia fwa Lucía, wampovesa vo kafwete soba e zingu kiandi. Ke vavioka tumingu twayingi ko, walomba kwa nkuluntu muna nkutakani mu yantika longoka Nkand’a Nzambi. Ke kolo ko, o nkaz’ame wayantika kwenda muna tukutakanu. Muna lusadisu lwa Yave, wayambula nua fomo, e fu kina kalendanga yambula ko entete.

E ntantu za lufwa lwa Lucía ke zamanisa ko. Kansi, mvutulanga matondo kwa Yave mu kuma ki’evwa katusisila o Lucía. Mono yo nkaz’ame tukuyifiaulwisanga muna vuvu kia lufuluku yo yindula e lumbu tusinga monana diaka yo Lucía ye mona kiese muna meso mandi.

Dina diabwila mwan’ame diasivikisa mpe akaka. Lumbu kimosi, nkento mosi wakala yo mwana watangilanga ku sikola imosi ye Lucía, wayiza kuna nzo eto. Mwana wakaka kafwilwa wa mvu 11 mu kimbevo kia câncer. Vava kawá dina diabwila Lucía, o nkento ndioyo wavava e nzo eto yo kwiza kutukingula. Wazola zaya dina diansadisa mu zizidila lufwa lwa Lucía yo kundomba vo twavanga buka mu fiaulwisa e ngudi zifwilwanga wana mu kimbevo kiaki.

Yanzayisa vo nsilu mia Nkand’a Nzambi mikumfiaulwisanga, kadi misundidi nsilu miawonso mina besianga o wantu. Meso mandi mazala ye mansanga ekolo yantangila e mvovo mia Yesu mina muna Yoane 5:​28, 29. Wayantika longoka Nkand’a Nzambi, ke kolo ko wayantika mona “luvuvamu lua Nzambi, luna luviokele nyindu wawonso.” (Fili. 4:⁠7) Nkumbu miayingi vava tulongokanga, tuyindulanga vava tukala muna nz’ampa, yo tambula azolwa ana besinga fuluka.

Elo, o Lucía evwa dia mvu ya mvu katusisila muna mvu miakete mia zingu kiandi. Lukwikilu lwandi lwayikanesa nzo eto mu sadila Nzambi yo wokesa etima diame dia sikila ye kwikizi. Ka lukatikisu ko, yeto awonso twafwilwa azolw’eto ana befwanukina lufuluku, nsilu amfunu tuna wau.

[Foto ina muna lukaya lwa 20]

Paradiso ina Lucía kasianga e vuvu