Bafwana mu Filwa Kuna nto za Maza ma Moyo
Bafwana mu Filwa Kuna nto za Maza ma Moyo
“O Mwan’ememe . . . okubavungula, yo kubafila kuna nto za maza ma moyo.” —LUS. 7:17.
1. Diambu dia Nzambi aweyi diyikilanga Akristu akuswa ye nkia kiyekwa kabavana o Yesu?
DIAMBU DIA NZAMBI diyikilanga Akristu akuswa ana belunga-lunganga e salanganu ya Kristu ova ntoto vo “ntaudi akwikizi yo lulungalalu.” Vava Kristu kakingula e “ntaudi” yayi muna mvu a 1918, wawana Akristu mu lungisa bena e kiyekwa kiau kia vana “madia” ma mwanda muna “ntangw’andi.” Muna kuma kiaki, Yesu una vo i Mfumu, wabavan’e kiyekwa kia “salanganu yandi yawonso.” (Tanga Matai 24:45-47.) Muna mpila yayi, una ke batambwidi ko evwa diau kun’ezulu, Akristu akuswa besadilanga asambidi a Yave ova ntoto.
2. Yika e salanganu ya Yesu.
2 O mfumu okalanga ye wisa muna salanganu yandi yovo mavwa mandi yo sadila mo konso una kazolele. E salanganu ya Yesu Kristu wa Ntinu wayadikwa kwa Yave, i mawonso ma Kintinu ova ntoto. Kimosi muna salanganu yayi i “ndong’ayingi” ina kamona o Yoane wa ntumwa muna mona-meso. Tala una Yoane kasoneka mu kuma kia ndong’ayingi: “Mbwene ndong’ayingi, ina ilembi tangakana kwa muntu, yatuka muna zula yawonso, yo makanda, ye nsi, ye ndinga, itelamene vana ndose a kunda, yo vana ndose a Mwan’ememe, ivwete mvwatu miampembe, ye ndala muna moko mau.”—Lus. 7:9.
3, 4. Nkia nsambu bavwidi e ndong’ayingi?
3 E yikwa ya ndong’ayingi bena mun’awana kayikila o Yesu vo “mameme makaka.” (Yoa. 10:16) E vuvu kiau kia zinga yakwele mvu muna paradiso ova ntoto. Bena ye vuvu vo Yesu ‘okubafila kuna nto za maza ma moyo. O Nzambi okunguna mansanga mawonso muna meso mau.’ Muna kuma kia vuvu kiaki, ‘basukula mvwatu miau yo pembesela mio muna menga ma Mwan’ememe.’ (Lus. 7:14, 17) Bekwikilanga muna kimenga kia Yesu, i kuma vo vana meso ma Nzambi bena nze yau bavwete “mvwatu miampembe.” Nze Abarayama, beyikilwanga vo asongi ye akundi a Nzambi.
4 Vana ntandu, wau vo ndong’ayingi ya mameme makaka bebadikilwanga vo asongi kuna kwa Nzambi, balenda kala ye vuvu kia sala yo moyo vava kifwaswa e nza ya tandu kiaki muna mpasi zayingi. (Yak. 2:23-26) Balenda finama Yave yo kala ye vuvu kia vuluka muna Armangedo. (Yak. 4:8; Lus. 7:15) Ke bekuyitumanga ko kansi belandanga luludiku lwa Ntinu au ezulu ye lwa mpangi zandi akuswa bena ova ntoto.
5. E ndong’ayingi aweyi besadisilanga mpangi z’akuswa za Kristu?
5 Akristu akuswa bakinu siwa kitantu kwa nza ya Satana. Kana una vo i wau, balenda bund’e vuvu muna lusadisu lwa mpangi zau za ndong’ayingi. Ekolo lutangu lwa Akristu akuswa lukulukanga, e ndong’ayingi mu wokela kaka ina. Akristu akuswa ke balendi sala e salu kiawonso ko muna tezo kia 100.000 ma nkutakani z’Akristu ova nza. Muna kuma kiaki, dimosi muna lusadisu betambulanga Akristu akuswa i mpangi zamakala zazikuka za ndong’ayingi aya besalanga se akuluntu muna nkutakani. Besadisanga mu lunga-lunga mazunda ye mazunda m’Akristu bayekekwa kwa “ntaudi akwikizi yo lulungalalu.”
6. Lusadisu luvewanga Akristu akuswa kwa mpangi zau mameme makaka, aweyi lwateka zayisilwa?
6 O lusadisu luvewanga Akristu akuswa kwa mpangi zau mameme makaka, lwasonama muna ungunza wa Yesaya. Wasoneka vo: “I wau wuwu kavovele o Yave, o mfuntu a Engipito, yo mana ma Etiopia, ya Anesaba, akwa ntela, bekwiz’oko wina, bakala baku; bekulanda.” (Yes. 45:14) O unu, Akristu bena ye vuvu kia zinga ova ntoto belandanga e buka kia ntaudi akuswa ye Selo Yambuta muna lemvokelanga luludiku lwau. Nze “mfuntu” yovo nsadi olembi futwa, mameme makaka muna luzolo lwawonso, besadilanga ngolo ye mavwa mau mu nungununa salu kia samuna nsangu zambote, kina Kristu kayekeka kw’alandi andi akuswa ova ntoto.—Mav. 1:8; Lus. 12:17.
7. Nkia diambu belongwanga e ndong’ayingi?
7 Ekolo besadisanga mpangi zau akuswa, e mpangi zazi za ndong’ayingi mu longwa bena mu kala se nkubilw’a nz’ampa, vava kivioka Armangedo. E nkubilwa yayi ifwete kala yakumama, awana bezingila mo bafwete kala yo luzolo lwa landa luludiku lwa Mfumu au. Konso Nkristu una y’elau dia songa vo olenda sadilwa kwa Kristu Yesu wa Ntinu. Muna songanga lukwikilu yo sikila ye kwikizi owau, osonga vo, olemvokela luludiku kevewa kwa Ntinu muna nz’ampa.
E Ndong’ayingi Besonganga Lukwikilu Lwau
8, 9. E ndong’ayingi aweyi besongelanga lukwikilu lwau?
8 Mameme makaka ma mpangi za nkutakani ya Akristu akuswa mu mpila zayingi besongelanga lukwikilu lwau. Ediantete, besadisanga akuswa muna samunang’e nsangu zambote za Kintinu kia Nzambi. (Mat. 24:14; 28:19, 20) Diazole, belemvokelanga luludiku bevewanga kwa Buka kia Selo Yambuta.—Ayib. 13:17; tanga Zakariya 8:23.
9 Diatatu, e yikwa ya ndong’ayingi besadisanga ampangi zau akuswa muna zingilang’e ngwizani ye nsiku miansongi mia Yave. Besianga ngolo za yima fu nze ‘zola, kiese, luvuvamu, luzindalalu, walakazi, unsongi, kwikizi, lembama ye volo.’ (Ngal. 5:22, 23) O songa e fu yayi o unu yo lembi kuyivana mu “mavangu ma nitu” dilenda kala diampasi. Kansi, e ndong’ayingi isiang’e ngolo za tina mavangu nze “zumba, nsafu, yingalu, sambu ya teke, mambu ma mpandu, tantu, unzonzi, yimpala, makasi, nswangani, mpambula, mpambani, nsita za kimpala, nkolwa, nkemba, yo mana mena wau.”—Ngal. 5:19-21.
10. Adieyi i tima dia ndong’ayingi?
10 Wau vo tu wantu alembi lunga, dilenda kala diampasi mu yima e mbongo a mwanda, yo tina mavangu ma nitu yo zizidila ntonta za nza ya Satana. Kansi, ke tuyambulanga ko vo lutovoko lweto lwa nitu lwatukendeleka, ngatu yambula vo e mpilakanu yovo lembi fwana kweto kwayoyesa lukwikilu lweto yovo kulula zola kweto muna Yave. Tuzeye wo vo Yave olungisa nsilu andi wa tanina ndong’ayingi muna mpasi zayingi.
11. Nkia ndekwa kesadilanga Satana mu vava yoyesa lukwikilu lw’Akristu?
11 Kansi, tuyingilanga ntangwa zawonso kadi tuzeye wo vo Nkadi Ampemba wa ntantu eto keyoyanga ko. (Tanga 1 Petelo 5:8.) Osadilanga avengomoki yo wantu akaka mu vava kutukwikidisa vo malongi tulandanga maluvunu. Kansi, e ndekwa kesadilanga ke zisikilanga ko. Diau adimosi, kana una vo ezak’e ntangwa lubangamu lulenda sia nkaku muna salu kia umbangi, nkumbu miayingi ediadi dikumikanga nkutu lukwikilu lw’awana bebangikwanga. Muna kuma kiaki, Satana otoma sadilanga e ndekwa zina kemonanga vo zilenda yoyesa lukwikilu lweto. Oyangalalanga vava tukendalalanga. Akristu a tandu kiantete balukiswa mu kuma kia vonza kiaki, vava bavoveswa vo: “Nubadika ndiona [Kristu] wazizidila mpaka z’asumuki, muna yau kibeni.” Ekuma? “Ke nwayoya yo lebokw’e mioyo.”—Ayib. 12:3.
12. O luludiku lwa Nkand’a Nzambi aweyi lukumikinanga awana bekendalalanga?
12 Nga wabadika kala yambula sadila Yave? Nga wayindula kala vo kwafwana ko mu sadila Nzambi? Avo i wau, kuyambula ko vo Satana kasadila ngindu zazi mu kufila wayambula sadila Yave. Longokanga Nkand’a Nzambi, sambanga ye nsi a ntima wawonso, kalanga ntangwa zawonso muna tukutakanu yo kala vamosi y’ampangi z’Akristu, dilenda kumika lukwikilu lwaku yo kusadisa walembi ‘lebokw’o moyo.’ Yave wasia nsilu wa sadisa awana bekunsadilanga mu vutukila kala ye ngolo, tufwete kala ye vuvu muna nsilu wau. (Tanga Yesaya 40:30, 31.) Uyivana muna salu kia Kintinu. Venga mambu makondwa mfunu medianga ntangwa yayingi, sia sungididi mu sadisa akaka. Muna mpila yayi, okala ye ngolo za zizidila lukendalalu.—Ngal. 6:1, 2.
Bavuluzwa Muna Mpasi Zayingi yo Koteswa Muna Nz’ampa
13. Nkia salu bekala kiau awana bevuluka muna Armangedo?
13 Vava kivioka Armangedo, vekala yo mfunu wa longa e nzila za Yave kw’awana balembi songa, ana besinga fulwa. (Mav. 24:15) Bevava longoka mu kuma kia kimenga kia lukulu lwa Yesu. Vana ntandu, belongwa una bafwete songela lukwikilu muna kimenga kiaki, kimana babak’e nluta mia kimenga. Bafwete yambula malongi maluvunu yo yambula e fu yambi bakala yau. Bafwete longoka vwata uwuntu wampa una uswaswanesanga Akristu akieleka. (Ef. 4:22-24; Kol. 3:9, 10) Awana muna mameme makaka bevuluka muna Armangedo salu kiayingi bekala kiau. Ekwe kiese tukala kiau mu sala salu kia Yave, kondwa ntonta yovo lubangamu lwa nza yayi yambi!
14, 15. Yika e moko bekala kiau ana bevuluka muna mpasi zayingi, y’asongi ana befulwa.
14 E selo yakwikizi ya Yave ana bafwa una Yesu kayizidi ko ova ntoto mayingi mpe besinga longoka. Bezaya Masia wasilwa nsilu, ona bavingilanga, kansi ke basala kumona ko. Vava bakala moyo, basonganga luzolo lwa longwa kwa Yave. Yindula e kiese y’elau tukala diau dia kubasadisa. Kasikil’owu, tuzayisa Daniele e nsas’a ungunza una kasoneka, kansi kabakula wo ko!—Dan. 12:8, 9.
15 Kieleka, ekolo tulonga ana befuluka, tukala mpe ye yuvu yayingi ya kubayuvula. Bekutuzayisa mambu mayingi masonama muna Nkand’a Nzambi, mana ke tutoma bakulanga ko. Yindula kiese tumona vava Yoane wa Mvubi kekutuzayisa oma ma Yesu. Ka lukatikisu ko, e mambu tulongwa kwa selo yayi yakwikizi mewokesa umbakuzi weto wa Diambu dia Nzambi tuna diau o unu. E selo yawonso ya Yave ana bafwa, kumosi y’ana bena muna ndong’ayingi befwanga mu lumbu yayi yambaninu, lufuluku “lusundidi o wete” bebaka. Bayantikila sadila Yave muna nza yayalwanga kwa Satana. Ekwe kiese bekala kiau mu yantika diaka sadila Yave mu fulu kiambote muna nz’ampa!—Ayib. 11:35; 1 Yoa. 5:19.
16. Mun’owu wa ungunza, aweyi kikala e Lumbu kia Lufundisu?
16 Muna kolo kia Lumbu kia Lufundisu, vekala ye nkanda miziulwa. Kumosi yo Nkand’a Nzambi, e nkanda miami misadilwa mu fundisa awonso mu zaya ana bafwana o vwa moyo a mvu ya mvu. (Tanga Lusengomono 20:12, 13.) Kuna mfoko a Lumbu kia Lufundisu, konso muntu okala y’elau dia songa esambu kena muna diambu dia kimfumu kia Nzambi. Nga osakalela Kintinu kia Nzambi yo yambula vo Mwan’ememe kafila “kuna nto za maza ma moyo?” Nga osola kolamena Kintinu kia Nzambi? (Lus. 7:17; Yes. 65:20) Muna kolo kiakina, awonso ova ntoto bekala y’elau dia songa luzolo lwa yau kibeni, vava ketufilwa diaka kwa ngindu z’esumu ko ngatu vukumunwa kwa wantu ambi. Ke vekala muntu ko okatikisa unsongi wa mfundis’ansuka ya Yave. Yimpumbulu kaka befwaswa yakwele mvu.—Lus. 20:14, 15.
17, 18. Akristu akuswa ye mameme makaka aweyi bebadikilanga e Lumbu kia Lufundisu?
17 Wau vo Akristu akuswa bafwana mu tambula Kintinu, bevingilanga e ntangwa ina beyala muna Lumbu kia Lufundisu. Ekwe elau diampwena bekala diau! E vuvu kiaki kikubakasakesanga mu landa elongi kavana o Petelo kwa mpangi zandi muna tandu kiantete, oku vo: “Nulut’o sia sungididi kia sikidisa nsumw’eno, ye nsolw’eno: kadi ovo nuvanga mama, ke nutà nkutu esakuba ko: i mpambwilwa nuvambwilwa kikilu e nkota muna kintinu kia mvu ya mvu kia Mfumu eto wa Mvuluzi Yesu Kristu.”—2 Pet. 1:10, 11.
18 Mameme makaka beyangalala wau ampangi zau z’akuswa bena ye vuvu kiaki. Bekalanga ye luzolo lwa kubasadisa. Wau vo akundi a Nzambi, bekuyivananga muna salu kia Nzambi o unu. Muna Lumbu kia Lufundisu, bekala ye kiese kia yikama e nkubika za Nzambi, ekolo Yesu kekubafila kuna nto za maza ma moyo. Muna mpila yayi, bekala bafwana mu sadila Yave ova ntoto yakwele mvu.—Roma 8:20, 21; Lus. 21:1-7.
Nga Osungamenanga?
• Ayeyi i salanganu ya Yesu?
• E ndong’ayingi aweyi besadisilanga mpangi zau akuswa?
• Nki’elau ye vuvu bena kiau e ndong’ayingi?
• Aweyi obadikilanga Lumbu kia Lufundisu?
[Juvu ja longokela]
[Foto ina muna lukaya lwa 25]
Ndong’ayingi basukula mvwatu miau yo pembesela mio muna menga ma Mwan’ememe
[Foto ina muna lukaya lwa 27]
Adieyi osinga zola longoka kuna kw’akwa kwikizi ana befulwa?